euskal diaspora eta kultura
2012/10/11
Noka taldeak --hiru emakume dira partaide, Catherine Petrissans Parker, Andrea Bidart Oteiza eta Begoña Echeverria-- kontzertua eman zuen iragan ostiralean Oregonen eta emanaldi horrekin abiarazi zuen udazkenean AEBetako euskal etxeetan egiten ari den bira. Ontario Basque Club-en izan zen emanaldia eta elkarteko bazkide kopuru polita bildu zen. Taldeak giro ederra sortu zuen eta entzuleak kantuan jarri zituen euskaraz. Biharamunean Idahoko Mountain Home-en jo zuen Nokak. Taldeak bihar ekingo dio berriz ere birari, Kaliforniako Stanford Unibertsitatean emango duen kontzertuarekin. Etzi, berriz, NABOk urtero antolatzen duen Kantari Egunean arituko da, Rocklingo Iparreko Ibarra euskal etxearen eskutik.
2012/10/10
Larunbatean abiatuko da Poznanen "República Femenina" (sic) izeneko jaialdiaren hirugarren edizioa, eta hiriak hainbat lantegi, hitzaldi eta kontzertu hartuko ditu hilaren 21a bitartean. Aurtengo egitarauan Euskal Herriak leku zabala izango du, Katalunia, Andaluzia eta Mexikorekin batera. Hilaren 16ean Napoka Iria bikoteak kontzertua emango eta 18an Amaia Donés Poznango Adam Mickiewicz Unibertsitateko euskara irakurleak “Euskal kultura emakumeen ikuspuntutik” hitzaldia eskainiko du.
2012/10/10
Eusko Jaurlaritzako Kanpo Harremanetarako Idazkaritza, Gernikako Bakearen Museoko Fundazioa eta Buenos Airesko Euskadiren Ordezkaritzaren lankidetzari esker, apiriletik hona ‘Gernikako Bonbardaketa, 75 urteurrena’ erakusketa Argentinako hainbat hiritan ikusi ahal izan da, tartean Buenos Aires hiriburuan, Marcos Pazen eta Rio Cuarton. Datozen hilabeteei begira, ibilbidea zabalduko da eta Mar Chiquita-ra, Azul-era eta Olaverriara iritsiko da. Hil honen amaieran, berriz, Paraguaiko Euskal Astean ere inauguratuko da eta 2013an zehar bertako hiri askotan erakutsiko da. Abenduan, ordea, Uruguaiko Salto hirian egongo da ikusgai hamar egunez.
2012/10/10
Frantziako ordezkari Regis Lavie eta Rodolphe Bidart muslariek irabazi zuten irailaren ondarrean jokatu zen Euskal Gizataldeen XXXV. Munduko Mus Txapelketa. Vancouverreko Zazpiak Bat Euskal Etxea izan zen aurtengo edizioaren antolatzailea eta txapelketa Vancouver-tik Alaskarako itsasbidaia egin zuen kruzero batean jokatu zen, irailaren 21etik 29ra. Argentina eta AEBko bikoteek eskuratu zituzten bigarren eta hirugarren postua, hurrenez hurren.
2012/10/09
Iragan igandean Amerikanoen urteroko bazkariaren edizio berri bat egin zen, oraingoan Nafarroa Beherako Arrosa herrian. Ehun lagundik gora bildu ziren bertara; batzuk AEBetan lan egin ostean Euskal Herrira itzuli diren euskaldunak, eta beste zenbait bisitan etorri ziren euskal-amerikarrak. Bertan izan zen ere Ainara Puerta Larrañaga historialaria eta berak idatzi du jarraian argitaratzen dugun kronika. Puerta euskal emigrazioa eta emigranteen itzulerari buruzko lana egiten ari da (e-Etorkinak), Deustuko Unibertsitateko Pedro J. Oiarzabal eta Nerea Mujika zuzendari [kronika EuskalKultura.com-ek euskaratua].
2012/10/09
HABEko teknikari Kinku Zinkunegi Hegoameriketan da egunotan, zenbait herrialde latinamerikarretan ematen diren euskara eskolei jarraipena egiteko. HABEk, Euskara Munduan programaren bidez, hitzarmenak ditu Brasil, Txile, Uruguai eta Argentinako euskal etxeekin eta elkarte horietako irakasle eta zuzendariekin biltzen ari da egunotan Zinkunegi. Bidaiaren helburu nagusia, hala ere, Buenos Airesen egingo diren euskara egiaztatze-frogak kudeatzea da. Aurten lehen aldiz egin ahalko dira froga hauek Argentinan eta, arduradunen esanetan, euskara irakaskuntza programan aurrerapauso handia da hori. Iragan larunbatean, Sao Paulon, Eusko Brasildar Etxeko arduradunekin bildu zen HABEko teknikaria eta atzo Txileko Santiagoko Euzko Etxean izan zen. Gaur Txileko beste bi elkartekin bilduko da eta bihar eta etzi Uruguaien izango da. Ostiralean Argentinara helduko da, asteburuan Buenos Airesen egingo diren frogak koordinatzeko.
2012/10/09
Hamabost egun inguru falta dira Argentinako Euskal Aste Nazionala has dadin eta urtero bezala lagun ugari bilduko dira, aurten Rosariora, euren euskaltasuna ospatzeko. Jakina denez, Mendeurrena ospatzen du aurten Rosarioko Zazpirak Bat euskal etxeak eta ospakizunen barrura ekarri dute bertakoek Argentinako euskaldunen urteko elkarretaratze handiena den hau. Baina Euskal Aste Nazionala euskaldunen jai nagusia bada ere, iaz Argentinako hiriburuan sortutako ‘Buenos Aires celebra al Pais Vasco’ delako jaialdiak askoren ninietan segitzen du baita ere. Buenos Aires Udalak antolatutako ekimen honek euskal gizataldeko ordezkariak ez ezik, milaka eta milaka buenosairestar ere batu zituen hiriko Mayo Etorbidera. Aurretik argitaratutako irudien osagarri ekarri ditugu hona argazki berriok, Argentinako euskal taupaden erakusgarri.
2012/10/08
Euskal kulturak, zinemak eta historiak aparteko lekua izan dute egunotan New Yorken, Etxepare Euskal Institutuak antolatu duen "Basque Cultural Exchange-Fall 2012" programari esker. Hasteko, urriaren 1etik 5era Josean Fernandez Euskadiko Filmategiko zuzendariak euskal zinemari buruzko ikastaroa eman zuen City University of New York-eko Bernardo Atxaga katedran. Horrez gain, Imanol Uribe zuzendariak bi luzemetraia aurkeztu zituen eta atzo zinea eta guda zibilari buruzko zikloa jarri zen abian. Ekitaldiek astean zehar jarraituko dute.
2012/10/08
Mugimendu eta higidura, ekimen, kezka eta gauzapen handiko euskal etxea da Corpus Christiko Eusko Etxea, inguruan duen gizartearekin eta beharrean daudenekin solidario eta sentibera; bitarteko aldetik apaltasunez baina emeki hainbat ekimen xehe baina ekarkorrez ari dena, Buenos Airestik urrun eta natura eta oihanean kokatua den Misiones probintzian, Iguazuko urjauzietara datorren turismoa diru-sarrera nagusia duen Argentina iparraldeko probintzia xehe honetan. Berripapera, honela, euskaraz, du izena elkartearen buletinak, bertako euskaldunen engaimendu bikoitzak eragindako ekintzen berri ematen duena, euren euskal kultura eta jatorriarekin bezain konpromiso sendoa baitaukate bertako eusaldunek txertatuta dauden errealitatearekin eta bertako gizarte eta kultur arloko aurrerapenarekin. 56. zenbakira heldua da irailean Berripapera.
2012/10/08
New Yorkeko Euzko Etxeak Mende bat beteko du datorren urtean eta buru-belarri dabiltza bazkideak 2013an zehar egingo diren ekitaldiak antolatzen. New Yorkeko elkartea AEBetako euskal etxe aitzindaria da, eta urte luzez Euskal Herritik herrialde honetara etorri ziren euskaldunentzat lehen harrera-leku eta laguntza-gunea izan zen. Mendeurrena merezi bezala ospatu nahi dute New Yorkeko euskaldunek eta hasiak dira jada ekitaldien antolakuntzan. Irailaren 22an Fundraising Gala egin zuten, 2013an zehar egingo diren ekitaldiak antolatzen laguntzeko dirua biltzeko, eta urtebeteren buruan egingo den Mendeurreneko Gala bitarteko ekitaldi programaren hasiera markatuz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
