euskal diaspora eta kultura
2012/09/26
Concordiako euskal etxetik, Entre Rios probintzia argentinarrean, zorionak ematea eskatzen digute --eta hala egiten dugu-- bertako Immigrantearen Jai Probintzialean euren ordezkari lehiatu zen 18 urteko Sofia Niez Rousset gazteari, izan ere jai horretako Lehenengo Printzesa hautatu baitzuten, erregin koroa eskuratu zuen italiar gizataldeko ordezkari Daniela Estevez Benazzorekin batera. Lerro hauen bitartez, zorionak Sofiari. Aurretik ere Concordian erregin edo ohorezko aipudun izendatu dituzten euskal ordezkarien ildoari eusten dio, Maria Milagros Castañeda, Gimena de Ibarra, Nerea Gonzalez Ovcharenko edo Maria Pia Mario-Hirigoyen adibide.
2012/09/25
Gipuzkoako Tolosaldeko zazpi enpresa dira Mexikon barrena ekarri dituen bidaia honetan ari direnak, atzotik hasita datorren ostiralera arte, 'Tolosaldea Garatzen' erakundeak antolaturik eta Euskadiren Mexikorako Bulegoa lankide. Bisitariak Mexiko Hiriburuan eta Monterreyn izango dira batez ere, baina enpresetako batzuk Guanajuato eta Hidalgora ere joango dira. Espediziokideak Mexikoko euskal enpresariak batzen dituen Emprebask elkarteko ordezkariekin ere bilduko dira eta baita Espainiako Enbaxadako Bulego Ekonomiko eta Komentzialeko kideekin ere.
2012/09/25
Amaitu berria da Sao Pauloko Eusko-Brasildar Etxearen bigarren Euskal Astea, eta bertan bizitakoarekin oso pozik agertu dira bai antolatzaileak eta baita Bizkaiko zein Argentinako bisitariak. Argentinatik Villa Mercedeseko Euskal Etxeko ordezkaritza bat izan zen Sao Paulon Camerata de la Luna abesbatza ere tarteko. Bizkaitik, Foru Aldundiko eta Bilboko Udaleko ordezkaritza bat etorri zen, eta eurekin batera euskal astean parte hartu duen sukaldari talde bat. Itxiera afaria beraiek prestatu zuten.
2012/09/25
Amaitu da Peruko hiriburuan ikusgai izan den Gernikako Bonbardaketaren 75. urteurreneko erakusketa eta Limako Euskal Etxeak jardueraren balioespen baikorra egin du. Euskadiko ordezkaritzarekin lankidetzan antolatu zuen euskal etxeak erakusketa eta bisitari ugari izan ditu. Inaugurazio ekitaldian euskal komunitateko kideak eta Limako kultur eta politika alorreko lagun asko bildu ziren. Hunkituta entzun zuten aspaldi Perun bizi den Jon Guarrochena euskaldunaren kontakizuna: bonbardaketan egon zen hiru urte baino ez zituela eta gertaerak bere familiaren bizitzan marka latza utzi zuela aitortu zuen.
2012/09/25
Iraileko lehenengo bi asteetan garatutako ekimenen artean, Mariana Fernandez Castelli irakasleak emaniko hitzaldi bat azpimarratu du Buenos Aires probintzia argentinarreko Jose C. Paz herriko Toki Eder Euskal Etxeak. Atseginez segitu zuen hitzaldia publikoak eta biziki eskertu zizkion Fernandez Castelliri emaniko azalpenak. Toki Ederren bertan eta beste hainbat euskal etxe eta forotan ibilia da Fernandez Castelli hizlari, euskal gaiak ardatz harturik. "Eskerrik asko, Mariana" hitzekin bukatzen duen idazki bat bidali digu horretaz Toki Eder Euskal Etxeak.
2012/09/24
Tarteka eguraldia alde egon ez bazen ere arrakastaz bururatu da Rawson-en, Andepeko San Juan probintzia argentinarrean, bertako Liburuaren eta Kultura Herrikoiaren Azokaren laugarren edizioa. Probintzia osoko liburudenda, argitaletxe, unibertsitate, elkarte, erakunde eta liburutegi herrikoiak partaide, San Juango Eusko Etxea ere bertaratu zen stand propioz eta izan ere Juan Carlos Gioja intendentearen bisita ere jaso zuen, euskal elkarteko Ofelia Larrea lehendakaria eta Ofelia Larrea lehendakari ohiak abegikor errezibitu zutela. Bestalde, euskal etxeak EuskalKultura.com eskaintzen dion aukera baliatu nahi du San Juango Diputatu Ganbaraburu Sergio Uñac-ek 'Malvina, su historia, San Juan, sus héroes' liburua oparitu izana elkarteko liburutegiari.
2012/09/24
AEBetako euskal etxeen federazioak (NABO) eta Euskara Munduan programak antolatuta, euskara irakasleen lantegia egin zen irailaren 15 eta 16ean Boisen, Idaho estatuan. Lantegian Homedale, Boston, San Frantzisko, Boise eta Bakersfieldeko irakasleek parte hartu zuten, NABOko Euskara koordinatzaile Izaskun Kortazarrekin batera. Taldean izan behar zuten beste bi irakaslek --Elkoko Anita Franzoiak eta Rhode Island-eko Jorge Ochoa Garayk-- 'kale' egin zuten, egunotan Euskal Herrian direlako Gaztemundu programaren barruan ikastaro berezia egiten.
2012/09/24
Euskaltzale talde batek elkarte berria sortu du Polonian, herrialde honen eta Euskal Herriaren arteko hartu-emanak laguntzeko asmoz. Polonian Euskal Herriarekiko eta euskal kulturarekiko interes handia dagoela diote, eta gauzak egiteko gogoa ere bai, baina horiek bideratzeko elkarte ezagatik ezerean gelditu izan direla sarri. Arazoari irtenbidea emateko, GU Elkartea sortu dute eta bertan parte hartu nahi duen orori euren Facebook-eko orriaren bidez harremanetan jartzeko gonbitea luzatzen diete.
2012/09/21
Hondarreko urteotan urtero bildu dira, bilkura handian, Estatu Batu mendebaldean artzain ibili zirenak. 2012ko hau zazpigarren aldia dute eta orain artean Lesaka, Aldude-Gernika, Elizondo, Auritz, Sunbilla eta Eugi-Zubirin elkartu ondoren, honako edizioan hitzordua Iruñerako paratu zen eta hara bildu dira joan den asteburuan euren bizitzan urte gehiagoz ala gutxiagoz Ipar Ameriketan artzain lanetan ibilitakoak. 'Euskal Artzainak Ameriketan' elkartea antolatzaile eta Iruñeko Udala eta Nafarroako Gobernua --lehendabizikoz-- laguntzaile, bertaratutakoak egun goxoa pasatu dute, "Ameriketan eman genituen urteak gogoan, gure bizitza eta eskarmentuko parte baitira, eta baita gure eskualdeetakoa ere", azpimarratzen dute, AEBetarako emigrazio honek izan zuen garrantzia aldarrikatuz. Datorren urtekoa Arnegin izan daitekeela eman da aditzera.
2012/09/21
Datorren irailaren 28an egingo da Donostian "Agur esatea - To say goodbye" dokumentalaren estreinaldi mundiala, eta bertan izango dira filmean agertu gabe protagonista direnak: Ingalaterran gelditu ziren gerrako haurrak. 1937an 4.000 ume heldu ziren Southamptongo portura gerratik ihesi, gurasoak Euskal Herrian utzita. Gehienak handik bi urtetara bueltatu ziren, baina 200 bat ez ziren sekula itzuli eta Ingalaterran gelditu ziren. Dokumentalak haur --gaur egun aiton-amona-- horien ahotsak baliatzen ditu, animazio bidez euren istorioa gaur egungo gazteei azaltzeko. Izaskun Arandia filmearen produktoreak eman digu filmearen berri.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
