euskal diaspora eta kultura
2008/01/25
Eusko Jaurlaritzako Kultura saileko ordezkaritza bat asteburu honetan abiatuko da bi herrialdeotara, bertako unibertsitateetan Euskara eta Euskal Kultura lektoretzak zabaltzeko posibilitateak aztertzeko. Horiekin, Asia eremura hedatuko litzateke egun Europa eta Ameriketako 12 herrialdetako zentroak biltzen dituen programa. Bidaian bisitatuko diren erakundeen artean Waseda Unibertsitatea dago --Euskara eskolak ematen dira jadanik bertan-- eta Sofiakoa, Tokion; Kansas Gaidai, Osakan; eta Kobeko Unibertsitatea, hauek guztiak Japonian; eta Filipinetan, Ateneo de Manila Unibertsitatea eta Nueva Vizcayako Estatuarena.
2008/01/24
Joseba Azkarraga Eusko Jaurlaritzako Justizia, Lan eta Gizarte Segurantza sailburuak eta Urbano Marín-ek, Txileko Gorte Goreneko presidente izendatu berriak, Justizia modernizatzeko lankidetza-akordioa sinatu zuten asteartean, herritarrentzako zerbitzu hau azkartasunez, gardentasunez eta baliabide publikoen eraginkortasunez emateko helburuarekin. Azkarragak aurreratu zuenez, datozen hilabeteotan Txileko Gorte Goreneko ordezkariak Euskadira joango dira, EAEn egiten ari den lana ezagutzera, eta ondotik bisita bueltatu egingo zaie.
2008/01/24
Kubako Asociación Vasco Navarra de Beneficencia (AVNB) delako euskal elkartea buru belarri sartu da 2008ko ekimenen antolakuntzan. Elkartea berrindartzeko kultur ekitaldiak sustatzea da aurtengo ildoetako bat eta urteari hasiera emateko Octavio Cortazar zuzendariaren 'El onceno maestro' dokumentalaren emanaldia egin zuten joan den astelehenean. Elkarteko kide ugari bildu zen bertara, Cortazarrek bere familiaren sustraien bila Bizkaira eginiko bidea ikusteko.
2008/01/24
Nazio txikien kexak batzuetan eragina izaten dutenaren froga da The Times egunkariak aireratu duen afera. Antza Washintongo United States Library of Congress liburutegiak idazle eskoziarrak 'ingeles idazleak' izenburupean sailkatzea erabaki zuen joan den udazkenean. Orain, baina, Eskoziatik eta Estatu Batuetako eskoziarrengandik jasotako kexuak kontuan hartuz, erabakian atzera egin du munduko liburutegi handien eta garrantzitsuenetakoa denak. Gure artean, Sustatu.com webguneak bildu zuen datozen lerrootan garatzen dugun berria.
2008/01/24
Sarean dagoen lehen euskara-japoniera hiztegi eta baliabidea da hau, Goihatako arduradunek EuskalKultura.com-i azaldu diotenez. Enpresa honek itzulpengintza lanak eta Japonia eta Euskal Herriko enpresen harremanetarako aholkularitza zerbitzuak eskaintzen ditu. Hiztegiak 20.000 termino biltzen ditu dagoeneko, baina Wikipedia erako kolaborazioarekin etengabeko berrikuntza eta hobekuntza izango duela espero dute egileek.
2008/01/24
Grinzane Cavour sarien 27. edizioan Bernardo Atxaga idazle euskaldunaren Soinujolearen semea liburua izan da irabazlea Atzerriko Narratibaren arloan. Horrez gain, Atxagak sari honen Irabazle handia izateko aukera ere badu. Lehia horretarako beste bi kideak Ingo Schulze alemaniarra eta Ljudmila Ulickaja errusiarra izango dira. Piamonteko eskualdea eta CRT fundazioa dira, beste zenbait erakunde italiarrekin batera, Grinzane Cavour sarien antolatzaileak.
2008/01/23
Texaseko Ordezkarien Ganberako hautetsia da Rafael Anchia eta zenbait analista politikoen apustuetan bere izena Dallaseko alkate bezala ageri da aspaldion (eta etorkizunera begira Texaseko Gobernadore kargua ere aipatzen dute batzuk). Anchia gaztea --39 urte baino ez ditu-- Floridan jaio zen, guraso euskaldunen semea. Datozen urteetan estatuko indar erabakigarria bilakatuko den komunitate latinoaren botoa bere alde izan dezake, bertako medioen esanetan. Hala balitz, Anchiak John Garamendi, Kaliforniako gobernadoreordea, edota John Bieter, Boiseko alkatea bezalako politikari euskalamerikarren pausoak jarraituko lituzke, alde latinotik.
2008/01/23
Alberto Iglesias donostiarra berriz ere Oscar sarietarako lehian arituko da aurten. Amerikar Zine Akademiaren sariak munduko garrantzitsuenak dira seguraski eta ez da marka makala Iglesiasena, sarietarako izendapena jasotzen duen bigarren aldia delako. Marc Fosterrek zuzenduriko The Kite runner filmaren soinu bandarengatik izendatu dute Iglesias. 2006an 'The Constant Gardener' filmeagatik jaso zuen izendapena.
2008/01/23
Eusko Jaurlaritzaren Gobernu Batzordeak asteartero egiten duen bilkuran atzo hartutako erabakien artean Argentinako Misiones probintziako Corpus Christi herriko 'Eusko Etxea' elkarte zibila ofizialki onetsi eta Euskal Etxeen erregistro ofizialean sartzea deliberatu zuen. Neurri honekin aipatu euskal etxea nor da aurrerantzean, Jaurlaritzak kanpoko euskal giza-taldeei eskaintzen dizkien programa eta onuren hartzaile eta eskubide-emaile izateko bere bazkideekiko.
2008/01/22
Argentinako FEVA euskal etxeen elkarteak joan den urteko azkeneko hilabeteetan inauguratu ditu bere ekitaldiak, izan ere Itziar Aguirre Soraluce sukaldari rosariotarrak Bragadoko Danak Bat-en emandako ikastaro batekin. Laprida eta Arrecifes-eko euskal etxeetara ere zabaldu zen ekimena. Lortutako oihartzuna ikusirik, Maria Amelia Dadet FEVAko arlo honetako arduradunak EuskalKultura.com-i aurreratu dionez, oraingo udako oporrak amaiturik, urte berriak ekitaldi eta gastronomia proposamen berriak ekarriko ditu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
