euskal diaspora eta kultura
2008/06/25
La Platako Euskal Etxeak Bakearen Lorategiaren inaugurazioan parte hartu zuten, azken hilabeteotan egin dituzten eraberritze lanak bukatu ostean. Argentinar herriko Basoaren Pasealekuan dago parke adierazgarri hau eta bertan hiriko kolektibitateen irudi diren zuhaitzak landatu dituzte. Euzko Etxeak, noski, Gernikako Arbolaren kimua du ikur bezala. Inaugurazio ekitaldian hiriko agintariak eta kolektibitateen ordezkariek parte hartu zuten eta Euzko Etxeako kideek stand bat aurkeztu zuten euskal plater tradizional eta Euskal Herriari buruzko informazioarekin.
2008/06/24
Kultura Sailburuaren proposamenaren harira, Eusko Jaurlaritzako Gobernu Batzordeak Etxepare Euskal Institutuaren Patronatuko kideak izendatu ditu, horretara zuzendutako Dekretua onartuz. Etxepare Euskal Institutua Kultura sailari atxikitako berezko gaitasuna eta izaera juridikoa duen zuzenbide pribatuko herri erakundea da eta euskara eta euskal kulturaren kanpo zabalpena du xede. Izendatu berria den Patronatuko kideen artean besteak beste Ibarretxe lehendakaria, Miren Azkarate Kultura Sailburua, Iñaki Aguirre Kanpo Ekintzetarako idazkaria eta kultura arloko hainbat ordezkari daude, hala nola, Andres Urrutia, Pantxoa Etchegoin, Javier Retegi, Koldo Martinez, Ludger Mees edo Marijose Olaziregi.
2008/06/24
Santiago Bereciartúa eta José Domingo Ormaetxea, Euskaria Fundazioaren Argentina eta Uruguaiko ordezkariak, Euskal Herrian dira egunotan, elkarteak gonbidatuta, hainbat ekimenetan Diasporaren ikuspuntua emateko. Euskaria Fundazioa 1986ean jaio zen elkarte independientea da eta bere asmoa biolentzia-eza aktiboa eta desobedientzia zibilaren markoan Euskal Herriarentzako Autodeterminazio Eskubidea eskatzen du, irtenbide demokratiko eta baketsu bezala. Euskariak Euskal Herriko indar abertzale eta euskaltzale guztien arteko lankidetza sustatu nahi du, Diaspora ere asmo horretara gehituz.
2008/06/24
Rosarioko Zazpirak Bat Euskal Etxeak antolatu zuen euskal-eskoziar topaketaren lehen edizioak 'arrakasta izugarria izateko behar den guztia bildu zuen', euskal etxeko arduradunek adierazi dutenez. Jaialdian euskara eta gaelikoa izan ziren izar, mintzaldi, eztabaida eta DVD emanaldien bidez. Elkarteko 'Txikiak' eta 'Gaztedi Zutik' dantza taldeek ikuskizuna eskaini zuren eta anaitasun afaria egin zuten Maiatzaren 25eko jai egun argentinarra ospatzeko. Egunari bukaera emanez Buenos Aireseko 'Fingal' talde argentinar-eskoziarrak kontzertua eskaini zuen.
2008/06/23
Diasporako euskara ikasle askok maila ederra lortu dute, ahalegin eta ikasketa ordu askori esker; duela bi aste Rocio Basterra eta Natalia Hormazabal argentinarrek ederki erakutsi zuten hori, ETBko Mihiluze saioan parte hartuz. Ez zuten irabazi, baina bai euskaldun zaharren ondoan ederki moldatzen direla frogatu, euskarazko joko, errima, SMS ulertezin eta jeroglifikoak deszifratuz. 'Esperientzia oso ona izan zen eta berriz errepikatuko genuke', dio Rociok. Saioa ETBn edo Calan Vascoren bidez ikusterik izan ez zutenentzat, jarraian Mihiluzek EuskalKultura.com-entzat eginiko une onenen bideo bat eskaintzan dizuegu.
2008/06/23
Chacoko Kotoiaren Lurrak urteko lehen Euskal Afaria egin zuen iragan ostiralean Resistenciako Don Bosco Ikastetxean (Argentina). Elkarteko lagun eta bazkide asko bertaratu ziren eta arduradunek Kotoiaren Lurrak urtero antolatzen dituen jardueren berri emateko aukeraz baliatu ziren, jarduera hauek doakoak eta elkarteko kide zein kanpoko edozeini irekiak direlako. Ekimen hauen artean aipagarria izan zen 'Aurrera Goaz' Bokaziozko Antzerki Taldearen aurkezpena. Taldekideek euskal gaia ardatz zuen lana antzeztu zuten. Afaria zozketa, euskal kanta eta monologo komikoekin osatu zuten.
2008/06/23
Rio Gallegoseko Hegoalde Argentinarra Euskal Etxearen I. Urteurren Jaiak berrehun kagun inguru bildu zituen, jarduera egitaraui mardulaz gozatzeko prest: euskal gastronomia, Euskal Herriko argazki emanaldia, dantza ikuskizuna, euskal kantak eta zozketak, besteak beste. Zentroko zuzendaritza batzordeak Euskal Etxearen egoitzaren irekiera iragarri eta datozen asteetan egingo diren jarduerak aurkeztu zituen, horien artean, Euskararen Eguneko afaria. Afari honetan Euskal Herria bisitatzeko bi bidai zozketatuko dituzte.
2008/06/20
Urdaneta 500-Ordiziako Udala Batzordeak, Euskal Herriko Unibertsitatearen laguntzarekin, 'Las rutas marítimas en la globalización: el tornaviaje de Urdaneta' ikastaroa antolatu du uztailaren 21, 22 eta 23rako. Klaseen helburuetako bat Asia, Amerika eta Europako herrien arteko ekonomia eta kultur trukaketan Urdanetak egindako ekarpena ezagutaraztea izango da. Jardunaldiak Donostiako Miramar Jauregian eta Ordizian egingo dira. Matrikularen prezioa 84 eurokoa da.
2008/06/20
Euskara Munduan programaren baitan, Europako zenbait Euskal Etxeetako irakasleen topaketa egin zen joan den asteburuan Bartzelonako Euskal Etxean. Ekimena Eusko Jaurlaritzako Kultura Sailak HABEren bidez antolatu zuen eta helburua irakasleak arlo desberdinetan trebatzea zen. Ikastaroaren gaia 'HEOK (Helduei euskara irakasteko oinarrizko kurrikuluma) eta IKTak (Informazio eta Komunikazio Teknologiak) euskararen irakaskuntzan’ izan da. Euskara Mundua programaren koordinatzaile J. Fco Zinkunegik gidatu zuen ikastaroa eta bertan Bartzelona, Madril eta Valentziako Euskal Etxeetako irakasleak eta Bartzelonako Hizkuntza Eskola Ofizialekoak, Universitat de Barcelona eta Universitat Autónoma de Barcelonakoak bildu ziren.
2008/06/20
San Juan Gauaren bezperaren hurbiltasuna eta udako solstizioaren indar magikoetaz baliatuz, Zugarramurdiko herri nafarrak 'Sorginaren Eguna' ospatuko du bihar. Egunean zehar hitzaldiak, kobazuloetara bisita gidatuak eta ekitaldi ugari egingo dituzte. Diasporan ere euskal etxe askok bat egingo dute izpiritu honekin eta San Juan gaua ospatuko dute. Kristau santuaren egunak udako solstizioaren tradizioarekin (neguko solstizioa hego hemisferioan) bat egin du, eguzkiaren boterea eta suaren indar garbitzaileari buruzko sinismen jentilak barneratuz. Buenos Airesen, Chivilcoyn, Mexiko DFn, Madrilen... euskal etxeko kideek tradizioa jarraitu eta suaren gainetik salto egingo dute, aro berrirako gurariak eskatuz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
