euskal diaspora eta kultura
2012/11/30
Erakundearen hogeigarren urtemugan ekintza bereziak gauzatu dituzte Santa Rosako Zelaiko Euskal Etxea-ko kideak 2012 honetan. Eta proposamenen arrakastak bultzatuta, proiektu berri askorekin ekingo diote 2013ari. Azaroaren 18ko bazkarian omenaldi bat egin zien euskal erakundeak La Pampa probintziako Lalo Molina Larrazabal eta Carlos de Urquiza musikariei; eta euren kantekin hasi ziren urte zaharrari adio esaten. Abenduaren 14an Nestor Mazzolo Cazanoveren liburu bat aurkeztuko da euskal etxean. Datozen hilabeteei begira, berritze lanak egingo dituzte instituzioaren egoitza hobetze aldera. Hauek eta Zelaiko Euskal Etxearen beste berri batzuk segidako artikulu honetan.
2012/11/29
Iragan abuztuan aurkeztu zen "Apalabrados" jokoaren euskarazko bertsioa eta harrezkero asko dira jolasarekin engantxatuta gelditu diren euskaldunak. Mugikorretan eta Facebook bidez jokatzen da "Apalabrados" eta euskaraz gain gaztelaniaz, ingelesez, eta katalanez ere badago, beste zenbait hizkuntzen artean. Jokoaren sortzaileak, Maximo Cavazzani argentinarrak, euskaraz dagoeneko 25.000 partida jolastu direla dio eta euskal erabiltzaileen komunitateak gora egiten jarraitzen duela.
2012/11/29
Bihar, azaroaren 30ean eta San Andres Lizarrako patroiaren egunean, Lizarraenea izenarekin bataiatuko dute Ekin Argitaletxeko eta Eusko Kultur Etxea-Eusketxeko kideek Buenos Airesko Mexico kalean dagoen euren egoitza. Izenaren hautaketa esanguratsua da oso euskal etxeko lagun eta agintarientzat, izan ere, argitaletxearen sortzaile eta euskal kulturaren bultzatzaile handia izan zen Andres de Irujo Ollo Nafarroako herri horretan jaiobait 1907ko azaroaren 29an. Bihartik aurrera izango du lekuak izen berria. Hala ere izendatzeko ekitaldia abenduaren 1ean, larunbat honetan izango da, gaueko 9etan, Lizarraenea Etxean, hiriburuko Mexiko kaleko 1880.ean.
2012/11/28
Bordeleko Eskualdunen Biltzarra Euskal Etxeko kideek egun zirraragarria izan zuten iragan azaroaren 25ean, "Aita eta Ama maiteak" ikuskizunari esker. Emankizunean gutunak irakurri eta musikaz lagundu zituzten Mixel Etxekopar, Cecile Tison eta Jean Christian Galtxetaburu musikariek, baina ez edonolako eskutitzak: XIX. mendean Argentinara emigratu zuten euskaldunek etxera bidaltzen zituztenak, baizik. Lekukotza gazi-gozoak izan ziren, batzuetan zinez hunkigarriak eta gordinak, eta ikusleek biziki eskertu zuten ikuskizun berezi hau.
2012/11/28
Ezer gutxi falta da urte bukaerara iristeko baina dudarik gabe mugimendu handiko egunak dira oraindik geratzen direnak. Izan ere, abenduaren 3an San Frantzisko Xabier eta Euskararen Nazioarteko Eguna ospatzen da munduan zehar eta Argentinako euskal etxeek bat egingo dute Euskal Herriko eta Diasporako beste erakunde askoren ospakizunekin. Proposamenak ugariak dira; helburua, ordea, bat bera: euskal hizkuntzarekiko engaiamendua adierazi eta aldarrikatzea. Segidako artikulu honetan, Argentinako Buenos Airesen, General Rodriguezen, Bahia Blancan, San Nicolasen, Arrecifesen, Chascomusen, La Platan, Rio Cuarton eta Cordoban egingo diren elkarretaratzeen egitarauak.
2012/11/27
Eusko Jaurlaritzako Hizkuntza Politikarako Sailburuordetzak hainbat euskarazko tresnekiko loturak bildu eta www.euskara.euskadi.net webgunean ipini ditu era errazean kontsultatzeko moduan. Euretako asko beste erakunde edota instituzio batzuenak izan arren, Sailburuordetzak informazioa bildu eta modu ordenatuan eskaintzeko lana hartu du. Tresna horiek ezagutarazteko kanpaina --besteak beste EuskalKultura.com-en paratua-- atzo abiatu zuen eta abenduaren 2ra arte luzatuko du.
2012/11/27
Nami Kaneko japoniarrak itzuli du Kirmen Uriberen "Bilbao - New York -Bilbao" eleberria eta, gainera, zuzenean euskaratik egin du. Atxagaren "Obabakoak" japonieraz irakurri zuenean euskal hizkuntzak liluratu egin zuen Kaneko, eta duela zortzi urte hasi zen ikasten. Uriberen azken lanaren berri izan zuenean japoniarrek ondo hartuko zuela argi izan zuen eta bere kabuz hasi zen itzultzen. Tokioko Hakusuisha argitaletxeak plazaratu du lana eta harrera ona izan du. "Guk ere itsasoari lotutako kultura daukagu, gure herrian ere desagertzen ari dira mundu eta hitz zaharrak, gure aiton-amonek gerla bizi izan zuten...", azaltzen du Kanekok. "Hemengo irakurleek ezer gutxi dakite Euskal Herriari buruz, baina liburua irakurri eta gero, oso hurbil sentitzen dute".
2012/11/27
Lan handia egiten dute Rio Negro probintziako Bariloche hiriko kolektibitateetako ordezkariek jaialdi hau antolatzeko. Ahaleginak, ordea, bere fruituak dakartza eta milaka lagun biltzen dira urtero jaigunean Europar-Argentinar gizataldeen proposamenez gozatzera. Aspaldiko bideari jarraituz, Barilocheko Mendiko Euzko Etxea Euskal Etxeak ondo asko ordezkatzen ditu bertan euskaldunak. Aurten, ohi bezala, standa jarri zuten, plater tipikoak zerbitzatu, dantzak eta musika zabaldu, eta oso erakargarria suertatu zen nobedade bat ere eskaini zuten: Aitor eta Izaro buruhandiak. Bi pertsonaiek txaloak eta publikoaren maitasuna bereganatu zituzten tauletatatik pasatu zirenean. Hona jaiaren argazki laburpena.
2012/11/26
Gabonak gertu dira eta EuskalKultura.com-ek zozketa jarri du martxan Dastatu.es euskal elikagai gorenen on line dendarekin batera. Saria euskal produktu gastronomikoz osatutako Gabonetako saski itzela izango da. Elikagai guztiak kalitatekoak dira, Euskal Herrian ekoitziak eta zuzenean Lur-Lan ekoizle elkartetik kontsumitzailearengana ekarriak, bitartekaririk gabe. Anima zaitez eta, zorte pixka batez saskia etxean jasoko duzu!
2012/11/26
Azaroaren 24tik abenduaren 2ra arte luzatuko da aurten Urte Amaierako Euskal Astea Buenos Aires probintziako Gral. Las Heras herrian. Bertara iritsiko dira euskal gizataldeko hainbat lagun, sortu berria den erakundeko kideekin jaialdiaren bigarren edizioa ospatzera. Hitzaldiak, zinea, herri kirolak, Gernikako Bonbardaketaz gogoeta-ekintza, dantzak… Mota askotako ekintzak burutuko dira datozen egunotan Gral. Las Heraseko Zazpirak Bat Euskal Etxearen eskutik. Asteari eta urteari amaiera emateko, bazkari ‘criollo’ bat eskainiko zaie gonbidatuei herriko San Luis Gonzaga Institutuko kiroldegian.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
