euskal diaspora eta kultura
2012/12/11
Arantxa Anitua, Buenos Aireseko Laurak-Bat Euskal Etxeko lehendakariak, elkarrizketa eskaini dio iragan asteburuan Noticias de Gipuzkoa egunkariari. Solasaldian Euskal Etxearen jarduerak, Euskal Herriko Bake Prozesua, eta etorkizuna eta beste hainbat gai izan ditu hizpide. Anituaren esanetan, Laurak Bat "ez da elkarte partidista, baina bai politikoa. Gure estatutuetan Euskal Herri osoaren independentziaren alde agertzen gara", baitetsi du. "Hemendik kosta egiten zaigu ulertzea zergatik izan dituzten hainbeste traba EAJ eta Bilduk bat egiteko, biek helburu bera izanik. Alderdi mugimenduek ezin dute helburu amankomuna urrundu", amaitzen du.
2012/12/11
Perun, Limako Euskal Etxea bete egin zen bazkide eta lagunekin joan den abenduaren 3an, Euskararen Nazioarteko Eguna eta San Frantzisko Xabierren jaia zela eta. Elkarteko presidente Raul Noblecillak gogora ekarri zuenez, Euskararen Eguna historian izan den euskaldun ospetsuenetariko baten jaiarekin batera ospatzea ez da kasualitatea, santuak euskara munduan zehar eraman baitzuen bere misioetan; India, Malaisia, Japonia eta Txinara, kasu. Limako ekitaldia Euskal Etxeko abesbatzaren kantaldi batekin eta lagunarteko afari batekin osatu zen.
2012/12/10
2012a urte berezia izango da Euskaltzaleak-en historian. Arrazoi askorengandik geratuko da bere kide eta lagunen memorian markatuta, baina zalantzarik gabe, egoitza propioa erosi ahal izateak leku pribilegiatua izango du aurtengo balantzean. Horrekin batera, beste hainbat helburu betetzea lortu dituzte Buenos Aireseko euskaltegiko kideek aldaketa eta nobedade urte honetan. Horien artean, martxoan abian jarri zen On Line Ikastaroa. “Ehun ikasle izatera heldu gara eta kopuru hori ospatzeko, euskara klaserik ez duten Argentina osoko euskal etxeei beka bana eman nahi diegu”, adierazi diote EuskalKultura.com-i Euskaltzaleak-etik. Bitartean, eta topa egiteko motibo ugarirekin, Argentinako Euskaltegiak ere Euskararen Eguna ospatu zuen, abenduaren 1ean.
2012/12/10
Nafarroako presidente Yolanda Barcinak harrera egin zien Zaragozako Nafar Etxeko ordezkariei joan den astean Nafarroako Jauregiko bere bulegoan. Bisitariek euren elkarteak 50 urte bete dituela-eta argitaratutako liburuaren ale bat oparitu zioten. Zaragozatik bertaratu ziren, hiriko nafar elkarteko lehendakari Rosa Mary Ibañez eta liburuaren egilea, Arturo Navallas, eta elkarteko Mariano Romeo, Alfredo Bergua eta Concha Portero, adierazi dute exekutibotik.
2012/12/10
Unibertsitateko Euskara Sailak antolaturik, eleaniztasunari buruzko jardunaldiak egin ziren Madrilgo Complutensean iragan azaroaren 28 eta 29an. Ekitaldiek ikasleen erantzun oso ona izan zuten eta egitaraua osatzen zuten hamar hitzaldietara entzule asko bertaratu ziren. Hizkuntzalaritzarekin eta hizkuntzen arteko elkarbizitzarekin loturiko hainbat gaien artean euskarari buruzko bi solasaldi interesgarri eman zituzten Karlos Cid Abasolo eta Arantzazu Fernandez Iglesias irakasleek.
2012/12/10
Harkaitz Cano eta Mikel Ayerbe idazleak bueltan dira Euskal Herrian, azaroaren hondarrean eta abendu hasieran Mexikora egin zuten bidaiaren ostean. Guadalajarako Nazioarteko Azokan eta Mexiko DFko bi unibertsitatetan izan ziren idazleak, euren azken lanak aurkezten, Etxepare Institutuko Euskararen Sustapenerako zuzendari Mari Jose Olaziregi lagun zutela. Institutuak jakinarazi duenez bidaian burututako jarduerak "jendetsuak eta maila literario handikoak" izan dira, "eztabaidetan, editore, idazle, unibertsitari nahiz zernahi irakurlek hartu baitu parte".
2012/12/07
Iragan abenduaren 2an Bahia Blancara iritsi zen Pakea Bizkaia ontzia, Antartidarako bidean. Duela egun batzuk Necochean gertatu bezala, Bahia Blancako euskaldunak portuan bertan izan zituzten zain, harrera bero beroa egiteko. Hiri argentinarrean Unai Basurkok gidatutako marinelek Union Vasca Euskal Etxea ezagutzeko aukera izan zuten eta bertako euskaldunekin batera Euskararen Nazioarteko Eguna ospatu zuten. Bahia Blancan ontziko eskifaia aldatuta, talde berriak Antartida - Ushuaia bidea egingo du. Gaur Puerto Madrynera helduko da ontzia.
2012/12/07
Etxepare Euskal Institutuak sarean jarri ditu jada "Etxepare Munduan" argazki lehiaketako irudiak eta munduko euskaldunei horien artean gustukoena aukeratzeko gonbitea luzatu die. Argazkiak Etxeparek munduko 15 herrialdetako unibertsitatetan dituen Euskara eta Euskal Kultura irakurletzetako ikasleek eginak dira. Lehiaketa irabazten duen ikasleak Euskal Herrian euskara ikastaro bat egiteko aukera izango du sari.
2012/12/07
Teknologia berrien garaian, abiadura handiz zabaldu dira aste honetan sare sozialetan euskararen aldeko mezuak. Baina euskaldunen hizkuntzak lortzen duena fenomeno birtual bat baino askoz gehiago da eta Argentinako euskal etxe askotan topaketak eta jaiak tarteko ospatu zuten euskaltzaleek Euskararen Nazioarteko Eguna. Zenbat dakigun ez da koska ezta kezka ere. Abenduaren 3aren helburua euskara eta euskaraz disfrutatzea izan da. Hori argi geratzen da hainbat euskal etxetan burututako ekitaldiei erreparatzen badiegu. Hona argazki laburpena.
2012/12/06
Partaidetza zabala izan zuen euskal elkarteak Paranako Kolektibitateen Azokaren XXIII. edizioan. Euskal Herriaren kultura zabaltzea du helburu nagusia euskal etxeak, eta helburu hori betetzen jarraitzearren, standa muntatu eta euskal dantza ikuskizuna eskaini zuten erakundeko lagunek probintzia osoko gizataldeak bildu zituen jaian. Une ederrak bizi izan zituzten Urrundik-eko kideek bi egunetan, baina ederrenetako bat, askorentzat, Magali Gonzalez dantzaria lehenengo printzesa hautatu zutenekoa izan zen, zalantzarik gabe. Paranatik heldu zaizkigun bestelakoen artean, euskal etxekoen antzez lanaren arrakasta ere behar da aipatu. Izan ere, bi sari jaso ditu taldeak ‘Martha Stutz’-en euren bertsioagatik 2012ko Entre Rios-eko Antzerki Selekzioan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
