euskal diaspora eta kultura
2011/03/25
Santa Fe hiri argentinarreko Gure Etxea EEko partaideak esku hartu zuten joan den astean, probintziako hiriburuko Gizataldeen Elkarteak deiturik, eta Buenos Aires hiriburu federalean Argentinako FANA Nikkei Elkarteen Federazioak antolatutako deiarekin bat eginez gauzatutako elkarretaratzean. Bildutakoek, Espainia Plazan baturik, Santa Fen presentzia daukaten gizataldeen izenean ere hartu zuten parte, nazio bakoitzeko banderariak tarteko, guztia Japoniako herria igarotzen ari den kinka elkartasunez gogoan.
2011/03/24
Berlingo Euskal Etxea gogotsu ari da giroa berotzen alemaniar hiriburuan Korrikari harrera egiteko eta lasterketa heldu aurretik berlindarrei berau zertan datzan azaltzen saiatu da. Kari horretara Korrikaren aurkezpen jaia egin zuen iragan martxoaren 5ean, afari, hitzaldi eta Anari kantari azkoitiarraren kontzertua eta guzti. Aretoan 200 lagundik gora bildu ziren, "euskaldunak, alemaniarrak, kataluniarrak, turkiarrak, espainiarrak eta nork daki zein beste nondarrak...", azaldu dute euskal etxekoek, "batzuk ezaguna dutenaz gozatzen, besteak kultura eta herri berri bat ezagutu gosez". Apirilaren 9an hitzordua dute denek Brandenburgoko Atean, korrika egiteko prest!
2011/03/24
Eusko Jaurlaritzaren Estatu Batuetako, Kanadako eta Mexikoko Ordezkaritzak goi mailako teknikari lanpostu bat bete behar du bere Mexiko Hiriko Bulegoan eta karia horretara deialdi publiko bat egin du. Mexikoko legeen arabera sinatuko den lan kontratua izango du, eta eskatzaileak goi mailako tituludunak behar dute izan, artikulu honetara bildu ditugun oinarrietan finkatzen diren alorretakoak. Eskabideak aurkezteko azkeneko epea apirilaren 4a da.
2011/03/24
Buenos Aires probintziako San Miguel hiriko Askatasunaren Bidea euskal elkarteak proiektu polit bat jarri du abian aste honetan. Jatorri euskalduna duten lagun guztiei euren arbasoen bizipenak kontatu eta argazkiak bidaltzera gonbidatzen die elkarte gazteak. Jasotako testigantzak instituzioaren blog-era igoko dira, informazio artxibo bat osatzeko asmoarekin.
2011/03/24
'Basque Audiovisual' taldearen izenpean, Euskal Herriko ikusentzuneko produkziorik berrienak aurkeztuko dituzte Cannes-ko Nazioarteko Merkatuan apirilaren 4tik 7ra. Merkatu hau Europako telebista arloko nagusiena da, produktuak saltzeko eta ezagutarazteko leku aproposa. Bertan izango dira aurten EITB eta 3Koma, Bainet, Expressive, Mediabask, Moztu Filmak, My Jok, Orio Produkzioak eta Pausoka ekoiztetxeak. Eurekin batera bidaia egingo dute Aizpea Goenaga Etxepare Institutuko Zuzendariak eta Itziar Mena, Eiken Ikusentzunezko Cluster-aren zuzendariak, besteak beste.
2011/03/23
Buenos Airesko Liburutegi Galegoa-Biblioteca Galega de Bos Aires, La Platako 'Euzko Etxea' Euskal Etxeko 'Matxin Burdin' Liburutegia eta Buenos Airesko Japoniako eta Ingurune kulturaleko Liburutegia antolazaile, ekainaren 11an burutuko da aurten Kolektibitateen Liburutegien VI. Topaketa. Hitzordua Casares etorbideko 2966. zenbakian kokatuta dagoen Lorategi Japoniarrean izango da, goizeko 10etik arratsaldeko 6etara. Arratsaldeko ekitaldi eta standetan parte hartzeko proiektuak bildaltzeko epea apirilearen 4an bukatuko da.
2011/03/23
Nantesko Euskal Lehioa edo 'La Fenêtre Basque' saila nazioarteko jaialdien zirkuitoan diren euskal zinemari buruzko ziklo aitzindarietako bat da eta aurten, hamaikagarrenez, Euskal Herrian egiten den zinearen film-sorta bat ekarriko du Nantesko Zinemaldira. Jaialdia bihar bertan hasi eta apirilaren 3a arte luzatuko da eta bertan ikusgai izango dira sei euskal luzemetraia --lau sail desberdinetan lehiatuko dira, gainera-- eta Kimuak programako bederatzi laburmetraia.
2011/03/23
Urtero gailentzen ditu 'Society of Basque Studies in America' elkarteak Ameriketan euskaldunak lagundu edota Euskal Herriaren irudia hedatzen laguntzen duten pertsona eta erakundeak. 2010ean FEVA edo Eusko Argentinar Bazkun Alkartasuna federazioari egokitu zitzaion ohorea eta datorren apirilaren 9an Estatu Batuetako ordezkariek eskuratuko diote saria erakunde argentinarrari. Emate-ekitaldia Buenos Airesko Laurak Bat Euskal Etxean burutuko da, FEVAren urteroko batzarraren ondoren, eta euskal etxe guztiak parte hartzera gonbidatzen ditu Federazioak zeremonian parte hartzeko.
2011/03/23
Berriz jantzita dator Jaurlaritzaren atzoko Gobernu Kontseilua, izan ere Diasporako euskaldunentzako interes handikoak izan daitezkeen zenbait erabaki hartu zituzten atzo Gasteizen. Alde batetik, Gobernuak 2011ko Gaztemundu trebakuntza programaren deialdi berria egitea erabaki du. Bestetik, Lehendakaritzaren berrantolaketa egin da eta egitura berriaren barruan Eusko Jaurlaritzaren Madrilgo Ordezkaritza sortzea erabaki da. Orain arte Europarako zuzendaria zen Irune Aguirrezabal izango da ordezkari berria. Azkenik, Valentzian Quart de Pobleteko Euskaltzaleok Elkartea Euskal Etxea aintzatestea erabaki da.
2011/03/22
Elsa Hilda Macolino eta Osvaldo Mario Achinelli, egun General Rodriguez-en bizi diren adineko beste bi herritar izan dira Buenos Aires probintzia argentinarreko herri honetako Eusko Aterpea Euskal Etxeak antolatutako 'Hitz Nagusiak'eko saio berri baten partaide. Ekimenak ohi duenez, bi herritar hauek euskal etxearen egoitzara gonbidatu zituen bertako euskal elkarteak, euren bizimodu eta eskarmentuaren berri eman zezaten, euren solasa grabatu eta orain arte bildutako gainerako lekukotasunekin euskal etxea osatzen ari den ahozko ondasun artxiboko parte bilaka zitezen.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
