euskal diaspora eta kultura
2014/05/21
Arrakastaz ospatu zuen joan den asteburuan Los Banoseko euskal etxe kaliforniarrak elkartea sortu zeneko 50. urteurrena. Normalean igandekoa izan ohi den bere urteroko festak bi egun hartu ditu aurten eta jendeak egoki erantzun zuen larunbat eta igandean Los Banoseko azokalekura biltzeko egindako deia. "NABOren biltzar eta festa nagusia datorren astean izanik Bakersfield-en, beldurren bat bagenuen, baina, egiari zor, gure usteak gainditu egin dira eta jende andana ederra bildu zaigu eta urtebetetze festa polita ospatu dugu", aitortu dio EuskalKultura.com-i elkarteko lehendakari Amador Zabalbeascoak. Hona festaren argazki kronika.
2014/05/20
Argentinara egindako bisitan “liluratuta” geratu da Toti Martinez de Lezea idazle gasteiztarra Hego Amerikako herrialde honetan euskal gizataldea “hain bizirik eta aktiboa” ikustean. Eta ez da gutxiagoako. Izan ere, Euskadiko Ordezkaritzak gonbidaturik, Buenos Aireseko Martinez de Lezeak, Liburu Azokaz aparte, euskal etxeak eta euskal giroa ezagutzeko aukera izan zuen eta aurrez aurre ikusi ahal izan zuen euskal herritarren ondorengoen euskal sentimendua. Are gehiago, Buenos Aires hiriburuan, zazpi mila bisitari baino gehiago bildu zituen ‘Buenos Aires Euskal Herria ospagai’ izeneko ekitaldira ere bertaratu zen, euskal gizataldearen elkar lanaz gozatzera.
2014/05/20
Busturiako Altamira auzoko Delfina 1939an heldu zen Estatu Batuetara, Angel Uriarte senarrarekin batera. Angel, busturiarra berau ere, New Yorken bizi zen, baina herrira itzuli zen emazte bila. Brooklynen familia sortu eta han hazi zituzten seme-alabak, bilobak eta berbilobak. Aurten ospakizunetan murgilduta dabil Delfina, martxoaren 13an 100 urte bete zituen eta. Egun horretan, senitarteko eta lagunen deiekin batera, Etxe Zuriko zorion gutun bat heldu zitzaion etxera, Barack Obama presidenteak eta haren emazte Michellek sinatuta.
2014/05/19
Festa handia ari dira prestatzen asteburuan Frantziako Tolosan, Denak Bat elkartearen egoitzan. Euskal Etxeak 60. urteurrena betetzen du aurten eta lehenengoz Euskal Jaialdia egin eta euskal kultura hiriko kaleetara ateratzea deliberatu du. Jarduerak ostiralean abiatuko dira, euskal mitologiari buruzko hitzaldi batekin eta "Bilbao: Lauxeta, tiros y besos" antzezlanarekin. Asteburuan, dantza, euskara ikastaroak, pilota, ipuin kontalariak, pandero lantegia eta hainbat gauza gehiago!
2014/05/19
Eusko Jaurlaritzako Etxepare Euskal Institutuak eta La Platako Unibertsitate Nazionalak sinatutako lankidetza hitzarmenaren baitan garatzen da Euskara eta Euskal Kultura Irakurletza. Proiektua arrakastatsua izan da hasieratik eta Euskal Herriko hizkuntza eta kultura ezagutzeko grina duten hainbat ikasle biltzen ditu, gaur egun, euskara mailaren arabera, kurtso ezberdinetan banatuta. Irakurletzako 2014ko aktibitateak maiatzaren lehenengo astean hasi dira irakasle berriaren iristearekin batera, eta abendu arte luzatuko dira. EuskalKultura.com Dani Oiarbide irakurle berriarekin solastu da bere jardunbide, asmoak eta lehenengo inpresioak jakiteko.
2014/05/16
Hiru egun pedalei jo eta ke eragiten ibili eta gero, Bilbora heldu ziren larunbatean Bordeleko Euskal Etxeak antolatu duen bizikleta martxako partehartzaileak. Nekatuta, noski, baina pozik bidean egindako lagun berriengatik eta ikusitako paisaia ederrengatik: Aquitaniako lautada eta dunetatik Euskal Herriko bihurgunez beteriko kostako errepideetara eta mendietara. Antolatzaileak pozik agertu ziren esperientziarekin eta txirrindulariek hurrengo hitzordua jarri zuten: bi urte barru berriz ere egingo dute bide, baina oraingoan Bilbotik Bordelera!
2014/05/16
Inaugurazio ekitaldia Gernikako Bonbardaketaren 77. Urteurrenaren baitan burutu da eta Euskaldunak Denak Bat-eko kide eta lagunak ez ezik, Udaleko agintariak ere –tartean Julio Suarez alkateordea eta Jorge Eterovich Kontseilu Erabakitzaile Ohoretsuko presidentea – bildu ziren zeremonian. ‘Bake-eserlekua’ Arrecifeseko Mitre Plazan dago, haritzaren enborraren inguruan. Udal ordenantzak adierazten duenez, “Bake-eserlekua munduko kolektibitateen arteko elkartasun eta senidetasunaren ikurra izango da”. Urteurreneko ekitaldiek gauean jarraitu zuen, euskal etxeko egoitzan, bideo eta pintxo afari batekin.
2014/05/15
Aurreratu aurreratu egin dela dio, baina oraindik ere "hango euskaldun askok" (zazpi probintzietan bizi direnez ari da) "ez dute(la) igarri ere egiten hemen bizi dugun euskal sentimendua". Arantxa Anitua abokatua da, Argentinan jaioa eta Buenos Airesko Laurak Bat-en hazia. 2011etik bertako lehendakaria da, 1877an sortua izanik munduko euskal etxe zaharrena den elkarte honetako lehendakaria.
2014/05/15
Oraindik ez dakigu noiz izango den ‘Buenos Aires Celebra al País Vasco’ jaialdiaren laugarren edizioa –datorren urteko festen egitaraua urte amaierako prestatuko baitu hiriko Udalak– baina aurtengoan eta aurrekoetan parte hartu dutenak egunak zenbatzen egongo dira honezkero dudarik gabe. Oraingoz, eta itxaronaldia leuntzeko, joan den igandeko oroipenak ditugu birpasatzeko. EuskalKultura.com-en artikulu honetan jaiaren azken argazki eta bideo erreportajea.
2014/05/15
Aurten ere arrakastatsua izan da Txikifest, New Yorkeko Txakolinaren Azoka eta mila lagundik gora bildu ziren Txikito jatetxearen ondoan egin zen jaira. Izan ere, azoka festa bilakatu zen, urtero bezala, Manhattanera Euskal Herriko giro eta bizitasun apur bat ekarriz. Azokaren eremuan 17 txakolin marka desberdin dastatzeko aukera izan zuten bertaratu zirenek --ezin den-denak probatu, baina, bestela a zer nolako atxurra!-- eta gainera, tragoari laguntzeko New Yorkeko hamar jatetxe ezagunek prestatu zituzten mokautxoak jan ahal izan zituzten. Antolatzaileak, Eder Montero sukaldari bilbotarra eta bere emazte Alex Raij sukaldari newyorktarra pozik agertu ziren aurtengo festaren arrakastarekin.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
