euskal diaspora eta kultura
2008/09/30
Aurtengo uztailean eta lehen aldiz, Euskal Herrian bildu dira 2004az geroztik Hator Hona programan Argentinarako bidaiatutako gazte euskaldunak eta Necochean hartu zituzten euskal-argentinarrak. Edizio bakoitzean Euskal Herriko hamar bat neska-mutilek Necochearaino heldu ziren, bertako euskal etxean euskara, dantza, pilota, txalaparta... erakusteko Necocheako gazteei. Egonaldi horietan sortu ziren adiskidetasun eta harreman estuak ekimenaren arrakastaren seinale bihurtu dira. Joan den uztailean euskal etxeko hartako hogei bat neska-mutilak euren ametsa bete eta Euskal Herrira etorri ziren, Gazte Alai dantza talde gisa erakustaldiak eman eta euskal lagunekin berriz topatzeko.
2008/09/29
Miguel de Unamunoren egunean, Bilboko izen bereko plazan lore-eskaintza eta ohorezko aurreskua gauzatu dira, Azkuna alkatearen aldarrikapen batekin, eta hitzaldi bat arratsaldean, Deustuko Jose Antonio Ereño irakaslea eta Miguel de Unamuno Adarraga, filosofoaren biloba, partaide. Gaur baita ere, Bilboko Udalak X. Miguel de Unamuno saiakerarako deia zabaldu du, euskaraz zein gaztelaniaz, 7.000 euroko sari banarekin. Epea azaroaren 28an bukatuko da.
2008/09/29
Telebista parte hartzailearen premisa xede dutela eta webgunea berrituta hasi dira berriz Kanaldude telebistan lanean, udan bideorik eskaini gabe egon ondoren. Horrek ez du esan nahi geldirik egon direnik, eta irail honetan jarri dituzte dagoeneko euren webgunean sei bideo, horietariko bat Kaliforniako Noka taldeak Euskal Herrira egindako bisita erakusten duelarik. Historia zabala duen internet bidezko telebista honek proiektu frango lituzke buruan, telebista herritarrengana zabaltzeaz gain, Lapurdi, Nafarroa Beherea eta Zuberoan telebista kate bat sortzea, Lapurdiko kostaldean iada lanean dabilen ITelebistarekin elkarlanean.
2008/09/29
General Villegas-eko Euskal Etxeko kideak gero eta hurbilago daukate euren ekimen ugarien aterpe izango den eraikin egoki bat eskuratzeko ametsa, izan ere, joan den abuztuan hasi baitziren egoitza berria altxatzen. Nahiz eta oraindik goiz den lanen amaiera-datarik ipintzeko, buru belarri hasi dira lanean eta laster eraikinak bere burdinezko egitura eta teilatua izango ditu.
2008/09/26
Angeluko Argileak koroa Quebec aldean izan da abuztuan, lurralde honen sortzearen 400 urteurreneko ekitaldietan parte hartzeko gonbitea jaso ostean. Ipar Ameriketako herri honen historian euskaldunek izan dute zerikusirik eta harreman hori berreskuratu eta omentzeko asmoarekin antolatu zen euskal kantarien bidaia. Quebec-en eta Montrealen izan ziren kantariak eta bertako euskaldunekin biltzeko parada izan zuten, EuskalKultura.com-ek aurreko artikuluetan agertu zuenez. Jarraian, informazio hori biribiltzeko, Herria astekariak aste honetan plazaratu duen artikulua.
2008/09/26
Euskaltzaindiak bere XVI. Nazioarteko Biltzarra egingo du urriaren 6tik 10era Iruñeko Baluarte Batzar Jauregi eta Auditoriumean. Biltzarraren izenburua "Pirinioetako hizkuntzak: lehena eta oraina" izango da eta bertan Pirinioetako bi aldeetako hizkuntzak eta kulturak izango dituzte hizpide. Hitzaldiak ez ezik, musika emanaldiak eta ekitaldi osagarriak ere izango dira Biltzarrean, bai eta teknologia berriei buruzko mahai inguru bat ere. Gainera, Henrike Knörr zena omenduko dute biltzarkideek, "In Memoriam Henrike Knörr" ekitaldian. Bestalde, Euskaltzaindiak gaur aukeratu du Knörren ordezkoa izango den euskaltzain berria: Patxi Uribarren aramaioarra.
2008/09/26
Duela urtebete sortu zen 'Asociación Cultural Denak Bat' elkartea, Xabier Iñaki de Arza Blancoren gidaritzapean, eta ordutik hona tailerrak eta kontzertuak eskaintzen dizkio euskal kolektibitateari. Azken kontzertua irailearen 6an izan zen, Buenos Aireseko Unibertsitateko Zuzenbide Fakultateko Auditoriumean. Bertan Jose Maria Usandizaga, Juan Crisostomo Arriaga eta Antonio Vivaldiren obrak aurkeztu zituzten Laura Deloguk, Verónica Canavesek eta Manuel de Olasok, Todos los Santos abesbatza eta Denak-Bat Camerata (Grace Medina concertino) lankide.
2008/09/25
Nekane Echeverria azpeitiarra 1982tik bizi da Argentinako Chaco probintziako Resistencia hiriburuan, senarrarekin batera bertara aldatu zenetik, eta 'Kotoiaren Lurra' Euskal Etxeko kide da. Immigrantearen Eguna ospatzeko ekitaldietan, Chacoko Diputatu Ganbararen omenaldia jaso du, beste hainbat nazionalitatetako jenderekin batera, komunitateari eginiko ekarpenengatik.
2008/09/25
Juanjo Olasagarre idazle arbizuarrak Italiako hainbat hiritan 'Ezinezko maletak' eleberriaren itzulpena aurkeztuko du. 'Valigie impossibili' izenburuarekin argitaratu du liburua Gran Via argitaletxeak, Roberta Gozziren itzulpenarekin. Liburua 2004an plazaratu zen eta urte berean Kritikaren Saria jaso zuen. Aipatzekoa da gaztelerazko itzulpena oraindik ez dagoela kalean, urriaren amaieran plazaratuko baitu Bassarai argitaletxeak. Italiako aurkezpenak asteartean, irailaren 30ean, Milanen hasiko dira eta ondoren Turinen (urriaren 1ean), Erroman (urriaren 2an) eta Pontederan (urriaren 5ean) izango da Olasagarre.
2008/09/25
Aurten ere Caracaseko Eusko Etxeak San Antolin eguna lekeitiar era peto-petoan ospatzeko hitzordua bete zuen. 2006ean hasi zuten Antzar Eguna ospatzeko ohitura eta elkarteko kideek oso gogokoa omen dute jai hau. Berdin dio Caracas itsatsotik 25 kilometrotara egotea eta euskal etxetik gertu portu edo batel arrastorik ez egotea... elkarteko igerlekua eta trapuz eginiko 'antzarrak' nahikoak dituzte jai galanta antolatzeko. Neska-mutil talde handia bildu zen ekitaldira eta arratsaldean hasi eta gaueko ordu txikiak arte ibili ziren, antzarrak harrapatu nahian, jo ta su.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
