euskal diaspora eta kultura
2012/07/26
Zaila da ‘joatea’ edo ‘bueltatzea’ den jakitea. Nola asmatu bi herriak beren lekuak munduan baldin badira. Betty Paris eta Alberto Ospital Argentinan jaiok dira; baina euren gurasoak Euskal Herritik heldu ziren Ameriketara, bizitza hobearen bila. Euskal sentimentua transmititu zieten bezala, herrimina ere utzi zieten eta atxekimendua, eurena ere baden Pirineo magaletako munduari. Seguruenik horregatik Euskal Herrira bidaiatzea etxetik etxera joatea bezala da lagun hauentzat. Igandean abiatuko dira Betty eta Alberto, bidaia, gainera, Buenos Airesko Eusko Kultur Etxeak 2010ean egin zuen zozketan irabazita, laguntza-bonoak erosi zituztelako.
2012/07/25
Liman, bertan duela 400 urte sortu zen Arantzazuko Amaren Kofradia, hainbatentzat Diasporako euskal elkarterik zaharrena dena, berpiztu egin du sustatzaile talde batek, eta izaera ofiziala eman zion pasa den otsailaren 13an, bere eraketa-eskritura publikoa erregistratuz, beti ere aurten betetzen ari den laugarren mendeurrena gogoan eta hori ospatzeko ekitaldi sorta berezi bat antolatzen ari direla datorren azaroan gauzatzeko, ekimenen artean Gernikako Arbolaren kimu baten landaketa. Kofradia berrabiatzea egungo euskal etxe baten tankeran gauzatu nahi omen du talde eragileak, eta Limako Klub Nazionalean eginiko ekitaldira jatorriko euskalduneko zenbait enpresari bildu zituzten. Guztiaren asmoa, XVII. mendean jaio eta 1865ean gobernu perutarrak itxi eta ondasunak ongintza publikoari pasatu zizkion arte funtzionatu zuen Limako euskal erakunde hau behar bezala ohoratzea omen da, adierazi dute eragileek.
2012/07/25
Jakina denez, leku berezia du Iñaki Deuna edo San Inazio jaiak Diasporako instituzio askoren egutegietan eta urtero bezala 2012 honetan ere ehunka gonbidatu bilduko dira euskal etxeetako aretoetan janari eta ardo onez bustitzeko asmoz. Erakunde batzuetan, proposamen bat baino gehiago gauzatuko dira, hala nola elizkizunak, dantza emanaldiak edo kontzertuak. Hitzorduak abuztuan zehar burutuko dira gehienbat, uztailaren 28an hasiz Necocheako Euzko Etxea-ren eskutik. Necocheaz gain, hona Buenos Aires, Chascomus, Arrecifes, La Plata, Villa Maria eta Comodoro Rivadaviako euskal etxeetatik heldu zaizkigun gonbidapenak. Jai, ordea, beste zenbait herrialdetako euskal etxeetan ere ospatuko da, tartean Uruguai, Txile, Espainia, Mexiko, Uruguai eta Venezuelan.
2012/07/24
Angeluko Ibaialde elkartea eta Quebec-eko Euskaldunak euskal etxea buruz-buru ari dira lanean Indianoak 2013 espedizioan. Urte bete barru, 2013ko ekainean, quebectarrek eta euskaldunek osaturiko traineru batek San Lorenzo ibaian gora 500 kilometroko bidaia egingo du, Trois Pistoles-etik Montrealeraino, XIV. mendeko baleazaleek bezala. Bidean hamabi geldialdi egingo dituzte eta horietan euskal kultura, musika eta gastronomi trukeak egingo dituzte quebectarrekin. Quebec-eko Euskal Etxeko presidente Adelaide Daraspek eman digu proiektuaren berri.
2012/07/24
500 urte beteko dira bihar Nafarroako Erresumari eraso eginez Gaztelako tropak Iruñea hartu zutenetik Nafarroako Erresumaren konkistari ekinez, erresuma nafarraren desagerketa izaki independente gisa ekarriko zuen erasoaldiaren barne. Orduan gertatutako gertakariak gogoan Nafarroan zein Diasporan zehar ekitaldiak antolatu dira egunotan eta urte osoan zehar, gertatutakoei ikusmolde ofizialistatik begiratuz edota ikuspuntu kritiko eta aldarrikakorretik so eginez, esan nahi ados Nafarroak geroztik egin duen ibilbidearekin edota kritikatuz orduango indar-ekitaldia eta independentzia nafarraren galera. Argentinatik, 'Navarra: la conquista' dokumentalaren emanaldia iragartzen dute gaur arratsalderako Chascomuseko Euskal Etxetik, Cesar Arrondok garai haren testuingurua eta ezaugarriak aipatuta.
2012/07/24
Ezohiko 'topaketa' bat egin zuten joan den ostiralean Buenos Aireseko Euskaltzaleak elkarteko kideek. Argentinan ‘Lagunaren Eguna’ ospatzen zen eta bost lagunek hitzaldi bat eman zuten euskaltegiaren egoitzan. Ez ziren nolanahi aukeratutako boskotea, duela hamar bat urte Buenos Airesen euskara ikasten hasitako jendea baizik, ikaskideak izanda Euskal Herrira elkarrekin joatea erabaki zutenak. Behin egin zuten, duela bost urte, eta oraingoan, bigarrenez, joan den ekainaren 12an, Roberto Aguirre, Andres Jaunsolo, Sylvia Saenz, Carlos Saharrea eta Elsa Usandizaga euren arbasoen lurrerara abiatu ziren hiru asterako. Buenos Airesera bueltan euren bidaia kontatu zuten, "izugarri ona", eta euskarari egozten diote erruaren zati handi bat.
2012/07/23
Caracaseko Euzko Etxeak ekainean eta uztailean egin dituen jardueren berri ematen du Jazoera buletinaren azken alean. Bi hilabete oso biziak izan dira eta ekintza eta jai ugari egin dira bai Caracasen eta baita Caraboboko eta Puerto La Cruzeko euskal etxeetan ere. Amatxuen jaia, San Juanak, San Ferminak (zezen eta guzti)... horien guztien berri dakar Jazoerak, eta orain, gainera, sarean irakur daiteke, Caraboboko Euskal Etxearen webgunean.
2012/07/23
'Gernikako Arbola' izeneko lehiaketan parte hartzera gonbidatu du Buenos Aires probintzian Chivilcoy-ko Beti Aurrera euskal etxea argentinarrak. Idazlanei dagokienez, poesia generokoak izan behar dira eta gaia, librea, Gernikako Bonbardaketarena barne. Lanak bidaltzeko epea abuztuaren 31an bukatuko da eta irabazleak 500 pesoko diru-saria jasoko du. Lehiaketaren berriaz gain, Beti Aurrera-ko lagunek jakinarazi digute joan den uztailaren 7an erakundearen urtemuga eta Sanferminak ospatu zituztela. Argentinako Independentziaren Eguneko herriko ekitaldietan ere altxatu zuten ikurrina Chivilcoy-ko euskal etxeko ordezkariek.
2012/07/20
Batel baten eraikuntza da "Gu Itsasoa"-ren abiapuntua eta, bertatik hasita, erakusketa honek itsasoak eta arrantzak Euskal Herri osoan --hala kostaldean zein barnekaldean-- izan duen eragina aztertzen du. Iraila bitartean Zeraingo Herri Musoean egongo da, baina gai honetan sakondu nahi duenarentzat erakusketari buruzko webgunea sareratu dute arduradunek, euskaraz eta gaztelaniaz. Euskal portuak, ontzigintza, ontziak egiteko erabiltzan zen zuraren industria, euskaldunen eragina munduan, itsasbideak, itsasgizon ospetsuak... gaiari buruzko ikuspuntu osatu eta berri hau internet bidez iker daiteke webgunean.
2012/07/20
Beti 'euskal mamiari' eutsiz, adin eta interes guztietako jendearentzako proposamenak eskaintzen dizkio Entre Rios probintziako Paranako Urrundik euskal etxeak bere inguruko komunitateari. Komunitatean, gainera, oso harrera ona izaten dituzte euskal erakundeak luzatzen dituen gonbidapenek eta elkarteak antolatutako ekitaldiak oso jendetsuak suertatu ohi dira. Honen adibide on izan daitezke 'Jose J. Echeverria' Xake Txapelketa eta ‘Marta Stutz’ antzezlana bera. "Xake lehiaketan hirurogeitik gora jokalarik hartu zuten parte; eta gure antzerki taldearen azkeneko emanaldian antzokiko platea beteta zegoen”, adierazi digute Urrundik-eko arduradunek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
