euskal diaspora eta kultura
2012/04/27
Makina bat edizio eta zenbait hizkuntzara itzulpenak izan ditu jada Juan Carlos Etxegoien 'Xamar' idazlearen "Orhipean" liburuak, eta Euskal Herriaren historia eta kulturari buruzko dibulgazio lan ezagunenetakoa bihurtu da. Aurten, Bartzelonako Euskal Etxeak katalanera itzuli du eta "Orhipean. El país de la llengua basca" izenburuarekin plazaratu du Pamiela argitaletxearekin batera. Xamar Bartzelonan izan zen Sant Jordi egunean, Ramblen pasealeku ezagunean liburuaren aleak sinatzen Euskal Etxeak gonbidatuta.
2012/04/27
Hegazki nazi eta faxistek, Francoren zerbitzura, Euskal Herriko zenbait herri bonbardatu zituzteneko 75. urteurrena ari gara oroitzen egunotan: Gernika, Durango, Eibar, Elorrio. Horietako bat, Durango bere sorterrikoa, ezin hurbilagotik bizi izan zuen Maritxu Irazabalek, eta hala kontatzen digu, bere 102 urtetan, Argentinako Diasporatik. Adin horretan, hainbat gertakariren lekuko izan da Maritxu Euskal Herrian nahiz Argentinan eta argi du gogoan Durangotik Buenos Aires probintziako Mar de Ajo-rako bidean bizi izandako guztia. “Bonbardaketaren ostean Bilbora joan nintzen eta hor Justo Garate medikuarekin egin nuen topo. Durangotik ezagutzen nuen eta berak esan zidan ‘Nahi duzu nire familiarekin Belgikara joan?’ ‘Edozein tokitara. Gerra honetatik edozein tokitara, ez dut nahi hemen bizi’ erantzun nion nik”, esan digu. Eskertu nahi diogu Teresa Zavaletari lekukotasun hau hona ekartzeko eman dizkigun erraztasunak.
2012/04/27
Rosarioko Emakume Abertzale Batzak Urteroko Biltzar Nagusia egin zuen apiril hasieran Banderaren Hirian eta estatutuek agindutakoari jarraiki Zuzendaritza Batzordea berritzeko bozketa egin zuen, ondorioz Maria Cristina Mercado berriz ere hautatua izan delarik elkarte historiko honetako lehendakari, lagun izango dituela Cintia Lassalle, lehendakariorde, eta gainerako batzordekide Maria Cristina Arregui, Mercedes Balbuena Rios, Maria Asuncion Echaniz eta Jessica Lassalle.
2012/04/27
“Gure ekimenarekin saritu nahi ditugun balioak ardura, ahalegin pertsonala, langilea izatea eta komunitatearen alde elkartasunez jokatzea dira” adierazi dute Tres Arroyosko Hiru Erreka Euskal Etxeko arduradunek, gehituz "gure ustez, horrek guztiak gizartearen eredu bihurtzen ditu"ela. 2012ko sarituak, aurreko edizioetan bezala, Buenos Aires probintziako euskal elkarte honetako kideek hautatu eta zeremonia batek dotoretuta instituzioaren egoitzan eginiko sari-emate ekitaldian eskuratu die, apirilaren 21ean, hiriaren urtemuga programaren baitan.
2012/04/26
1937ko apirilaren 26ean aire-armada naziko hegazkinek Gernika erasotu eta herria birrindu zuten. Bonbek eta suteek 126 hildako eragin zituzten. Harrezkero Gernikaren izena gerraren lazgarrikeriaren eta bakearen aldeko mugimenduen ikur bilakatu da; besteak beste, Picassoren "Guernica" margolanaren eraginagatik. 75. urteurrena betetzen den honetan, mezu hori zabaltzeko asmoarekin ekitaldi ugari egingo dira gaur eta inguruko egunetan munduko hainbat hiritan, batez ere euskal Diasporak presentzia duen lekuetan. Horietako bat izango da Mexiko hiria: gaur DFko Euskal Etxean bonbardaketari buruzko erakusketa inauguratuko du Julian Celaya Euskal Gizataldeekin Harremanetarako zuzendariak.
2012/04/26
Iaz lehendabizikoz egin zuten bat Boiseko euskaldunek Euskal Herrian AEKak antolatzen duen Korrika lasteketarekin. Bi urtean behin egiten da Korrika ofiziala, baina boisetarrek urteroko ekitaldi bihurtu dute euren lastekertatxoa, eta larunbat honetan berriz ere aterako dira hiriko kaleetan zehar arineketan. Ekitaldi garrantzitsua da hau Estatu Batuetako euskaldunentzat; izan ere, jarduera honen bidez lortzen duten dirua AEBetako euskara ikasleen trebakuntzan laguntzeko erabiltzen da. Hori dela eta, korrikalariei dei egiten die Ipar Amerikako euskal etxeetako Euskara koordinatzaile Izaskun Kortazarrek: animatu eta parte har ezazue!
2012/04/26
Urtero sasoin honetan antolatzen du Euskal Venezuelarren Elkarteko buru den Amaia Zenarutzabeitiak herrialde karibetar honetako euskaldunen Euskal Herriko urteroko bilera. Aurtengoa, 17.a, joan den larunbatean egin zen Galdakaon, eta hirurogeita hamarretik gora pertsona bildu zituen herriko Batzokiko jatetxean. Bertaratutakoek omenalditxoa eskaini zioten partaide zaharrenari, 88 urteko Amaia Renteriari, Bengoaren alarguna bera, 'eguzkilore' bat kolkoan ipinita. Bilerako gazteena, Julen Burgaña Elgezabal izan zen, bi gurasoak Venezuelan jaioak, bertara ama Kattalinekin agertu zena. Kantu venezuelarrik entzun zen bazkalostean, eta baita Txoria Txori ere.
2012/04/26
Estatu Batuetan ere izan zuen oihartzunik Aberri Egunerako deialdiak, nahiz eta Diasporako beste hainbat lekutan bezala, kasu askotan ez Berpizkunde igandean bertan, astebete edo bi aste ondoren baizik. Eman genuen zegokionean New Yorkeko aurtengo Aberri Egunaren berri, eta oraingo artikulu honetan beste hiru euskal etxe estatubatuar gehituko ditugu, argazkiak eta lekukotasuna bidali baitizkigute bertatik, Washington hiriburutik, Miamitik eta Las Vegasetik.
2012/04/26
Esker mila EuskalKultura.com-era munduko euskal etxeen Aberri Eguneko jaien irudiak eta kronikak bidaltzen ari zaretenoi. Apurka-apurka horien guztien berri ematen ari gara, eta, oraingoan, Venezuelako hiru euskal etxeetako ospakizunak bildu ditugu. Caracasetik, bertako Eusko Etxeak argitaratzen duen Jazoera buletina medio, hiriburuko, Valencia-Caraboboko eta Barcelona-Anzoateguiko jaien berri dakargu. Bidenabar, parada Jazoera zoriontzeko baliatu nahi dugu, bere lehenengo urtea bete berri baitu Pedro Arriaga Aguirre buru duen albistari digitalak. Indar eta taupada bereziz bizi izan dute historikoki Venezuelako euskaldunek euskal nazioa ospatu eta aldarrikatzea helburu duen Aberri Eguna.
2012/04/25
Poloniako Poznan hiriko Adam Mickiewicz Unibertsitatean udaberriko hitzordu klasikoa bihurtu dira jada Euskara eta Euskal Kultura irakurlegoak urtero antolatzen dituen Euskal Jardunaldiak. Aurtengoek Euskal Herritik etorritako lagunen ekarpen garrantzitsua izan dute; izan ere, Harkaitz Cano eta Rikardo Arregi idazleek eta Jabier Muguruza eta Mikel Azpiroz musikariek emanaldiak egin dituzte. Aipagarria da baita ere ikasleen parte hartzea, adibidez Sarrionandiaren "Hitzen Ondoeza" lanean oinarrituriko antzezlana taularatuz. Amaia Donés euskara irakurleak bidali dizkigu jarraian argitaratzen ditugun argazkiak. Milesker eta bejondaizuela!
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
