euskal diaspora eta kultura
2008/04/19
General Rodriguezeko 'Eusko Aterpea' Euskal Etxeak Aberri Eguna ospatu zuen iragan apirilaren 6an Buenos Aires probintzian. Ospakizunean bildutako 130 partaideek Jubilatuen eta Pentsiodunen aretoa bete zuten eta euskal eta argentinar musiken, krioilo erre baten gozamen, joko eta zenbait zozketen artean, parte hartzaileek ekitaldiaz gozatu ahal izan zuten berandu arte. Ekintzan Lujan, Las Heras, Moreno, Marcos Paz eta Pilarreko delegazioak aritu ziren.
2008/04/18
New European Poets da europar poesia berriaren antologiaren izenburua eta egileak Kevin Prufer eta Wayne Millar literatur adituak izan dira. Liburua argitaratu berria da Estatu Batuetan, Graywolf Press argitaletxearen eskutik. Antologiak XX. mende bukaerako eta XXI. mende hasierako 270 idazle europarren lana jasotzen du, tartean Kirmen Uribe eta Bernardo Atxaga euskaldunak ere agertzen direlarik. Egileek azaldu dutenez 'egungo europar poesiari buruz ingelesez egiten den lehen antologia' da hau eta ingeles, frantses, espainiar edo errusiar tradizioko egileak biltzeaz gain euskaraz, gaelikoz edo sumi hizkuntzan idazten duten ahots berriei ere tartea egiten die.
2008/04/18
Duela lau urte hasi zen jardunean Euskararen Erakunde Publikoa (EEP) eta egun ere Jean-Claude Iriart zuzendariak euskarak Iparraldean duen egoera oso larria dela onartzen du, nahiz eta aurrerapausoak eman diren. 'Lehena EEPren sorrera bera, lehen aldikotz Frantziako botere publikoek adostu zutelako euskararen aldeko erakunde bat bultzatzea'. Erakundearen lehentasuna haur eta gazteen artean euskara sustatzea da, 'eurak direlako berpiztearen oinarri'. Helburu horrekin irakaskuntza arloan euskaraz klaseak ematen dituzten 20 gune berri ireki dituztela adierazi dio EuskalKultura.com-i Jean-Claude Iriart-ek.
2008/04/18
Euskal Herriko Unibertsitateak bekak eskaintzen ditu UPV-EHUk Latinoamerikako unibertsitateekin edo unibertsitateetan irakasten dituen doktoretzetako ikasleek egonaldiak egin ahal izan ditzaten euskal unibertsitate publiko honetan. Ikasle hauek Euskal Herrira etorri eta euren tesi zuzendariarekin aurrez aurre bildu eta lan egiteko bi egonaldi egin ditzakete. Laguntzen zenbatekoa 900 euro bidaia ordaintzeko eta egonaldiko egun bakoitzeko gehienez 30 euro izango dira. Laguntzak eskatzeko epea hilaren 30ean bukatuko da.
2008/04/18
Euskal Herriko Ahotsak proiektuko Asier Sarasuak eta Badihardugu Euskara Elkarteko Aintzane Agirrebeñak iragan asteazkenean aurkeztu zuten 'Ahotsak.com'. Webgune berria herri bakoitzeko garai bateko euskara ezagutarazteaz gain, euskaldun zaharrek oraintsu arte izan dituzten ohitura eta bizimoduen gordailu eta erakusle ere bada. Arduradunek aipatu dutenez, proiektua elkarte, udaletxe edota kaleko talde edo pertsonei irekita dago, gai honen inguruko lan amankomuna bultzatzeko asmotan. Orain arte 1.218 zinta bildu eta zenbait grabazioen transkripzioak egin dituzte.
2008/04/18
Hilaren 25, 26 eta 27an Tolosan egingo den 'Gipuzkoa Encounter' jaialdiko bigarren edizioak sarearen bidez elkartzeko aukera emango die informatika zale euskaldun eta katalanei, azken hauek 'Lleida Lan Party' ekimena medio. Euskal Herriko eta Katalunia arteko mugak gaindituz, informatika ezagupenak partekatzea ahalbideratuko du bi jai hauen arteko senidetzeak. Gipuzkoako ekitaldiaren kasuan, seiehun bat pertsonek parte hartuko dute Tolosako Usabal kiroldegiko instalazioetan ipiniko dituzten 400 ordenadoreetan. Diseinu grafikoa, musika elektronikoa eta bideo-jolasak izango dira bildutakoek jorratuko dituzten hiru arlo nagusiak.
2008/04/17
Euskal Herriko Unibertsitateak Latinamerika, Filipinak eta AEBetako ikasleen mugikortasuna sustatzeko beka deialdia ireki du. Bekak 2008-2009 ikasturteko kalitate aipudun doktoretzatara sarbidea ematen duten ikerketa masterrak egingo dituzten ikasleei zuzenduak dira. Beka bakoitzaren zenbatekoa 4.500 eurotakoa da eta eskabideak aurkezteko epea datorren maiatzaren 17an itxiko da.
2008/04/17
Mar del Platako Denak Bat Euskal Etxeak ekimenez jantzitako asteburua prestatu du Gernikako bonbardaketaren 71 urteurrena gogoratzeko. Ekitaldiak hilaren 25ean hasiko dira, ostiralean, guda zibileko afitxeen erakusketa batekin eta 'El Bombardeo de Gernika' dokumentalaren emanaldiarekin. Hurrengo egunean, larunbatean, lore eskaintza egingo dute Mar del Platako euskaldunek Gernikako Arbolaren kimuaren aurrean.
2008/04/17
General Rodriguezeko Eusko Aterpea Euskal Etxeak antolatzen duen 'Palabras Mayores' zikloaren jardunaldi berrian Hector Humberto Demichelisek hitzaldia eskaini zuen iragan larunbatean. Herriko bizilagunei euren bizitzari buruz hitz egiteko aukera ematen die zikloak eta Demichelisek 95 urte izanagatik sasoi ederrean dagoela erakutsi zuen, postari bezela egindako lanari buruz hitzeginez. Entzuleak, tartean bere alaba, biloba eta birlobak, oso pozik agertu ziren hizlariak herriko inauterietan edukitako esperientzia dibertigarriak aditzera ematerakoan.
2008/04/16
Bertsoen errima eta doinuak entzungai izango dira maiatzaren 3an Belfasten, bertako euskaldun talde batek antolatu duen Bertso-Dinner jaiari esker. Fredi Paia eta Arkaitz Estiballes bertsolariak arituko dira kantari eta Irlanda eta Eskozian bizi diren euskaldun asko bilduko dira jaira. Oraindik leku gutxi batzuk gelditzen dira, euskal-irlandar jai berezi honetan parte hartu nahi dutenentzat.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
