euskal diaspora eta kultura
2012/11/23
Erromako Associazione Culturale Euskara eta Upter Unibertsitateko Euskara sailak Settimana Basca edo Euskal Astea jaialdiaren edizio berri bat antolatu dute. Jaialdia abenduaren 1ean abiatuko da, Tapia eta Leturia eta Patres Vitiorum Otiorum Que taldeen kontzertu batekin. Ekitaldiak abenduaren 9a arte luzatuko dira eta, besteak beste, liburu aurkezpenak, kontzertuak, irrati nobelak, zine emanaldiak eta kontzertuak eskainiko dira. Erroman euskal kulturaz gozatzeko eta abenduko hotza musika, bertso eta gastronomia dastaketekin goxatzeko parada ederra izango da.
2012/11/23
Donostiako San Telmo Museoak euskarari buruzko erakusketa inauguratu berri du, "Badu, bada" izenburupean. Erakusketak euskararen etorkizunari eta egun bizi dugun mundu eleanitzean gure hizkuntzak gainditu behar dituen erronkei buruzko hausnarketa proposatzen du. Hausnarketa hori bisitari fisiko zein birtualen ekarpenarekin osatzea da erakusketaren helburua, eta horretarako, internet bidez argazkiak, iruzkinak eta bakoitzaren esperientziak bidaltzeko gonbitea luzatu dute. 'Badubatzen' hasi nahi al duzu? Sar zaitez webgunean eta ekin!
2012/11/23
Buenos Aires probintziako 9 de Julio herriko Jose Ingenieros Liburutegian
Elene Kortejarenak idatzitako 'Ongi Etorri, Joakin’ liburua aurkeztuko da igande honetan. Komunitate osoari luzatutako gonbitean adierazten den bezala, “Euskal Herrira egindako bidaia, bihotzetik kontatuta” da testua eta “guztion arbasoen oroimenean dago oinarrituta”. Ekitaldia azaroaren 25ean izango da, iluntzeko 8etan Jose Ingenieros Liburutegian, eta obraren pasarte batzuk irakurriko dira, gaztelaniaz zein euskaraz.
2012/11/22
Larunbatetik aurrera euskal literaturak ordezkaritza zabala izango du Guadalajarako Liburu Azokan, Mexikon, Euskal Editoreen Elkarteak eta Etxepare Euskal Institutuak antolatu dituzten ekimenei esker. Berta izango dira Harkaitz Cano idazlea eta Mikel Ayerbe literatur aditua, euren azken lanak aurkezteko: "Twist" eleberria eta "Our Wars. Short Fiction on Basque Conflict" ipuin bilduma, hurrenez hurren. Abenduaren 1ean Mexiko Hirirako bidea hartuko dute eta hitzaldiak emango dituzte UNAMen (Universidad Autónoma de México) eta Universidad Iberoamericana Ciudad de México delakoan, Etxeparek bertan sustatzen dituen Euskara eta Euskal Kultura irakurletzen baitan.
2012/11/22
Azaroaren 10ean eta 11an egin zen Villa Mercedesen San Luis probintziako Immigrantearen Jaia. Ekitaldia hiriko hiri argentinar honetako 'Calle Angosta' izeneko kulturgunean burutu zen, hogei bat kolektibitatetako ordezkariak lagun. Euskal gizataldeari dagokionez, Villa Mercedeseko Euskal Etxeko kideek prestatutako standak sukaldaritza arloko I. saria irabazi zuela aipa daiteke, jaialdiaren XII. edizio honetan. Izan ere, eta bertako sukaldaritzazale talde baten buru, euskal etxe anfitrioiak gonbidaturik, Coronel Moldeseko Marita Echavek ere hartu zuen parte euskal plater tipikoen prestaketan. Euskal standaren baitan, bestalde, euskal etxeak Villa Mercedesko plaza zaharberritu eta birmoldatzeko planoak ipini ziren ikusgai, Euskal Herriko Ordiziako plazaren itxura emateko proiektuari urrats berri bat emanez.
2012/11/21
Sarean jarri eta lehengo hamar egunetan 2500 deskarga izan zituen Nuria Vilaltak zuzendutako ‘Guk, nosotros’ izeneko dokumentalak. Egileen esanetan “Guretzat, ekipoarentzat, pozik egoteko 2500 motibo”. Dokumentala, hiru urte luzeen fruitua, “Argentinako Euskal Diasporak, gaur egun, Euskal Herriko politikan duen paperari buruzko dokumental independiente bat da” eta on line ikus daiteke www.guknosotros.com web orrian. “Proiektua gauzatu ahal izateko, asko izan dira lagundu digutenak: profesional teknikoak eta Argentinako euskaltasuna biziarazten duten hainbat protagonista; batik bat, horiei esker ‘Guk, nosotros’ filme bilakatu da”, azpimarratu digute dokumentalaren arduradunek.
2012/11/21
Euskal kultura eta baloreak, eta ingurumenarekiko proposamenak hedatzeko helburua du Unai Basurko kapitainak zuzentzen duen espedizioak. Antartikarako bidean, bi eginkizun beteko ditu Pakea Bizkaia belaontziko tripulazioak: batetik, materiala bilduko du gero eskoletan irakatsi eta erakutsi ahal izateko; bestetik, Argentinako euskal gizataldearekin harremanduko da, euren eskarmentua konpartitzeko. Bi puntu hauekin lotuta, Basurkok Necocheako Ikastola hautatu du bertoko ikasleei bisita bat egiteko. Argentinako egonaldian, Buenos Aireseko Laurak Bat, Necocheako Euzko Etxea, Bahia Blancako Union Vasca eta Puerto Madryngo Etorritakoengatik euskal etxeetan ere gauzatuko ditu bisita eta hitzaldiak.
2012/11/20
Aurreikuspenak beltz-beltzak omen ziren ikasturte hasieran, baina Bartzelonako Euskal Etxeak lortu du tinko eustea aurten euskara eskoletan matrikulatu den ikasle kopuruari. Nola? Bada, marketing kanpaina berezi baten bitartez. Igotz Ziarreta argazkilari eta diseinatzaileak eskolak iragartzeko irudi bitxi eta deigarriak erabili ditu, eta jendeak oso ondo erantzun du. Orain, euskal etxeak irudi horiek munduko gainerako euskal elkarteei eskaintzen dizkie, nahi izanez gero eurek ere balia ditzaten.
2012/11/20
Proposamen pedagogiko eta artistikoa eskainiko du 2012ko bira honetan Iñaki Etxepare biolontxelo jotzaile irundarrak Txile, Argentina eta Brasilen. Programa bikoitzaren baitan ‘Biolontxeloaren Pedagogia’ bere liburua eta ‘Bach eta Itsasoa’ ikuskizuna aurkeztuko ditu Hegoamerikako hainbat herritan, kasu batzuetan euskal etxeek antolatutako ekitaldietan. Ibilbidea bihar, azaroaren 21an, hasiko da Txilen, Santiagoko Euzko Etxean, eta abenduaren 2an bukatuko da Brasilen, Porto Alegre hirian. Tartean, Mendoza (baieztatzear), San Juan eta Buenos Airese hiri argentinarretan ere eskainiko ditu emanaldiak.
2012/11/19
EuskalKultura.com 2012 urteko webgune onenak saritzeko sortutako DiarioVasco.com Sarietako finalista hautatu dute. Datorren ostegunean egingo den ekitaldi batean adieraziko dira "internet sustatzea" eta "interneten dihardutenen ahalegina eta lan-kalitatea onestea" helburu duten sariotako aurtengo saridunak. EuskalKultura.com euskarari dagokion webgune onenaren kategoriako hiru finalistetako bat da sarien zazpigarren edizio honetan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
