euskal diaspora eta kultura
2014/01/24
Jakin nahi duzu euskarazko hitzak nola esaten diren ingelesez, italieraz, turkieraz, guaranieraz, kitxuaz, katalanez, errusieraz, txineraz edo beste hainbat hizkuntzez? Edo aukera eman nahi diezu hizkuntza horietako hiztunak izan daitezkeen zure lagun edo bisitariei euskarazko oinarrizko hiztegi bat ikas dezaten? Hori guztia eskaintzen du Hiztegitxoa.eu webguneak, inprimatzeko aukera ere barne, hizkuntza horietako 330 hitz erabilienei dagokienean. Bestetik, Kike Amonarrizi Sustatu.com-en irakurri diogunez, bada webgune europar bat, hitz bat ingelesez hautatu eta hitz horien kideak Europako hizkuntzetan ematen dituena, mapan, bakoitza mintzatua den eremu geografikoaren gainean.
2014/01/23
Joan den abenduaren 3an adierazi zioten Buenos Airesko Euskaltzaleak euskaltegiari Eusko Ikaskuntzak 2013ko ENE Saria eman ziola. Orduan adierazitakoa, datorren astelehenean gauzatuko da, Buenos Airesko elkarteak sariaren adierazgarri den estatuatxoa jasoko baitu Kinku Zinkunegi 'Euskara Munduan'eko koordinatzailaren eskutik. Ekitaldiaren aurretik hitzaldia eskainiko du Zinkunegik euskara eta Diasporaz, eta ondoren 2014ko bere lehenengo 'topaketa' egingo du Euskaltzaleak-ek, bazkide, ikasle eta lagunak partaide.
2014/01/23
Euskal kulturak apurka apurka bere lekua bilatu du Japoniako hiriburuan, Tokyoko Euskal Etxearen jarduera eta ekimenei esker. Urte honetan zehar hainbat egitasmo burutu ditu elkarteak eta horien balioespen baikorra egin du Sho Hagio kideak, EuskalKultura.com-ekin solasean. Urteko ekimen nagusienetako bat elkartearen webgunearen berritzea eta berrabiaraztea izan da: Fukushimako ezbeharraren ostean bertan behera gelditu zen aurrekoa, baina urriaz geroztik sarean da berriz Tokyoko Euskal Etxearen gunea.
2014/01/22
Euskal Herrian eginiko filmak, asko euskaraz, Bartzelonako zinematan ikusi nahi al dituzu? Bartzelonako Euskal Etxeak emango dizu horretarako aukera, urtero antolatzen duen Zinemaldiak pantaila handira jauzi egingo baitu aurten. Jaialdiaren arrakastak bultzatuta, antolatzaileek erabaki dute apustua egitea eta emanaldiak hiriko Girona zinematara ekartzea. Dena prest dago otsailaren 13tik 22ra Bartzelona euskal zinemagintzaren hiriburu bihurtzeko. Hala ere, euskal etxeak sostengu kanpaina jarri du abian, jaialdiak eragingo dituen gastuak ordaintzen laguntzeko, mikromezenazgo sistema baten bitartez. Lagundu ezazu, ahal duzun eran, eta sarrerak, opariak eta babesle estatusa lortu ahalko dituzu.2014/01/22
Oxfordeko Unibertsitateak Iberiar ikasketen 16. edizioa beteko du datorren martxoan eta bigarrengoz euskarak leku berezia izango du bertan, Etxepare Euskal Institutuaren laguntzari esker. Antolakuntzak gonbitea luzatu die txostena aurkeztu nahi duten hizkuntzalari eta adituei, euren proposamenak bidal ditzaten hil honetako 31 baino lehen. Aurtengo gaia “Kultur eta hizkuntz aniztasuna Iberiar Penintsulan" izango da.
2014/01/22
Buenos Aires probintziako General Rodriguez herriko Eusko Aterpea Euskal Etxeak, euskal argentinar elkarte hau datozen bi urteotan gidatuko duten hautetsien zerrenda plazaratu berria du eta, adierazi duenez, Juan Itcea eta Raul Tarettok segituko dute agintaldi berrian lehendakari eta lehendakariorde, hurrenez hurren. Hautatutako zerrenda, bakarra izan zen aurkezten eta abenduaren 21ean aldarrikatu zituzten kargu berrietarako, estatutuek agindu bezala martxoaren 31ean karguratuko direlarik.
2014/01/21
'Vascos en Buenos Aires' (Euskaldunak Buenos Airesen) gaur arratsaldean aurkeztuko da Baionan, bihar asteazkena Donostian eta etzi, urtarrilaren 23a, Bilbon. Buenos Aires Hiriak abenduan argitara emana, liburua aurkezteko propio etorriak dira argentinar hiriburutik, Buenos Aires Hiri Autonomoko Giza Eskubide eta Kultura Aniztasun idazkariorde Claudio Avruj eta Eusko Jaurlaritzaren Argentina-Mercosur-erako ordezkari Sara Pagola. Eurak, Jaurlaritzako Kanpoan den Euskal Komunitatearentzako zuzendari Asier Vallejorekin batera, gauzatuko dute aurkezpena.
2014/01/21
Arte eszeniko, musika, literatura, arte plastiko edo ikus-entzunezko sortzailea zara eta zure artea garatzeko leku, denbora eta inspirazio bila zabiltza? Etxepare Euskal Institutuak eta Donostia 2016 Fundazioak horretarako aukera bikaina eskaintzen dizute, Wroclaw hirian hiru egonaldi artistiko egiteko deialdia egin baitute. Egonaldiak aurtengo ekainean edo uztailean egingo dira eta bakoitzak 2.000 euroko poltsa izango du (gehi bidaia, ostatu eta mantenu gastuak). Eskabideak aurkezteko epea otsailaren 28an itxiko da.
2014/01/03
Urtero garai honetan egiten duen bezala, EuskalKultura.com-ek urtarrileko lehenengo asteetan buletina eten eta barne-lanak egiten emango ditu datozen egunak. Gure erredakzio nagusia Donostian dagoenez, eta aurten San Sebastian eguna, urtarrilaren 20a, astelehena denez --jai-eguna Donostian-- urtarrilaren 21ean, asteartea, hasiko da iristen berriz ere buletina harpidedunen postontzietara. Bitartean, gure ohiko telefono eta posta helbideetan izango gaituzu lanean. Urte Berri On!
2014/01/02
Urte Berriarekin EuskalKultura.com-en zozketa berri baten tenorea ere heldu da. Oraingoan sariak bat baino gehiago dira: komikiak (ingelesez) Kanada eta AEB kostaldeetako euskal baleazaleen abenturez; Kaliforniakoak liburua (euskaraz), hainbat euskaldunek Kaliforniako historian utzitako arrastoez; Euskal Baserri Sukaldaritza liburua (gaztelaniaz), euskal-argentinar batek Argentinako euskaldunen etxeetan gorde den euskal sukaldaritza herrikoiaz; eta euskal musika, egungo folka, Bizkaiko Korrontzi taldeak ateratako azken CDaren eskutik. Parte hartzeko, aski duzu email bat bidaltzea.PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
