euskal diaspora eta kultura
2014/09/11
Mota askotako ekintzak egin dira irailaren 2tik 8ra Chaco probintziako hiriburuan Immigrantearen Eguna ospatze aldera. Kotoiaren Lurra bertako euskal etxea ez da ospakizun hauetatik kanpo geratu eta euskal gizataldearen ordezkari izan zen 2 de Febrero Plazan antolatutako jaialdian eta baita probintziako legebiltzarrean egindako omenaldian ere. Zeremonia honetan diploma eman zioten, beste zenbait etorkinen artean, euskal etxeak proposatuta, Juan Iturrioz arkitektoari.
2014/09/10
Boise State University-ko(BSU) Euskal Ikasketa Programak antolatu duen bigarren Literatur Lehiaketarako lanak aurkezteko epea aurki amaituko da, urriaren 1ean. Nevada-Renoko Unibertsitateko Center for Basque Studies-ekin elkarlanean antolatu dute lehiaketa, eta bertara euskal gaia duten edozein eratako lanak aurkez daitezke, fikziozkoak ala ez-fikziozkoak, beti ere ingelesez idatziak.
2014/09/10
Irailaren 4tik eta hilaren bukaera arte ikusgai da Imanol Ordorika arkitekto euskal-mexikarrari buruzko erakusketa Euskal Herriko Arkitektoen Elkargo Ofizialaren Bizkaiko Ordezkaritzan. Ordorika Lekeition jaio zen baina Mexikora erbesteratu zen familiarekin zortzi urte zituenean. Mexikon ikasi zuen arkitektura baina, erakusketako arduradunek azpimarratzen dutenez, bere lanean bi herrialdeetako kulturak uztartzen dira. Bere eraikinak 36ko gerrako erbesteratuek Mexikoren hiri garapenean izan zuten eraginaren adibide bikaina dira.
2014/09/10
Hilabete honetatik aurrera, La Pampa probintzia argentinarreko Gral. Achako euskal etxeak logotipoa eta erakundea ordezkatzen duten kirolarientzako arropa modelo berriak izango ditu. Diseinuak Melisa González Poey gazteak egin ditu, Euskal Herriaren ikur diren ikurrina eta lauburua baliatuz. Euskal Etxeak, bestetik, gonbitea luzatzen dio komunitateari datorren larunbatean 'Afari Amerikano' batean parte hartzeko.
2014/09/09
Heldu den larunbatean, hilak 13, izango da San Frantziskoko Basque Cultural Center euskal etxeak antolatutako XVII. golf txapelketan izena emateko azken eguna. Irailak 27an jokatuko da norgehiagoka San Mateo inguruan dagoen Poplar Creek golf zelaian. “Aurreko urteetan legez, 30 eta 40 lagun artean espero ditugu”, Alain Camou antolatzaileak Euskalkultura.com-i esan bezala.
2014/09/09
Mexikon dira dagoeneko 18 herrialdetako ordezkaritzak, ostegunean hasiko den Munduko Euskal Pilota Txapelketan lehiatzeko gogotsu. Guztira, 347 pilotari ariko dira lehian hainbat kategoriatan (trinketea, pala, frontenisa...) Zinacantepec hiriko Pilotaren Jauregia izeneko kirolgunean. Mexikoko Frontoi Federazioak antolatu du txapelketa, eta irailaren 21a arte luzatuko da lehia. Munduko pilotazaleek egunez egun jarraitu ahal dute txapelketa antolakuntzaren webgunean eta sare sozialen bitartez.
2014/09/09
Instituzioaren egoitzan egin zen ekimenak zuzendaritza batzordeko kideak, euskal etxeko lehendakari ohiak, Eusko Jaurlaritzaren Ordezkaria den Sara Pagola eta Alberto Maiztegui doktorea bildu zituen. Maiztegui doktoreari omenaldi hunkigarria egin zioten Cordobako euskal erakundeko lagunek zientzia arloan ikerlariak egindako lanagatik. Protokolozko zeremonia, Cordobatarrak taldearen dantzekin bukatu zen. Ospakizuna, ordea, bazkari eta brindis batekin jarraitu zuen arratsaldean zehar.
2014/09/08
“Parte hartzaileak bihar bertan jasotzeko prest dago Mexiko”, esan dio Pablo Mendiburuk Euskalkultura.com-i, txapelketa urriaren 20ra arte hasiko ez den arren. Cancunen izango da 37. edizio hau eta “erabat baikor” agertu da Mendiburu. Berarekin batera, Juan José Echenique, Ramón Irigoyen, Juan José Arrieta, Agustín Palacios eta Josetxo Garaicoechea dabiltza antolaketa lanetan. Bosgarren aldiz egingo da txapelketa Mexikon, aurretik herrialdeko hiriburuan (1981ean eta 1989an) eta Acapulcon (1999an eta 2004an) antolatua izan ostean.
2014/09/08
Bilbo goitik behera berritu da azken urteotan eta gero eta ederrago ari da jartzen. Aldaketa horiek guztiak aurrez aurre ikusi eta gozatzeko aukera ez dutenentzat, beste proposamen bat dakargu gu: Luis Davilla argazkilariaren 360 graduko irudi panoramikoak. Ordenadorean, mugikorrean edo tabletean ikus daitezkete eta irudietan sartzen direnek hirian bertan direla imajinatu ahalko dute une batez. Bidaiei buruzko webgune batek argitaratu ditu: www.ocholeguas.com. Guggenheim Museoaren distirak edo Alhondiga berrituaren bazter eta zokoak ikusi nahi? Zatoz ba!
2014/09/08
Egin berria du urteroko bere Ohiko Batzar Nagusia Saladilloko Itxaropen Euskal Etxeak, Argentinako Buenos Aires probintzian. Bilkura barnean eginiko hauteskundeetan lehendakariorde, diruzain eta beste zenbait batzordekide postu berritu dira, datorren urte honetan Nora Idoetak lagun izango dituela, besteak beste, Sergio Arteta, lehendakariorde, Hector Altamirak segitzen duela idazkari, Sara Silvia Rondeau dela idazkariorde, Susana Labere diruzain eta Horacio Echeverria diruzainorde.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
