euskal diaspora eta kultura
2008/04/16
Orain dela apenas bi urte sortua bada ere, Washington DCko Euskal Etxeak AEBetako hiriburuan lan egin eta bizi diren euskal amerikar asko biltzen ditu dagoeneko. Talde anitza da, estatu desberdinetatik heldutako kideek osatua, baina ezaugarri nagusienetakoak partaideen gogoa eta gaztetasuna ditu. Joan den apirilaren 5ean Aberri Eguna giro alaiean ospatu zuten piknik batekin: bertan musika, jaki euskaldunak eta azken orduko 'ezusteko' gonbidatu bat ere izan zuten.
2008/04/16
Herriko agintariak --Liliana Denot alkatea buru--, hezkuntza arlokoak eta euskal etxekoak partaide izan ziren joan den asteazkenean Argentinako Chascomus-en, Eusko Jaurlaritzak bertako Hezkuntza Teknikoko Eskola 1 zenbakidunari eginiko dohaintza ekitaldian. Argentinako bandera eta ikurrinari harrera egin ostean eta bi ereserkiak kantaturik bertaratutako agintari eta ordezkariek hitza hartu zuten, lankidetza laudatu eta makina irits zedin lan egin dutenen ahalegina eskertzeko. Hitzorduaren amaiera gisa Cesar Arrondok Euskal Nazioari buruzko hitzaldia eskaini zuen.
2008/04/15
Mexikora Baztango bailaratik heldu ziren emigranteen ondorengoak Euskal Etxeko talde zalapartatsu eta alaienetakoa dira eta aurten ere Baztango Eguna ospatzeko jai giro ederrean bilduko dira. Hitzordua maiatzaren 1ean izango da, DFko Euskal Etxean, eta Euskal Herriko eta Mexikoko musikariak arituko dira bertan: Patxi Larralde txistulari baztandarra, Luis Antonio Barberena soinujole euskal-mexikarra eta iaz ere jaian izan zen Xarnege talde euskal-gaskoina.
2008/04/15
Joan den astean EuskalKultura.com-ek iragarri legez, Eusko Jaurlaritzak atzo argitaratu zuen Euskal Herriko Agintzaritzaren Aldizkarian (EHAA-BOPV) aurtengo Euskal Etxeentzako laguntzen deialdi berria. Deialdiaren testua duela egun batzuk zabaldu zitzaien euskal etxeei, baina EHAAn argitaratua izateak dagoeneko eskabideak aurkez daitezkeela nahi du esan. Dokumentazioa eta dagozkion imprimakiak aurkezteko epea maiatzaren 16ean bukatuko da.
2008/04/15
Ormaiztegiko (Gipuzkoa) Zumalakarregi Museoak (ZM) 'Innova' saria jaso berri du Bartzelonako Expodidáctica 2008 Azokan, 'ZM birtuala' izeneko bere webguneak eskaintzen dituen 'balio didaktiko, berritzaile eta sortzaileengatik'. Honako atalak biltzen ditu webguneak: XIX. mendeko albuma, hileroko bildumagarriak, erakusketa birtualak, dokumentazio zentroa eta gazteei zuzendutako jokoak. 'Zerbitzu onenari saria' alorrean lortutako goraipatze hau, Bartzelonako Museu dhistòria de la immigració de Catalunya-ren lehen sariaren eta Madrileko Thyssen-Bornemisza Museo prestigiotsuaren bigarrenaren ondotik lortu du Ormaiztegikoak.
2008/04/14
Ideia Monika Madinabeitia bertako irakasleak planteatu zuen joan den urtean eta unibertsitateko arduradunei proposamena aurkeztu ostean joan den martxoan hasi ziren klaseak. Madinabeitiak Frank Bergon idazle euskal amerikarrari buruzko tesia egin zuenean ezagutu zuen euskal Diaspora eta orain mundu hori unibertsitateko ikasleenganaino ekartzea du helburu hautazko ikasgai honekin. 'Diasporari buruz oso gutxi dakigu eta Diaspora ikertzerakoan euskaldun izateko modu desberdinak daudela topatzen dugu eta ondorioz geure buruari euskaldun izatea zer den galdetzen diogu. Geure gizarteari buruzko hausnarketa egiteko modu polita da', azaltzen du Madinabeitiak.
2008/04/14
Xarnege musika taldea euskal eta gaskoi instrumentu, melodia eta dantzen artean dauden antzekotasunak sakonago aztertu eta ezagutu nahi zituzten musikariek sortu zuten duela bost urte. Denbora tarte honetan Euskal Herrian, eta atzerrian ere kontzertu ugari eskaini dituzte. Hilaren amaieran eta maiatzaren hasieran Mexikon arituko dira bigarren urtez jarraian. Guadalajaran, Chiapasen eta Mexiko DFn instrumentu berriekin landutako abestiak eskainiko dituzte kontzertuetan.
2008/04/14
Argentinako Alza familiako kideek bigarren aldiz elkartzeko aukera izango dute, datorren igandean, apirilak 20, Buenos Aires probintziako Ayacucho hirian antolatu duten senitarteko topaketan. Eguna hasteko, Gipuzkoako Irundik Argentinara XIX. mende amaieran emigratu behar izan zuten familiako kideei eskainitako meza egingo dute. Jarraian, tripako zorriei erreparatiko diete herriko lokal batean eta elkarreratzea jarduera artistiko batekin amaituko da.
2008/04/12
Joseba Azkarragak, Eusko Jaurlaritzako Justizia, Lan eta Gizarte Segurantza sailburuak, astelehenean Buenos Airesen ekingo dio bidaia ofizialari. Bost eguneko iraupena izango du bidaiak eta Argentinaz gain Boliviako Santa Cruz hirira eta Peruko Cuzcora ere eramango du. Buenos Airesen egingo duen egonaldi laburrean Azkarragak hainbat mintzaldi eskainiko ditu eta Maiatzeko Plazako Amen elkarteak antolatu duen mintegian parte hartuko du.
2008/04/11
Andres Urdanetaren jaiotzaren 500. urteurreneko ekitaldien barruan, Jose Ramon de Miguel idazleak 'Urdaneta eta bere garaia' liburua aurkeztu zuen atzo Ordizian. 'Urdaneta albo batera utzi zuten historialariek, konkistadore tipiko bat ez izateagatik, Ameriketako herrietan su eta garretan sartu ez zelako', azaltzen du egileak. Adierazgarria da ordea, euskalduna Filipina eta Acapulcoko historian heroia izatea herrialde horiek mapan jarri baitzituen XVI. mendean, Filipinak eta Amerika artean Tornaviaje itsasbidea aurkitu zuenean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
