West Lafayette, AEB. Ekitaldiak Indianako Purdue Unibertsitatean egingo dira, erakunde akademiko honek aurten Hizkuntza Indigenen Urtea dela-eta gaurtik larunbatera bitartean antolatutako “International Year of Indigenous Languages 2019: Perspectives Conference” kongresuan. Etxepare Euskal Institutua laguntzaile, egitarauko parte izango da urriaren 31n, Ane Ortega, Arkaitz Zarraga eta Andoni Barreña adituek hainbat urtez Kolonbiako Nasa indigenekin Yuwe hizkuntza biziberritzeko helburuz egindako elkarlanaren berri emango duten hitzaldia, “Creating networks and partnerships for indigenous language revitalization: the Nasa-Basque experience” izenburupean.
Azaroaren 1ean, ostera, Amaia Gabantxo itzultzailea euskal poesiaren itzulpengintzaren inguruan mintzatuko da “From the Square to the Page, and onto the other Page: The Order of Things in Basque Poetry in Translation” hitzaldian.
Eta ostiralean bertan, Jone Miren Hernandez Garcia antropologo eta irakasleak euskararen biziberritze prozesua eta bertsolaritza uztartzen dituen hitzaldia emango du goizeko 10:30ean: “Bertso baten bila / Looking for a bertso” izenburupean.
“International Year of Indigenous Languages 2019: Perspectives Conference” izeneko nazioarteko kongresu honek komunitate eta hizkuntza indigenak goraipatzea du helburu, eta ahots ezberdinen bitartez elkarlana bultzatzea. Gai hauek jorratuko ditu batik bat: hizkuntza indigena duten komunitateen lorpenak; komunitateekin egindako elkarlanak; hizkuntzen biziberritze eta mantentzerako hezkuntza politikak; hizkuntza indigenen egoera XXI mendean; ahots indigenak kultura popularrean (sare sozialetan, fikzioan, poesian, filmetan edota hip hop-ean); eta hizkuntza indigenak eta hizkuntza-aniztasuna.
Lagun bati bidali
Komentarioa gehitu
