euskal diaspora eta kultura
2010/07/28
Uztailarekin batera urteko lehenengo seihilekoaren bukaera heldu da. Balantzea egiteko eta atseden txiki bat hartzeko momentua, agian. Izan ere, Argentina osoan, probintzia ezberdinetan ordutegi ezberdinak gorabehera, neguko oporren garaia izaten dira hilabeteok. Eta San Fermin Jaiak, bi helburu horiek betetzeko aukera eman dio Argentinako hainbat euskalduni. San Ferminen omenezko festen harira, euskal erakunde batzuek, gonbidatu bereziak jaso dituzte beren baitan. Trenque Lauquen-era, Ricardo Basterra FEVAko lehendakaria bildu da; La Platako ospakizunean, berriz, Elvira Kortajarena Jaurlaritzaren Argentinako Ordezkariak hartu zuen parte; eta euskal etxe askotako kideak Ayacuchora bidaiatu ziren bertako ekitaldian dantzatzera.
2010/07/28
Elhuyar Zientzia eta Teknologiaren Hiztegi Entziklopedikoa sarean dago dagoeneko, nahi duenak dohain kontsultatzeko moduan. Obra, 2009ko urrian eman zen argitara liburu eta CD-ROM formatuetan. Zientzia eta Teknologia alorrak haintzat hartzen dituen euskarazko hiztegi entziklopediko hau, euskaraz egin den lehena gai hauetan, termino bakoitza beste zenbait hizkuntzetan ere badakar, hala nola ingelesez, gazteleraz eta frantsesez, beste andana bat euskarazko artikulu eta informazio osagarriarekin batera.
2010/07/28
Hala esan zuten duela egun batzuk: Egunkariko zuzendari ohia eta egun Berriako zuzendaria den Martxelo Otamendi kazetariak ezingo zuen Idahoko Jaialdin egon, AEBetan sartzeko baimena bertako gobernuak ukatuta. Geroztik, Idahoko euskal komunitateko kide eta buruzagi ezagun diren Dave Bieter, Boiseko alkatea, eta Pete Cenarrusa, estatu-idazkari ohia, Otamendiren alde mintzatu zaizkio gutun batean AEBetako Espainiako enbaxadariari. Boiseko hiriari eta bertako euskaldunei lotutako ibilbidea daukan Otamendi duela gutxi errugabetu zuen Espainiako justiziak bere kazetari lanari loturik leporatzen zitzaizkion ETAko kide izateko karguetatik, Euskal Herri barne zein kanpoko hainbat kazetari-elkarteek eta giza eskubideen eta bestelako taldeek erabat zentzugabe eta oinarribakotzat jo zuten 'Egunkaria auzia' izena hartu zuen prozesuaren baitan.
2010/07/28
Ipar Hemisferioko uda honetan, Noka talde kaliforniarrarekin batera Euskal Herrian zehar zenbait kantaldi eskaini zituen Jean Bordaxar-en laukote zuberotarra Kaliforniara hurreratuko da abuztu amaieran, grabatu duen bere azken diskoa San Frantzisko eta Chinoko Euskal Etxeetan aurkezteko.
2010/07/27
Atzo eratu zen Donostian egoitza izango duen 'Basque Culinary Center'eko Aholkulari Batzordea. Zentro honetako aholkulari taldea nazioartean izen handiena duten zortzi sukaldariek osatuko dute. Hurrengo urtetik aurrera, gune honetan Gastronomia Zientzien Fakultatea eta Ikerketa eta Berrikuntza Zentroa izango dira.
2010/07/27
Estatu Batuetara hasi berria duen bidaiako lehenengo programapeko egun osoan Nevada-Renoko Unibertsitatea (UNR) bisitatu zuen atzo Patxi Lopez lehendakariak. Goi ikastetxe horretako 'Mathewson-IGT Knowledge Center' delako eraikin adimentsuan egoitza duen Euskal Ikasketa Zentroa, UNRko presidentearekin eta bertako goi karguen gidaritzapean ikusi zuen, tartean Bill Douglass, Joseba Zulaika eta Sandy Ott irakasleekin. Horiekin batera, Blanca Urgell Kultura sailburua eta Guillermo Echenique Kanpo Harremanetarako idazkari nagusia eta euskal ordezkaritzako parte ziren beste zenbait lagun. Goizeko ekitaldi garrantzitsuenean, eraikin bereko hitzaldi aretoan, Jaurlaritzaren eta UNRen arteko hitzarmena berritzea, eta Nevadako Estatuari 'Lagun Ona' merezimendua ematea. Gobernadorea postua uzten ari delarik, Nevadako gobernadoreorde Brian Krolicki-k jaso zuen plaka eta errekonozimendua.
2010/07/27
Boise State University (BSU) eta bertako Euskal Ikasketen Zentroa antolatzaile direla, bihar hasiko da Boisen 'Euskal Herria Mugaz Gaindi' Nazioarteko Mintegiaren zazpigarren edizioa. Euskal diaspora eta emigrazioaren fenomenoa eta 'kanpoko Euskal Herria'ren arlo desberdinak ikertzen dituztenak bildu eta elkarren berri emateko moduan jartzea helburu duen bilera honek Ameriketako zein Europako aditu eta ikertzaileak batuko ditu. Ekitaldiak Blanca Urgell Eusko Jaurlaritzako Kultura sailburuak inauguratuko ditu. Hizlarien artean, EuskalKultura.com-ek ere izango du presentzia, ostegunean bere zuzendari Joseba Etxarri mintzatuko baita, 'Euskal Etxeak mundu globalizatuan' gaiari buruz.
2010/07/27
Beroak Euskal Herriko Iruñea gogor jotzen zuen bitartean, Buenos Aires probintzian eta hiriburuan hamarkadako tenperatura baxuenak pairatu zituzten euskal argentinarrek. Hala ere, hotza ez zen oztopo bihurtu eta nafar eta euskal etxeek San Fermineko egitarauak bete zituzten. Argentinako jai eguna aprobetxatuz --Independentziaren eguna ospatzen da uztailaren 9an Hego Amerikako herrialde honetan-- erakunde batzuek egun hori aukeratu zuten euren jaia gauzatzeko. Horien artean, Buenos Aires eta Mar del Platako Nafar Etxeak. Bi instituzio hauetako kideak lagunen arteko bazkariak antolatu zituzten eguerdi hotz batean. Arrecifestarrak, ordea, bezperan elkartu ziren. Euskal etxeko tabernan menu berezi bat dastatu ahal izan zen uztailaren 8ko gauean.
2010/07/27
Euskal turismoak internet bidezko bere telebista-kanala izango du laster. Kanal berri horretan euskal turismoarekin lotutako bideoak emango dira, hainbat hizkuntzatan argitaratuak. Ikus-entzunezkoen bitartez, bisitarien eskura dauden produktuen berri emango du (gastronomia eta enologia, ibilbideak, bilera turismoa, hiri ihesaldiak, eta abar) eta eguraldiari eta agenda kulturalari buruzko edukiak eta sustatzeko bideoak emango ditu, baita turismo-intereseko jarduerei buruzko erreportajeak eta gaurkotasunari buruzko informazioa ere. Lehenengo emanaldietako bat abuztuan egingo da: Euskadiko hiriburuetako jaien emankizuna; kanal horri esker, irudi horiek munduko edozein lekutatik ikusi ahal izango dira.
2010/07/27
Idahoko Boise hiriburua euskal musika, dantza eta aireen agertoki bilakatuko da aste honetan. Doinu, erritmo eta euskal giro hori ipintzen arituko diren talde eta norbanako gehienak Estatu Batuetakoak bertakoak izango badira ere, badira bi talde Euskal Herritik, Gipuzkoa eta Lapurdiko mugatik, bilduko direnak Jaialdi 2010era: Hendaiako Mutxiko Elkartea eta Irungo Txorimaloak Soinu Taldea. Azken hauen kasuan, ez da honakoa trikitilari eskola hau boiseratuko den lehenengo aldia, Jaialdi 2000n parte hartu baitzuten eta geroztik lotura estua baitaramate Boiserekin. Mutxiko dantza taldearen kasuan, duela bi urte Argentinako euskal diaspora ezagutu eta bertako hainbat euskal etxetan arrakastaz aritu ondoren, iparralderago jo dute oraingoan, Boiseko Jaialdiaz gain San Frantziskon ere dantzatuz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
