euskal diaspora eta kultura
2012/04/10
Munduko euskal etxe askotan ospatzen den jaia da Aberri Eguna eta datozen egunotan horren isla izango dugu EuskalKultura.com-en, bateko eta besteko euskal etxe eta komunitateetatik iritsiko zaizkigun berriek adieraziko dutenez. Ospakizunaren kronikak New Yorken hasiko ditugu, datorren urtean 100 urte beteko dituen Eusko Etxea of New York-ek urteko hitzordu garrantzitsuena gisa bizi baitu Berpizkunde Igandeko hau, aurten gainera Mendeurreneko ekitaldi programa prestatzen ari direla. Datozen egunetan euskal etxe eta komunitate gehiago.
2012/04/10
Ekimen interesgarri bati ekiteko elkartu ziren duela bi urte Buenos Aires probintziako Tres Arroyoseko euskal jatorrizko lagunak. Argentina osokoak eta bisitari atzerritarrak erakartzeko asmoarekin, euskaldunen presentzia ugaria duen eskualde honetako historia, berezitasun eta baliabideak ezagutarazteko proiektu bat jarri zuten martxan tresarroyostarrek. ‘Euskal Pampa’ izeneko Landa Turismo proposamenak Buenos Aireseko kostaldeak eta lautada zabalak bisitatzeko birak antolatzen ditu, eskualdeko nekazaritza eta abeltzaintzako ekoizpena eta herriko sukaldaritza baztertu gabe. “Gure inguruan Euskal Herritik etorritako etorkinen arrastoak daude, edonon. Adibide bat jartzeagatik esango dut ardi azienda zuten dozena bat finka zeudela beste garai batean hemen. Guztiak familia euskaldunenak ziren. Orain bi bakarrik geratzen dira, baina bietako jabeak euskaldunen ondorengoak dira”, azaldu dio ‘Euskal Pampa’ arduradunetako bat den Natalia Cubiatebeherek EuskalKultura.com-i.
2012/04/09
Gaur Pazko Eguna da, jai eguna Euskal Herri osoan eta joan den astean adierazi genuen bezala EuskalKultura.com bihar asteartea itzuliko da bere irakurleekiko eguneroko hitzordura. Atzoko Aberri Eguneko ospakizunak munduan zeharreko euskal etxeetan, aste honetako euskal katedra zabaltzeak (Chicagon), FEVAko bilera eta hauteskundeak, eta Pampa Vasca bezalako ekimenak izango dira astean zehar hizpide hartuko ditugun gaiak. Bihar arte, irakurle.2012/04/08
Argentinan, 106 euskal etxeren federazioa den FEVA erakundeak agiri bat plazaratu du 2012ko Aberri Eguna dela-eta, aurten 80 urte betetzen ari den ospakizun honi gainbegirada historikoa emanez eta, besteak beste, euskaldunen "euskaldun izateko eskubidea, hain xinplea eta hain sakona den zerbait" aldarrikatuz. "Euskal Herri handi, independente eta batua"ren alde agertu ondoren, FEVAren oharrak "herri bat gara, nazio bat gara" adierazten du, "erabakitzeko eskubidea daukagu" baitetsiz.2012/04/07
Txileko Santiagon, Gure Etorkia euskal kultura taldeak igande honetan ospatzera deitu du Aberri Eguna, izan ere hiriko San Cristobal muinoan dagoen Eusko Enparantzan, bertan dagoen Gernikako Arbolaren kimuaren aurrean, lehenik nahi duenarentzat hamabietan meza izango delarik eta ondoren Aberri Eguneko ekitaldi xume bat, ohorezko aurreskua eta hitz eta kantuak tarteko. Santiagoko Eusko Etxeak --Mendeurrena ospatzen ari da aurten-- astebete beranduago ospatzen du urtero Aberri Eguna, bere egoitzan garatzen duen programa bat medio.
2012/04/04
Igandean hasi eta ia hilaren bukaera arte, Diasporako euskal etxeek Aberri Egunaren jaia ospatuko dute, bazkari, erakusketa, meza eta beste zenbait jarduerekin. Atzerriko euskal elkarteetan ospe handiko besta da hau eta Quebec-etik Buenos Airesera, eta Londrestik Sydneyra, hainbat herrialdetako euskaldunak bilduko ditu amankomunean duten ondarea eta pasioa aldarrikatzeko: arbasoen lurra, aberria. Jai egun ofiziala igande hau bada ere, munduko elkarte askok datorren astera atzeratuko dute ospakizuna, oporrak eta gero bazkide eta lagun gehiago bildu ahal izateko.
2012/04/04
Bertoko Euskal Etxearen eskutik eta udalak antolatutako ‘Flores-ko Hilabetea’ jaialdiaren baitan gauzatuko da Uruguaiko Flores departamenduan Euskal Aste Nazionalaren II. edizioa. Euskal Festa apirilaren 15ean hasiko da Sukaldaritza eta Eskulan Azoka batekin eta segidako igandean, apirilaren 22an, bukatuko da Bildots Erretzaileen Lehiaketa eta Mezarekin. “Flores-ko Hilabetea jaialdiaren antolatzaileekin batera ari gara lanean, uste dugulako euskaldunok ez gaudela isolaturik gure herrian; alderantziz, honaino heldu ziren lehenengo euskaldunen eragina toki guztietan ikus daiteke. Horretaz gain, eta nahiz eta Flores departamenduan burutuko den, gure euskal jaia ‘Nazionala’ da Uruguai osoan eta ezaugarri hauekin egiten den bakarra delako”, adierazi zuen prentsaurrekoan euskal etxeko bozeramale Celia Bessonart-ek.
2012/04/04
Bordeleko Euskal Etxeak deituta bilera egin zuten iragan martxoaren 24ean hiriburu ekitaniarrean Frantziako euskal elkarteek. Partehartzaileak Pariseko Eskual Etxea, Paueko Lagunt eta Maita, Montpellier-ko Eskualdunak elkartea eta Tolosako Denak Bat dantza taldea izan ziren. Bilkuran, elkar ezagutzeaz gain, aukera izan zuten ideiak eta lan moldeak partekatzeko eta elkarren esperientzietatik ikasteko. Biharamunean Eskualdunen Biltzarraren Odolkiaren Bazkarira bildu ziren ordezkariak, Bordeleko beste zenbait elkarte euskaltzalerekin batera.
2012/04/03
Caracasko euskal komunitateko kide askok parte hartu zuten iragan martxoaren 31 Eusko Etxean egin zen argazki erakusketaren inaugurazioan. "1937. Euzkadi bajo las bombas" da erakusketaren izenburua eta Durangoko eta Gernikako bonbardaketen argazki historikoak ekarri ditu euskal elkarte venezuelarrera. Inaugurazio ekitaldian lekukotza oso berezia eskaini zituzten bonbardaketetan izan ziren bi emakume euskal venezuelarrek: Maria Teresa Aguirre de Arriagak eta Itziar Rodriguez Seijok. Bonbarketa horien 75. urteurrena betetzen da aurten, eta mundu osoan zehar euskal etxe asko ekitaldi oroigarriak ari dira egiten edo prestatzen.
2012/04/03
Nevada-Renoko Unibertsitateko Center for Basque Studies-ek (CBS) Dolores Saval Triguero beka eskatzeko deia egin die Nevadako euskal jatorridun ikasleei. Beka honi esker unibertsitatean ikasketak egiteko diru-laguntza jasoko dute eskatzaileek; laguntza hori 500 eta 1000 dolar bitartekoa izan daiteke. Beka 1995ean sortu zen, Dolores Saval Triguero zenaren omenez. Eskabideak aurkezteko epea apirilaren 15ean itxiko da. Bestalde, CBS-ek “Play, Games and Sports: Bodies of Practice, Communities of Desire” nazioarteko mintegia egingo du apirilaren 19tik 21era. Honi buruz xehetasunak emango ditugu datorren astean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
