euskal diaspora eta kultura
2008/05/16
Zenbait euskal kirolari arituko dira abuztuaren 8an Beijing-en hasiko diren Joko Olinpikoetan. Horien artean Maider Unda arabar kirolaria egongo da. Emakumezkoen borroka praktikatzen du Undak 72 kiloko kategoria Olinpikoan eta duela hilabete batzuk blog bat sortu zuen munduan zehar burutzen ari den entrenamendu prozesua internetez azaltzeko. Hilaren hasieran Colorado Springs hirira bidaia egin zuen entrenamendu saioa egiteko. Bertakoa, Estatu Batuetan dauden lau Entrenamendu Gune Olinpikoetako bat da New York, California eta Michiganekoekin batera.
2008/05/16
Pozik daude Santa Feko Gure Etxea elkartean, azken hilabeteetan egin dituzten ekitaldiak direla eta. Euskal Etxeak ekimen horien berri eman dio EuskalKultura.com-i, martxo-apirileko egitaraua azpimarratuz eta datozen ekimenetako batzuk iragarriz. Aberri Eguna, adibidez, elkarteko bazkide eta lagun ugari bildu zituen bazkari batez ospatu zuten eta, joan den igandean, Kolektibitateen Azokako hamabostgarren urteurrenaren jaian ere parte hartu zuten, besteak beste.
2008/05/16
Buenos Aires Hiri Autonomoko Laurak Bat Euskal Etxeak Zuzendaritza berritu duela adierazi du ohar baten bidez. Agintealdi berria hasia duen Zuzendaritza Batzorde berriak Jon Kepa de Erquiaga izango du berriz ere lehendakari, eta berarekin batera arituko dira José María Landa, lehendakariorde, Arantxa Goicoa, idazkari, Enrique Fagoaga, idazkariorde, Eduardo Lizaso, diruzain, eta Maria Teresa Anitua, diruzainorde.
2008/05/15
Mexikoko EmpreBask-ek, Euskal Jatorria Duten Enpresarien Elkarteak alegia, deialdia luzatu du Mexikar Errepublikako Erdigunean euskal eta jatorri euskalduna duten enpresariekin bilera antolatuz bihar Celaya hirian. Erakundearen antoilaketa eta jarduera azaltzeaz gain, gaurkotasuneko bi hitzaldi egitarautu dituzte antolatzaileek. Mexikoko euskal enpresarien asmoa aldiro biltzea da, elkarren arteko interesak zeintzuk diren ikertzeko eta EmpreBask baliatuz eman ditzaketen urrats berriak bultzatzeko.
2008/05/15
Euskal standa Living Traditions-eko klasikoetako bat bihurtu da, 1986an lehen aldiz Utah Basque Club-eko bazkideek jaialdian parte hartzeko elurte gogor bati aurre egin behar izan ziotenetik. 22 urte pasa dira eta Utahko talde etnikoen eraskuslehio izateko asmoz jaio zen ekitaldia, 45.000 bisitari baino gehiago biltzen dituen jaialdi erraldoia bihurtu da. 'Gure ohiturak eta gastronomia munduan zehar ezagunak dira. Horiek mantendu eta gure seme-alabei erakustea da gure asmoa', azaltzen du Mary Gaztambidek, euskal etxeko lehendakariak, Salt Lake Tribune egunkarian argitara emandako elkarrizketan. Bihar bertan hasiko da jaialdia.
2008/05/15
Musikaste 2008 Errenteriako Musika Asteak Juan Garcia de Basurto musikagilearen lana aurkeztuko du gaur, Capilla Peñafloridak Josep Cabréren gidaritzapean emango duen kontzertuarekin. Basurto Espainiako Felipe II.aren gortean eta Cisneros kardinalaren agindutara kapera maixu bezala aritu zen eta lan garrantzitsuen egilea izan zen, nahiz eta horietako gutxi gordetzen diren gaur egun. Musikastek ikerketa lan zabala egin du gureganaino heldu diren partiturak bilduz eta gaur Errenazimenduko egile honen lana erakutsiko du kontzertu honetan.
2008/05/15
Barakaldoko Bilbao Exhibition Centre-n (BEC) egiten ari diren XXI Feria Internacional de Turismo Expovacaciones - Expoconsumo erakustazoka dela-eta, zenbait euskal eta valentziar pilotarik Sestaoko udal pilotalekuan egingo den pilota jaialdian parte hartuko dute bihar. Iragan hilaren 2an joaneko partidak jokatu zituzten Azkoitiko frontoian (Gipuzkoa) eta itzulerakoak izango dira biharkoak. Aurrekoan Euskal Herriko pilotariak gailendu ziren.
2008/05/15
Argentinako Buenos Aires probintzian, Zuzendaritza Batzordeko karguak berritu ditu 'Gure Txokoa' Euskal Etxearen Ohiko Biltzarrak. Elkarteko araudiak dioenari jarraiki, agintaldi berrirako hautatua izan den Batzordeak Antonio José Caracoche izango du lehendakari, Manuel Bernardo Echave lehendakariorde, Jose Matias Bascaran idazkari eta Alberto Vergues diruzain.
2008/05/14
Pariseko Eskual Etxeak (PEE) aro berri bati ekin dio berriki aukeratutako zuzendaritza batzordearen gidaritzapean. Hervé Trinquet du talde berriak buru lehendakari bezala eta Parisen jaiotako zuberotarren semeak EuskalKultura.com-ekin hitz egin du erronka eta ekimenen berri emateko. Horien artean nabarmanetakoak Euskal Etxea Saint Ouen auzora irekitzea eta elkartea euskal artista, musikari eta idazleek euren lana Parisen ezagutzera emateko plataforma bezala erabiltzeko gonbitea dira.
2008/05/14
Eusko Jaurlaritzaren Gobernu Batzordeak Etxepare Euskal Institutuaren antolakuntza eta jarduera-araudi Dekretua onartu zuen atzo, era honetara euskara eta euskal kulturaren kanpo zabalpena xede duen Institutu honen sorrera eta lanean hastea ahalbideratuz. Ez da oraindik jakitera eman erakunde sortu berriaren ardura hartuko duen zuzendariaren izenik. Beñat Etxepareren 'Jalgi hadi mundura' esaldia eslogan propiotzat hartuko duen Institutuak orain artean Jaurlaritzako zenbait sail eta tokitatik garatzen zen lana bereganatu eta koordinatuko du, berez Kultura Sailari atxikita badago ere.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
