euskalkultura.eus

Vitoria-Gasteiz. Euskal Herriko Unibertsitateak (EHU), Eusko Jaurlaritzaren Kanpoko Euskal Komunitatearentzako Zuzendaritzarekin elkarlanean, Euskal Diasporan espezializatzeko graduondoko berria eskaintzen du 2021az geroztik, Oscar Álvarez Gila koordinatzaile akademiko. Aurten aurrematrikulazioa maiatzean hasiko da, eta ikastaroa 2023ko urria eta 2024ko maiatza bitartean egingo da. Aukera interesgarria da eta erabat online egin daiteke, nonahitik, eta Eusko Jaurlaritzaren laguntza duenez, graduondokoen artean ohikoa dena baino kostu txikiagoa dauka.

Ikastaroaren helburua migrazio-prozesuei buruzko diziplina anitzeko ikuspegia eskaintzea da, baita horien sorrerari, bilakaerari eta ondorioei buruzkoa ere, gaur egungo kanpoko euskal komunitateak eta etorkizuneko proiekzioa kontuan hartuta. Proposamenak bi prestakuntza-maila eta bi titulu ditu: Euskal Diasporako aditua (180 eskola-ordu, edonori irekia) eta Euskal Diasporako espezialista (300 eskola-ordu, Unibertsitate-titulu bat eskatzen du eta ikasturte amaierako lan bat egin beharra). Graduondokoaren kostua 180 eurokoa da (aditua) eta 300 eurokoa (espezialista).

Sartu eta eskatu xehetasunak

Bi maila horiei esker, ikertzaileak eta unibertsitate-ikasleak izan daitezke ikasle, baina baita ere migrazio-fenomenoari buruzko ezagutza zabala eta diziplina anitzekoa lortzeko interesa duen pertsona oro. Ikasgaien artean, Historia eta Memoria, Hizkuntza eta Kultura, Asoziazionismoa, Komunikazioa, Politika Diasporikoak, Paradiplomazia, Diasporaren Teoria eta Ekonomia aipa daitezke. Hasi zenetik hona, graduondoa oso emankorra izan da euskal ikasketetan sakontzen lagunduz; izan ere, graduondokoa egin duten espezialistek arrakasta handiz aurkeztu dituzte beren azken lanak.

Graduondoko edukiari eta matrikulazio prozesuari buruzko informazio gehiago hemen.