euskal diaspora eta kultura
2008/01/16
llusio eta gogoz ia edozer lortu daitekeela ederki dakite Bahia Blancako Union Vasca Euskal Etxeko euskara eta antzerki ikasleek. Azken hilabeteotan 'abentura 'zinematografiko' batean murgilduta ibili dira, Rocio Basterra eta Miguel Mendiondo irakasleen gidaritzapean. Euskara eta antzerkia, antzerkia eta euskara: biak bildu dituzte euskara klaseetarako HABEko ikas materialaren gaiak azaltzen dituen laburmetraia eginez. Rocio Basterrak kontatu digu esperientzia. Estreinua, datozen egunetan sarean eta webgune honetan bertan.
2008/01/16
Liubljanako Aleph argitaletxeak Branil bomocetovo hiso. Antologija moderne baskovske poezije izenburua duen liburua argitaratu du ('Nire aitaren etxea. Euskal poesia modernoaren antologia'). Bilduma honek 23 euskal poeten lanak biltzen ditu, horien artean Jon Mirande, Bitoriano Gandiaga, Gabriel Aresti, Koldo Izagirre, Joseba Sarrionandia, Kirmen Uribe eta Harkaitz Cano, besteak beste. Ciril Bergles poeta esloveniarra izan da itzultzailea.
2008/01/16
Euskal Herrian inor ez da harritzen bertako epaitegi eta eliz irteeretan bikote ezkon berri bat agertzen denean dantzari talde batek irekitako bidetik oinez, milaka arroz ale gainean erortzen diren bitartean, baina Bartzelonan ez da horren ohikoa. Orain, kataluniar hiriburuko dantzari eta txistulari talde batek bere burua eskaintzen du internetez, Aurreskua dantzatzeko edonolako ospakizunetan. Urteak daramatzate horretan, baina orain interneterako jauzia eman dute. Taldeko kide den Ekaitz Landak EuskalKultura.com-i azaldu dionez 'askotan Katalunian bizi diren euskaldunek ez dakite nora jo honelakoak kontratatzeko eta bilaketarako lehenengo lekua internet izan ohi denez, ate hori ere zabaldu nahi izan dugu'.
2008/01/16
Liburua ingelesez hiztunei zuzendua dago eta oinarrizko euskara ikasteko aukera ematen du. Beginner's Basque liburuko metodoa Wim Jansen filologo neerlandarrak garatu zuen 2002an, Aitor Arana euskal idazlearen laguntzarekin. Berrargitalpenak bi audio CD gehigarria dakartza, bertan euskal hiztunen elkarrizketak eta ahoskera jasotzen dituzte. Izan ere iazko apirilean argitaletxea euskal hiztun bila ibili zen NYko euskaldunen artean, orain liburudendetan eta sarean aurki daitekeen metodoa osatzeko.
2008/01/15
Euskal zeluloidearen industriak prest dauka aurten zine aretoetara heldu diren filmeen zerrenda. Lehenengoa, aste honetan bertan estreinatuko dena, Alex de la Iglesia bilbotarraren 'Los crímenes de Oxford' izango da, Elijah Wood estatubatuarra buru duen aktore taldearekin. Euskal zuzendariek ekoiztutako beste filme batzuk 'Un tranvía a S. P.', Unai Elorriaga idazlearen izen bereko eleberriaren moldaketa, eta Gorka Merchánen 'La casa de mi padre' dira. Azken honek Diasporako euskal pilotari baten istorioa kontatzen du: hamar urtez Argentinan bizi ostean Euskal Herrira bueltatzen da Txomin Garai, bere anaiaren semearen kargu egiteko.
2008/01/15
Joanes Leizarragarren 'Jesus Christ gure Jaunaren Testamentu Berria' Bibliaren euskarazko lehen bertsioa da eta 1571an argitaratu zen. Joan den azaroaren 28an Ingalaterrako Sotheby's enkante etxe ezagunak salgai jarri zuen baina ez zuen eroslerik izan. Euskaltzaindiak, baina, liburua eskuratzeko interes handia zuen eta enkante etxearekin akordio batera iritsita liburua 20.500 liberatan erosi du, atzo jakin arazi zuenez.
2008/01/15
Erakundearen araudiak dioenari segituz, Buenos Aires hiriburuko Centro Vasco Francés edo Iparraldeko Euskal Etxeak bere Zuzendaritza Batzordeko kideak berritzeari ekin dio eta agintaldi berri baterako barne buruzagiak hautatu ditu. Euskal Etxeak berak jakin arazten duenez, Ernesto Cornejo Saravia izango da agintaldi berrian elkarteko lehendakari, Enrique Fagoaga lehendakariorde, Norma Ríos idazkaria eta Guillermo López diruzaina, beste zenbait karguren artean.
2008/01/14
Ekimen eta proiektuez beteriko urtea itxi berri dute Bogotako Euskal Etxea osatzen duten euskal-kolonbiarrek. 2007an zehar euskal etxearen egoitza inauguratu dute, Ibarretxe lehendakariak Jesus Galindezen omenezko eskultura zabaldu du Gernika parkean eta gastronomia aste arrakastatsua egin dute, besteak beste. Urte berrian ere maila berarekin jarraitzeko asmoa agertu dute eta dagoeneko elkartearen erronka berriak izango direnak aurkeztu dituzte: txokoa eta liburutegi bat eraikitzea euskal etxean, 5. Euskal Astea antolatzea eta Gernika Kultur Parkea sortzea, tartean.
2008/01/14
Mexikoko euskaldunek 2004ean eta 2007an egin zieten harrera ona errepikatu nahi dute Aretxabaletako Akordeoi Orkestrako kideek eta Argentinako euskal etxeetan bira antolatu nahian dabiltza aurtengo urri alderako, datak zehazteke. Interesa eduki dezaketen euskal etxeei ahal bezain pronto orkestrarekin harremanetan jartzeko gonbitea luzatzen diete, beraz. Orkestrak musika desberdinak eskaini ditzake: euskal musika, munduko musika herrikoiak, klasikoa, tangoak eta baita haurrentzako kontzertu didaktikoak ere.
2008/01/14
Seattleko euskal komunitateak aurkitu du dagoeneko hiri estatubatuar honetako jatetxe berrienerako bidea. Eta ez du bide hori galtzeko asmorik, izan ere Txori tabernak Donostiako Alde Zaharreko toki hautuak gogora ekartzen dituen pintxo karta eskaintzen baitu. Joseba Jimenez de Jimenez da taberna berriko sukaldari eta jabea. Jimenez Harvest Vine jatetxeko jabea ere bada eta bi lokal hauetatik euskal gastronomia Seattle-en zabaltzeko apustua egiten du Ipar Ameriketako mendebalde kostaldean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
