euskal diaspora eta kultura
2012/04/20
Mendeurrena betetzen ari den urte berean, Rosarioko Zazpirak Bat euskal etxe argentinarrak iragarri du bihar larunbata ospatuko duela, bere egoitzan egingo duen ekitaldi batez, Aberri Eguna eta datorren asteko ostegunean, berriz, gomuta eta ohoratze egitarau bat gauzatuko duela Rosarioko Gernika Plazan, Gernikako bonbardaketaren 75. urteurrena kari. Bi ekitaldiak zuzenean eskainiko ditu internetez euskal etxeak, munduko edozein lekutatik segitu nahi dituztenek hala egin ahal izan dezaten.
2012/04/20
Krisi garai honetan pozik ematen ditugu horrelako berriak. Batetik, Bizkaia:xede fundazioak lurralde honetara prestakuntza handiko langileak erakartzeko laguntza programa jarri du abian. Lehen deialdi honetan 700.000 euro kudeatuko ditu fundazioak, langile horien kontratazio eta lekutzearen %50a-%100a bitartean ordaintzeko. Europar Batasunaren laguntza du programak. Bestalde, Ikerbasque Fundazioak jakinarazi duenez, mundu osoko 300 hautagaik erantzun diote 20 ikerlari gazte kontratatzeko plazaratu duen deialdiari. Deialdia itxita dago jada eta eskabideak aztertzen ari dira orain.
2012/04/20
Gernikako Bonbardaketaren 75. urtemuga gogoan izateko hainbat ekintza garatzen ari dira euskal erakunde anitzetan apiril honetan. Askok, gainera, Bizkaiko hiribilduan gertatutakoa euskal etxeen eremutik kanpo ezagutaraztea finkatu dute helburu. Las Flores herrian, Buenos Aires probintzia argentinarrean eta xede horrekin, Gernikaren historian sakondu zuten San Miguel Institutuko seigarren urratseko neska-mutilek. Komunitatearengana heltzeko asmoarekin ere, herriko Gizataldeen Azokan parte hartu berri dute Loretako Euskaldunak euskal etxeko kideek.
2012/04/19
Gaur hasiko da Nevada-Renoko Unibertsitatean, bertako "Center for Basque Studies" edo Euskal Ikasketa Zentroaren eskutik, euskal-amerikar ikasgune honek urtero entolatzen duen Euskal Ikasketa konferentzia, hamaikagarrena, aurten jokoak, jolasak eta kirolak aztergai hartuko dituena, karia horretara besteak beste Frantzia, Erresuma Batua, Katalunia, Euskal Herri eta Estatu Batuetako adituak bildurik. Joseba Etxebeste eta Clara Urdangarin irakasleak (aurtengo William Douglass saridun edo bekadun direnak, egun Renon urtebetez bizitzen baina eurak EHUko irakasle) eta Mariann Vaczi eta Joseba Zulaika dira ekitaldietako koordinatzaile.
2012/04/19
Gaur bertan inauguratuko da Buenos Airesko Nazioarteko Liburu Azoka eta 23. urtez jarraian euskal instituzio batzuek euren indarrak batu dituzte ekitaldi honetan euskal partaidetza bermatzeko. Euskal standean genero anitzeko euskal liburu, musika eta bideoak erosi eta kontsultatu ahal izango dira. Azoka Buenos Aireseko Nekazaritza Elkartean burutuko da eta Eusko Jaurlaritzaren babesarekin Juan de Garay Fundazioak eta FEVAk antolatutako standa pabilioi horian egongo da, 2420 zenbakian. Azokaren programaren baitan, Fundazioak argitaratutako 'Vascos en Argentina, familias y protagonismo' (Euskaldunak Argentinan, familiak eta protagonismoa) liburuaren 4. edizioa aurkeztuko da apirilaren 26an.
2012/04/19
Bernardo Atxagaren "Zazpi etxe Frantzian" eleberriaren ingeles itzulpena Independent Foreign Fiction Prize sarien "Shadow" sail paraleloko sei finalisten artean aukeratu dute. "Shadow" saria atzerriko fikzioari buruzko zazpi literatur blogetako ordezkariek aukeratzen dute. Atxagarekin batera "itzaleko" finalistak Amos Oz, Sjon, Peter Nadas, Umberto Eco eta Matthias Politycki dira. Bi sailetako irabazleen izena maiatzaren 14ean jakinaraziko da.
2012/04/19
Era ugari daude Aberri Eguna ospatzeko eta Denak Bat-ek aukeratutakoa dantzak eta euskaldunen alaitasuna komunitate osoari erakustea da. Cañuelaseko Aberri Eguneko Dantzarien 'Topaketa Erregionala' hitzordu nagusietako bihurtu da urteekin eskualdeko euskal etxekoentzat eta seigarren edizio honetan hamabi ordezkaritzak hartu zuten parte herriko San Martin Plazako ospakizunean. Dantzaldia arratsaldeko zazpiak aldera hasi zen danborradaren soinuekin eta talde guztiak aurkeztu ondoren, erromeriara bildu ziren gazteak. Ricardo Basterra FEVAko lehendakari berrautatu berriak lagundu zituen Cañuelaseko lagunak jaialdi kuttun honetan eta agur hitzak zuzenduz partaide guztiei. Euskarak ere izan zuen bere tokia jaian, jendeari oinarrizko hitzak ikasteko aukera emanez.
2012/04/18
Etxepare Euskal Institutuak Polonian dituen hiru irakurle programak antolatuta, Harkaitz Cano eta Rikardo Arregi euskal idazleak bira egiten ari dira egunotan Polonian, Jabier Muguruza eta Mikel Azpiroz musikariekin batera. Bira herenegun abiatu zen Varsovian, eta idazleek egin zituzten bi irakurraldiak abegi ona izan zuten. Bihar Poznan hirian izango dira eta etzi Gnieznon egingo duten emanaldiarekin bukatuko da bidaia. Kimuak programako filmen hautaketa bat ere ematen ari dira hiru hirietan.
2012/04/18
Eusko Jaurlaritzako Kultura Sailak Dokuklik aurkeztu du, Euskadiko artxibo publiko eta pribatuetako agiri historikoak biltzen dituen ataria. Bertan XIII. mendetik XX. mendera bitarteko sei milioi agiri eta, horiekin lotuta, bi milioi eta erdi irudi digital daude; ekainean hiru milioi irudi izango dira. Gainera, Kultura Sailak iragarri duenez, musika-artxiboena ere abian dago eta ikus-entzunezko funtsena diseinatzen ari dira.
2012/04/18
Datorren apirilaren 28an Euskadiko Ikasle Orkestrako 80 musikari gazteak Kolonbiara abiatuko dira, herrialde honetan hamar eguneko bira egiteko. EIOk hiru kontzertu emango ditu: bi hiriburuan, Bogotako Gazte Orkestrarekin batera, eta beste bat Bella Flor herriko eskola batean. Bogotako kontzertuak maiatzaren 3an eta 6ean izango dira eta Bella Flor-en emanaldi didaktiko bat egingo da maiatzaren 4ean. Bira honetan orkestrak Antonio Lauzirika musikagileak taldearentzako egin duen lana estreinatuko du: "EIOk".
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
