euskal diaspora eta kultura
2013/10/29
Unai Lauzirika lekeitiarra Alemanian bizi da orain dela zenbait urte eta, Berlingo Euskal Etxeko zuzendaritzako kide izateaz gain, Leipzigeko Unibertsitatean Euskara eta Euskal Kultura irakurlea da. Ikastaroa abian jartzeko ardura izan zuen iaz, eta hasieratik espero baino ikasle gehiagok izena eman zutela aipatu du. Horietako askok udan jarraitu omen zuten euskara eta euskal kultura ikastaroekin eta, aurten, irakurletza maila horretan mantentzea eta finkatzea da helburua.
2013/10/28
Elgoibarren jaioa, hamalau urte daramatza Alex Garatek Argentinan. 23 urterekin ezagutu zuen ‘munduko bazter hau’, Euskal Herriko Unibertsitatean Fisika Lizentziatura bukatzean, bere ikasketak jarraitzera Cordobako Unibertsitatera etorri zenean. Gradu ondokoa amaitu eta atzera Euskal Herrian bost urte eman ondoren, Cordobara bueltatzea ebatzi zuen, Unquillo herrian kokatzeko. Bigarren Hezkuntzan Fisika irakaslea, ‘Zingaros-New Gypsy Tango’ taldean akordeoilaria, eta mendizale amorratua… hau da Alex Garate, euskal etorkinetan bestelako profila.
2013/10/28
Udazkenak euskal hotsak ekarri ditu aurten Poloniara, Wroclaw eta Poznan hirietan egin diren zenbait kultur jarduera medio, Etxepare Euskal Institutuak lagunduta. Wroclaw-en, esaterako, Juan Kruz Igerabide, Elixabete Manterola eta Harkaitz Cano idazleek Wroclaw Short Story Festival delakoan parte hartu dute. Bestalde, Poznan-en Euskara eta Euskal Kultura irakurlegoaren ikasturteari hasiera emateko Weronika Nowak ikasle ohiak euskal kantu eta ipuin kontzertua eskaini zuen (ikus bideoa jarraian).
2013/10/25
Herrian oihartzun handia duten bi ekintza burutu dira hil honetan Chascomus-en. Batetik, Euskal Jaiaren XXIII. edizioa egin du euskal etxeak. Bestalde, Immigrantearen Eguna ospatu da Chascomusen, aurretik hasitako egitarau zabalago baten barnean. Zingirako Euskaldunak-eko arduradunek azpimarratu dute, bestalde, bertako Lorenzo Vazquez eta Estanislao Alfonsin kideek emaitza bikainak ekarri dituztela Uruguain bukatu berria den 22 urtez azpiko kategoriako Euskal Pilota Mundu-Txapelketan.
2013/10/25
Joan den astean bildu zen Villa Mariako (Argentinako Cordoba probintzian) Euzko Etxea euskal etxeko Ohiko Batzar Nagusia eta eguneko gaien artean, araudiaren arabera egin beharreko Zuzendaritza Batzordea osatzen duten zenbait karguren bozka burutu zuen,tartean ez lehendakaria bera, baina bai, esaterako, lehendakariordea. Kargu hortretan Gerardo Echeverriak hartu dio txanda Juan Francisco Pagolari, azken hau batzordekide ordezko delarik aurrerantzean. Gogoratu Villa Mariak hartu duela bere gain Argentinako 2013ko Euskal Aste Nazionala antolatzeko erronka, azaroko bigarren astean.
2013/10/24
NABOko lehendakari Valerie Arrecheak ohar bar eman du argitara gaur kaleratu den Astero astekarian, zenbait komentario eginez urriaren 12 eta 13ko asteburuan New Yorken hiriko euskal etxearen Mendeurrena zela eta gertatutako pasadizoaz. Gogora dezagun, bertan izan zela Arrechea NABOko lehendakari gisa, eta hala eman ziola harrera Urkullu lehendakariari Estatu Batuetako euskal etxeak elkartzen dituen erakunde horren bilerara New Yorkeko Eusko Etxearen egoitzan.
2013/10/24
Mallorcako Artea Euskal Etxea izan da aurtengo Europar Euskal Etxeetako Euskara Irakasleen Bilkuraren egoitza, urriaren 17tik 20ra. Topaketara honako elkarteetako irakasleak bildu ziren: Madril, Bartzelona, Valentzia, Mallorka, Brusela, Londres, Bordele, Paris, Erroma eta Berlin. Ezin izan zuten parte hartu, arrazoi desberdinengatik, Valladolid, Murtzia eta Paueko ordezkariek. Bileran aurtengo ikasturteari begira hainbat gai landu ziren eta, ikasleen parte hartzea dinamizatzeko proposamen berritzaile bat sustatzea erabaki zen: euskarazko film labur lehiaketak egitea. Bartzelonako eta Madrilgo euskal etxeetan arrakasta itzela du egitasmoak eta aurten beste elkarteetara ere zabaltzen ahaleginduko dira.
2013/10/24
'Etxe Nasaia' programaren aurtengo edizioak azken hamaika urtekoen helburu bera dauka, esan nahi baita San Nicolas hiri eta partiduko eskoletako umeei bazkari bat eskaini eta euskal kultura aurkeztea. Kasu askotan, arazoa da hiritik urrunxeago dauden herri batzuetako ikasleak ezin direla erdiguneraino mugitu; baina euskal etxeak irtenbide bat ere prestatu dio horri, eta elkarteko kideak mugitzen dira herri horietan ekitaldiak egitera. Horrela ume ugarik ezagutuko dituzte euskal etxe baten giroa eta euskal nortasunaren alde onenak. La Emilia eta Rojo herrietan burutu ondoren, hurrengo hitzorduak Campos Sallesen eta Conesan izango dira.
2013/10/23
Patagoniako Rio Negro probintzian, General Rocako Gure Etxea euskal etxeak hirian bertan ez ezik, eskualde osoan garatzen du Euskal Herriko ohitura eta tradizioak erakutsi eta hedatzen daraman lana. Irail eta urrian, antolatzaileek gonbidaturik, Lamarque eta Villa Regina herrietako Gizatalde Azoketan hartu du parte, bere dantzarien eskutik. Bere herrian ere burutzen ditu hainbat ekintza, tartean janari salmentak eta euskaldunentzat garrantzia duten jaien ospakizunak.
2013/10/23
Donostiako Ibaeta Abesbatzak bi emanaldi egingo ditu datozen egunetan Parisen, bertako Eskual Etxeko Gernika Abesbatzaren eta Anaiki Gizon Abesbatzaren zuzendari Jean Marie Guezalaren lankidetzarekin antolatuta. Bihar bertan abiatuko dira donostiarrak eta astelehena arte izango dira Parisen. Lehen emanaldia larunbatean egingo dute, Saint-Louis-en L'Île elizan, Nôtre Dame katedraletik gertu. Bigarrena igandean izango da, Asnières-eko Nôtre Dame du Perpétuel Secours elizan, Felix Ibarrondo musikagile oñatiarrak emango duen mezan. Bidaia amaitzeko anaitasun bazkaria egingo dute kantariek Anaiki eta Gernika abesbatzekin Eskual Etxean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
