euskal diaspora eta kultura
2012/04/18
Taldeak ez du txintik esan, baina bolo bolo dabil Madonna ospetsuaren hurrengo biran parte hartuko duten berria. Kantari amerikarraren zaleen webgune batek bota zuen primizia iragan astean, eta harrezkero euskal medioetan agertu da albistea. Taldeak, antza, konfidentzialtasun akordio zorrotza du eta ezin du berria baieztatu ezta gai honi buruzko informaziorik eman. Gauzak horrela, maiatzaren 29an Madonnak bira Tel Aviv-en abiatzen duen unera arte itxaron beharko dugu. Kalakaneko hirukotea izango ote du alboan?
2012/04/17
Etxepare Euskal Institutuak bi diru-laguntza deialdi berri eman ditu argitara: bata, euskararen jabari geografikotik kanpora euskal kultura sustatzeko eta hedatzeko xedea duten kultur programa edo jarduera bereziak sustatzeko; bestea, euskal idazleen lanak euskara ez diren hizkuntzetara itzultzeko. Lehen kasuan, eskabideak aurkezteko epea bi hilabetekoa izango da, gaurtik hasita. Bigarren kasuan, aldiz, bi epe egongo dira: gaurtik maiatzaren 16ra bitartekoa eta urriaren 1etik 31era bitartekoa.
2012/04/17
Beste behin --eta hamazazpigarrena da jada-- Venezuelako euskal diasporarekin harremana duen lagun talde bat bilduko da Galdakaon, Euskal-Venezuelarren Urteroko Topaketaren baitan. Lagunarteko bilera da topaketa hau eta helburua Venezuelan jaio edo bizi izan diren euskaldunak biltzea da, aspaldiko lagunak ikusteko eta harremana mantendu ahal izateko. Aurtengo bazkaria Galdakaoko Batzokian egingo da, eta Amaya Zenarutzabeitia antolatzaileak EuskalKultura.com-i baieztatu dionez, dagoeneko 60 lagundik gora eman dute izena. Azken egunak dira izena emateko bertaratu nahi dutenentzat.
2012/04/17
Pazko igandean ospatu zen Aberri Eguna Euskal Herrian eta apirilean zehar egingo dute Argentinako hainbat euskal elkartek bertako ohiturei jarraiki. Urterik urte haziz doan engaiamenduak eraginda, euskal etxeek barruko eta kanpoko ekintzak antolatu dituzte joan den astean, munduan euskaldunen ondorengo gehien biltzen duen herrialdean. Datozen lerroetara, iragan asteko ekitaldiak batu ditugu, Buenos Aires, Laprida, Villa Maria eta Arrecifesen burutu diren ospakizunen laburpenak hain zuzen.
2012/04/16
Emeki emeki aurrera darrai "Ainara" filmearen produkzio prozesua, apurka apurka internet eta sare sozialen bitartez ekimenerako indarrak bilduz. Proiektu berezia da "Ainara" eta, euskaraz, ingelesez, frantsesez eta gaztelaniaz gauzatzeaz gain, auzolanean ari dela osatzen da bere ezaugarri nagusia. Hori dela eta, ekimenaren ardura duten Euskal Herriko eta Diasporako profesionalek kolaboratzaileei figurante gisa parte hartzeko aukera eman nahi diete eta 2013an egingo den filmaziorako 30 figurante aukeratzeko epea ireki dute. 18 eta 78 urte bitarteko gizon eta emakumeen bila ari dira.
2012/04/16
Duela bi urteko bozketetan hautatua izan zen bikoteak bi urte gehiagotan luzatuko du bere agintaldia FEVAko buruzagitzan. Hemeretzi euskal etxetako ordezkariek hautatu zuten joan den larunbatean, aurkeztutako zerrenda bakarra, Ricardo Basterra eta Marta Abarrategui buru zeuzkana, ustekaberik izan ez zuen hauteskunde prozesuan. Partaidetza eskaseko Urteko Ohiko Biltzar Orokorrean, -hemeretzi boto zerrendaren alde eta bat zuri-, lehendakari berrautatuak elkarlanean sakondu eta martxan dauden proiektuak jarraitu eta sendotzera deitu zituen FEVAko kideak. Biltzarrean, Euskadiko Ordezkaritzen ixtearen kontrako dokumentu bat irakurri zuen Basterrak eta bertaratutako lagunak Zuzendaritza Btzordearen lehenengo bileran parte hartzera gonbidatu zituen. Bilkura hastean, ostegunean hil zen Ramon Ignacio Arozarena Landaren omenezko txalo bat eskaini zen.
2012/04/16
"Salvemos el frontón Beti-Jai" izeneko madrildar herritar plataformak jo eta su darrai munduko neomudejar estiloko frontoi bakarra salbatzeko ahaleginean. Joakin Rucoba arkitektoak 1893an eraiki zuen frontoia Kultura-ondasuna da eta iragan martxoan Madrilgo Udalak desjabetu egingo zuela iragarri zuen, eraikina eta bere ondarea zaintzeko. Hala ere, prozesuak luze joko du, eta plataformatik salatu dute egungo jabeak ez direla ari zaintzen behar den moduan eta gero eta larriagoa dela instalazioen hondamendi-egoera.
2012/04/13
Rhode Island-eko Euskal Etxea gogotsu ari da lanean eta makina bat ekimen eta egitasmo sustatzen dabil 2012 honetan. Elkarte gazteak datorren igandean ospatuko du Aberri Eguneko jaia eta, bide batez, aurtengo besta eta ekitaldien egitaraua gogorarazi du euskal etxearen newsletter edo buletinaren bitartez. Abian dituzten egitasmoen artean aipagarriak dira Portsmouth-eko Liburutegian ematen diren euskara eskolak (doan eta edonori irekiak) eta "Senior Project Scholarship" delako beka: eskola proiekturako euskal gaia aukeratzen duten ikasleentzako dirulaguntza.
2012/04/13
"Koldo Mitxelena ez zen sekula Estatu Batuetan izan, baina orain merezimendu osoz lekua du unibertsitate honetan", esan zuen Blanca Urgell Kultura sailburuak Chicagoko Unibertsitatean asteartean, euskal hizkuntzalariaren izena duen katedraren inaugurazioan. Etxepare Institutuak sortu duen katedrak euskal ikasketak sustatuko ditu AEBetako unibertsitateetan. Asteartean egin zen inaugurazio ofiziala eta, ekitaldiei bukaera emanez, asteburuan euskal zinea izango da ikusgai Chicagoko Latino Film Festivalen jaialdian.
2012/04/13
Illinoisko Unibertsitateak, bertan Koldo Mitxelena katedra inauguratzea kari euskara eta euskal kulturaren erakuslehio antolatutako ekitaldien artean, atzo ostegunez euskal literaturari buruzko eguna pasatu zen, gonbidatu gisa Arantxa Urretabizkaia eta Eider Rodriguez idazleak, eta Jaurlaritzako Blanca Urgell Kultura sailburua eta Mari Jose Olaziregi Etxepare Institutuko Euskararen Sustapenerako zuzendaria ere partaide zirela. Unibertsitateko euskara ikasleek, eurek espres eginiko bertso batekin eman zieten ongietorria gonbidatuei.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
