euskal diaspora eta kultura
2012/10/08
Herrien arteko harremanak sendotzen dituzten bi ardatz hartuz, Mendoza hiriko Udalak bertako kanpoko gizataldeak batu zituen Turismo Nazioarteko Eguna ospatze aldera. Festa iraileko azken asteburuan gauzatu zen eta milaka lagun bildu zituen hiru egunetan zehar. Euskal kolektibitatea ere izan zen jai honen protagonista eta Denak Bat euskal etxeak muntatutako standean Euskal Herriko zapore eta soinu tipikoak ezagutu ahal izan zituzten bisitariek. Turismoaren Nazioarteko Eguneko jaian izandako arrakastak bultzaturik, Denak Bat-ekoek Guaymallen herriko Gizataldeen Azokan ere hartu dute parte joan den asteburuan.
2012/10/05
Ikusgarria, dagokion abentura eta arrisku puntu bizigarriarekin gainera, horrelakoa izan zen Caracaseko Eusko Etxeko mendi taldeak iragan irailaren 29an egin zuen txangoa. Bi mendi-gidarien laguntza izan zuten euskal-venezuelar mendizaleek igoeran. Jomuga, Paurario izeneko mendia zen: 1060 metroko altuera du, baina oso bertikala da. Igoeran bista zoragarriekin gozatu zuten mendizaleek, eta sustoren bat edo beste ere izan zuten, batez ere metalezko eskaileratan gora. Pedro Arriaga, elkarteko presidentea, bertan izan zen eta eguneko argazkiak eta kronika helarazi dizkigu, gure irakurleekin partekatzeko. Sarean argazki erreportai zabala argitaratu du.
2012/10/05
Argentinako Mar del Plata herrian bilkura berezia egingo da igande honetan: Arrachea-Arrechea familiaren hirugarren topaketa. Baztandar jatorria du familiak, baina Argentinan errotu zen XIX. mendean, hara emigratu zuten bi anaiei esker. Harrezkero ondorengoak hainbat herrietara zabaldu dira: Gral. Madariaga, Balcarce, Maipu, Adolfo Gonzalez Chavez, Labarden, Pergamino, La Plata, Buenos Aires, Tandil, Guamini eta beste asko. Familia 2010ean bildu zen lehen aldiz, eta esperientzia hain izan zen aberasgarria aurten hirugarrengoz bilduko direla.
2012/10/05
Bizi-bizi dabil azken asteetan Zingirako Euskaldunak elkartea eta horrela jarraitzeko asmoa dute gainera datozen asteetan, Chascomuseko elkarteak aurkeztu duen agendaren arabera. Hasteko, bihar elkartearen 22. Euskal Jaia ospatuko dute, eta datorren astean euskal sukaldaritza, literatura eta Immigrantearen Eguneko ekitaldiak egingo ditu elkarteak. Horrez gain, irailean egin berri dituen jardueren berri eman du elkarteak: Genero Indarkeriari buruzko Mahaiaren bilera, FEVAko Pilota lantegian partehartzea eta Macachingo Mus Txapelketan partehartzea (Chascomuseko Juan B. Mutuberria eta Luis Moreno izan ziren garaile, gainera!).
2012/10/05
Harrituta geratzen dira askotan Europako euskaldunak Diasporako lagunek euskal kulturaz dakiten guztiaz ohartuta. Historian, geografian, musika eta dantzetan, politikan… gai ugaritan daude jantzita euskal gizataldeetako kideetako batzuk; batzuetan, gainera, bertan inoiz egon gabeak izanda. Baina fenomeno hau ez da kointzidentzia hutsa. Badaude Atlantikoaren alde honetan euskal kulturaren presentzia bermatzeko lan handia egiten duten erakundeak eta honen adibide ona da Buenos Airesen hogei urte bete berri dituen Iparraldeko Euskal Etxeko Kultur Azpibatzordea. Hona bere historiaren laburpena.
2012/10/04
Euskal Herriak eta euskarak presentzia izango dute aste honetan Mexiko Hiriko Centro Cultural del Bosque delakoan egiten ari diren Antzerki-Liburuen 2012ko Azokan. ArtezBlai euskal argitaletxeak eta Yorick liburudendak elkarrekin ezarri dituzten bi standetan euskarazko zein gaztelaniazko testuak aurki daitezke eta datorren igandean bi euskal testuren irakurketa antzeztua egingo da, euskaraz bata, Aizpea Goenagarena, eta gaztelaniaz bestea, Goenaga bezala idazle eta antzezle donostiarra den Teresa Calorena, Mexikoko Euskadiren Bulegoaren eta Etxepare Institutuaren sostenguaz.
2012/10/04
Pozik da Oier Araolaza, Dantzan.com sustatzaileetako bat, webgune honen itzulerarekin, eta batez ere, itzulera hori posible egin duen sostengu kanpainarekin. Euskal Herriko dantza talde eta dantzariez gain, Diasporakoek ere parte hartu dute kanpainan eta Zortzigarren Herrialdea delakoak dantza munduari egin dion ekarpena aipatzen du: "Hemen galtzen ari diren gauza batzuk Diasporan ari dira mantentzen eta badira han hemengoak bezain gogotsu eta zorrotzak diren taldeak. Haiek hona begira izan dira beti, baina agian bada garaia Euskal Herritik ere hara begira hasteko".
2012/10/04
2001ean jarri zuten abian Euzkal Etxea euskal etxeko arduradunek ‘Etxe Nasaia’ programa. Proiektuak bi helburu zituen: krisi ekonomikoaren ondorio larriak eskola-umeen artean leuntzen saiatzea eta, aldi berean, euskal etxearen eta gizartearen arteko lotura sendotzea. Helburuak ondo asko bete dira eta aurten hamar urte egingo ditu San Nicolaseko euskaldunek bultzatutako ekintza solidarioak. Ospatzeko, ‘Etxe Nasaia’ren edizio erraldoia antolatu dute euskal etxeko kideek urriaren 24 eta 25ean. Gonbidatuen artean, Juan Jose Ibarretxe lehendakaria nabarmentzen da, hitzaldi bat eskainiko baitu, propio gonbidatuta, 24an, asteazkenez, iluntzeko 8etan, bertako Abokatuen Elkartean.
2012/10/04
Poz-pozik itzuli dira, euren bidaia eta partaidetzaren balantze ezinhobea eginez. Villa Mercedesko Euskal Etxeak eta hari atxikitako Camerata de la Luna abesbatzak hitz gozoak baino ez dituzte Sao Paulora egin berri duten bidaiaz, bertako Eusko-Brasildar Etxeak antolatutako II. Euskal-Brasildar Astean parte hartzeko. Euskal Etxearen izenean, Julio Esnaolak hitz hauekin laburbildu dio bizitutakoa EuskalKultura.com-i, "todo salió de maravilla" (guztia primeran joan da). Korukideek zenbait emanaldi eskaini zituzten, horietan azkena, igandean, Sao Pauloko katedralean, bertako kardinal apezpikuak emaniko mezan, eta ondoren ere, kardinala entzule. Orain, urriaren 26an El Circulo antzokian, Rosarioko Euskal Aste Nazionalaren baitan izango duen partaidetzari begira ari dira villamercedestarrak.
2012/10/03
Urriaren lehenetik, aurrera ari da New Yorken "Basque Cultural Exchange", Etxeorratzen Hiriko publikoari Euskal Herria eta bere kultura garaikidearen ekarpenen haritik elkarrekin zenbait gogoeta egitea proposatzen dion ekimena, Etxepare Euskal Institutua antolatzaile eta kultur erakunde honek iaz New Yorken estreinatu zuen Bernardo Atxaga katedraren eskutik. Astelehenean zabaldu zituen ateak katedraren aurtengo edizioak, ondoren mahai-ingurua egin zelarik "Gernika, revisited" gaiaz. Ekitaldiak urriaren 13ra arte segituko dute City University of New York-en (CUNY), New York University-n (NYU), Anthologhy Film Archives-en eta New Yorkeko Cervantes Institutuan. Gaur 'The Bombing of Gernika' erakusketa zabalduko dute.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
