euskal diaspora eta kultura
2008/01/29
Antonio Narvarte Sanz hil da Txileko Viñan, 84 urte zituela. Irunen (Gipuzkoa) jaioa, 1939an heldu zen Txilera bere anai eta gurasoekin, gerla eta Francorengandik ihesean. Gurasoak, Antonio Narvarte Iraola eta Ana Sanz Garayalde izan zituen; anaiak, Cástor, Rafael eta Javier. Antonio bera, musikaria izan da, kontzertista, musikagile eta maisua, akordeoian eta pianoarekin, klasiko zein euskal motako. Viñako Conservas Larrondoko Marita Larrondo Idiart-ekin ezkondua, Juan Antonio, Maritxu, Maite eta eta Iñakiren aita. Elizkizunak, gaur arratsaldean, Viñako Karmeliten elizan. Euskal komunitate osoa bilduko da. Goian bego.
2008/01/28
Argentinako euskara irakasleak aurten ere astebetez 'ikasle' bihurtu eta euren euskara praktikatzeko aukera izan dute, HABEk eta FEVAk antolatutako udako barnetegian [orain uda da Hego Hemisferioan]. Barnetegia La Platan izan da eta urtarrilaren 19an hasi eta atzo bukatu zen. Argentinako Tandil, San Juan, Mendoza, Bragado, Tres Arroyos, Buenos Airesetik... eta Uruguaitik etorritako irakasleak aritu dira, zortzi egunez mintzamena lantzen.
2008/01/28
Mexikok, bertako jendeak eta kulturak maitemindu egin dute Pakita Andueza, mundua ezagutzeko gogoarekin Europa, America eta Asian ibili ostean herrialde honetan bizitzea erabaki zuen lakuntzarra. Gabonetako oporretan Euskal Herrian izan da eta Lakuntza sorterrian bere bizipenak eta esperientziak kontatu dizkio Guaixe herri aldizkariari.
2008/01/28
Honen aurreko artikuluak gogora ekartzen duenez, 'Argentinan Euskaraz' programako ikasle-irakasle talde bat Maizpide barnetegian dabil ikasten, Lazkaon, urtarrilaren 7tik. Hogeitahiru euskaldunberri hauek zenbait arrazoi ezberdinek bultzatuta gerturatu dira Lazkaora, bertako ohitura, bizimodua eta batipat hizkuntzan murgiltzeko, gehienak bi hilabeterako etorriak eta multzo txikiago bat, sei hilabeterako, EGA ateratzearren. Euretako batzuk Euskalkultura.com-i adierazi diotenez, aste batzuk joan badira ere ezin dute oraindik sinetsi hemen daudenik, "amets batean gaudela iruditzen zaigu", diote.
2008/01/26
Jose Maria Bengoa medikua, Venezuelako euskal Diasporan errotutako gizona eta nazioarteko ospea duen nutrizionista, izango da bihar igandea Bilboko Arriaga antzokian banatuko diren 2008. urteko Sabino Arana sarien ezaugarri den estatuatxoa jasoko duenetako bat. Sarien izena bera duen Fundazio antolatzailetik adierazi dutenez, 'Bengoaren gizarte eta osasun arloko arazoekiko kezkagatik eta talde behartsuenekiko adierazi duen elkartasunagatik', eman diote saria, 'doktoreak 65 urte baino gehiago eman baititu mundu osoan zehar gosea, bidegabekeria eta pobreziaren kontra borrokan'.
2008/01/25
Hamabi urterekin Buenos Aireseko Colon Antzoki famatuan profesionalen gar eta lasaitasunarekin jo zuenetik Xavier Inchausti bibolinjole euskal argentinarraren ibilbidea distiratsua izan da eta etorkizuneko bibolinjoleen artean izarra izateko bidean omen dabil, adituen esanetan. Bahia Blancan jaioa da Xavier, eta familia sustraiak Bizkaian eta Nafarroan ditu. Xavierrek erronka garrantzitsuak izango ditu aurten, horien artean hainbat kontzertu Ukrainan, Taiwanen, Suitzan eta Italian. Proiektuen artean, musikari gazteak Pablo Sarasate musikagile iruindarraren lana Euskal Herrian bertan jotzeko gogoa aipatzen du.
2008/01/25
Bizkor ibili behar dute aurtengo Gaztemundu programan parte hartu nahi duten Diasporako gazteek, eta baita ere euskal etxeak dauden lekuetan bira kulturalak egin nahi dituzten euskal artistek ere. Izan ere, Jaurlaritzak eskaintzen dituen laguntzetarako eskariak aurkezteko epea otsailaren 4an bukatuko da, hamabi egun barru. Artikulu honetan laguntzak eskatu ahal izateko ze baldintza dauden eta ze agiri aurkeztu behar diren gogoratzen dugu.
2008/01/25
Eusko Jaurlaritzako Kultura saileko ordezkaritza bat asteburu honetan abiatuko da bi herrialdeotara, bertako unibertsitateetan Euskara eta Euskal Kultura lektoretzak zabaltzeko posibilitateak aztertzeko. Horiekin, Asia eremura hedatuko litzateke egun Europa eta Ameriketako 12 herrialdetako zentroak biltzen dituen programa. Bidaian bisitatuko diren erakundeen artean Waseda Unibertsitatea dago --Euskara eskolak ematen dira jadanik bertan-- eta Sofiakoa, Tokion; Kansas Gaidai, Osakan; eta Kobeko Unibertsitatea, hauek guztiak Japonian; eta Filipinetan, Ateneo de Manila Unibertsitatea eta Nueva Vizcayako Estatuarena.
2008/01/24
Joseba Azkarraga Eusko Jaurlaritzako Justizia, Lan eta Gizarte Segurantza sailburuak eta Urbano Marín-ek, Txileko Gorte Goreneko presidente izendatu berriak, Justizia modernizatzeko lankidetza-akordioa sinatu zuten asteartean, herritarrentzako zerbitzu hau azkartasunez, gardentasunez eta baliabide publikoen eraginkortasunez emateko helburuarekin. Azkarragak aurreratu zuenez, datozen hilabeteotan Txileko Gorte Goreneko ordezkariak Euskadira joango dira, EAEn egiten ari den lana ezagutzera, eta ondotik bisita bueltatu egingo zaie.
2008/01/24
Kubako Asociación Vasco Navarra de Beneficencia (AVNB) delako euskal elkartea buru belarri sartu da 2008ko ekimenen antolakuntzan. Elkartea berrindartzeko kultur ekitaldiak sustatzea da aurtengo ildoetako bat eta urteari hasiera emateko Octavio Cortazar zuzendariaren 'El onceno maestro' dokumentalaren emanaldia egin zuten joan den astelehenean. Elkarteko kide ugari bildu zen bertara, Cortazarrek bere familiaren sustraien bila Bizkaira eginiko bidea ikusteko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
