euskal diaspora eta kultura
2008/10/23
Eguraldi txarrak lagundu ez bazuen ere, aurten hiru urte bete dituen San Pedroko 'Ongi Etorri' Euskal Etxeak eta bere hirurogei bat bazkideek euskal komunitateari bere lekua eman zioten joan den urriaren 12an Paraná ibai ertzean kokatzen den Buenos Aires probintziako herri honetako Gizataldeen Jaian. “Urteotan, gero eta kolektibitate gutxiago datoz Azokan parte hartzera –azaldu dio Mónica Mindurry Euskal Etxeko idazkariak Euskalkultura.com-i–, baina gu indarrez beteta gaude eta aurrera goaz”.
2008/10/22
Ameriketara doazen hirugarren aldia izango da. Aurreko bietan Mexikon izan ostean, oraingoan Argentinan barrena ibiliko dira kontzertuak eskaintzen zenbait euskal etxetan, datozen egunotan gauzatuko denaren hazia Chivilcoyko Euskal Etxekoek ipini bazuten ere, EuskalKultura.com-en artikulu bat irakurri ondoren Argentinatik deituz eta ia ezin al zuten bertara joan galdetuz, duela hilabete batzuk. Kostata, baina lortu da. Bisitatuko dituzte La Plata, Mar del Plata, Bragado, Chivilcoy, Villa Mercedes, Merlo, Parana eta Buenos Aires, zortzi kontzertu eskainiz.
2008/10/22
Euskal jatorridun biztanle gehien dituen AEBetako estatuetako bat da Nevada, Kalifornia eta Idahorekin batera, eta horren jakitun, Barack Obama alderdi demokratako presidentegaiak keinua egin die bertako euskaldunei, hauteskunde-propaganda euskaraz ere argitara emanez. Goiena.net eta Sustatu.com webguneek plazaratu dute jarraian jasotzen dugun albiste bitxi hau.
2008/10/22
Angel Lertxundik eta Aingeru Epaltzak asteartean bukatu zuten Alemaniako zenbait hiritan barrena egin duten irakurraldi bira. Pahl-Rugestein argitaletxearen 'Zubiak' euskal literatura bildumak euren bi eleberri argitaratu ditu alemanez eta karia hortara Frankfurteko Azokan aurkeztu ostean lau irakurraldi eskaini zituzten Frankfurt, Berlin, Essen eta Paderborn hirietan. Biak ala biak esperientziarekin oso gustura agertu dira eta Lertxundiren esanetan Frankfurteko Azoka erraldoiaren ondoan irakurraldi txikiago hauetan 'interes berezia jartzen diote autoreari, bere obrari eta euskal literaturari'.
2008/10/21
Bordeleko Euskal Etxeko kideak loriatuta agertzen dira joan den hilabetean elkarteak egin duen 'Euskal Udazkena Bordelen' jaialdiaren emaitzarekin. Zorte pixka bat eta elkarteko kideen lan eskerga medio euskal etxeak kultur ekitaldi ugari egin ditu: erakusketak, kontzertuak, luxuzko literatur gaualdia Bernardo Atxaga, Itxaro Borda eta Kepa Junkerarekin... 'Geure ia asti guztia eman dugu horretan!', esaten digu David Mujika EEko komunikazio arduradunak, 'baina gelditzan zaigun inpresioa, alde batetik hau guztia egiteko gai izan garela da eta, bestetik ,gure elkartea indartsuago, dinamikoago eta ezagunago bihurtzen ari dela'.
2008/10/21
'Euskal Udazkena Bordelen' jaialdiaren barruan Frantziako hiri honetako euskal etxeak Bernardo Atxaga eta Itxaro Borda idazleen poesia irakurraldi bat antolatu zuen joan den larunbatean. Eurekin batera, hitzei musika jarriaz, Kepa Junkera trikitilaria izan zen. 'Ondorioa aski hunkigarria izan zen eta Keparekin berriz lan egiteko irrikitan nago', azaldu dio Bordak EuskalKultura.com-i. 'Datorren urterako irakurraldi musikatu bira bat prestatzen ari gara jada'. Bi idazleek, Mariasun Landa egilearekin batera, Bordeleko 'Lettres du Monde' jaialdian parte hartu zuten.
2008/10/21
Espainia jaun eta jabe izan da Rosarioko Nafar Etxean bukatu berri den 22 urtez azpiko Munduko Pilota Txapelketako lau modalitateetan: eskuz banaka eta binaka, pala motza eta larruzko paletan. Orotara hamabi selekziok hartu dute parte Nazioarteko Pilota Federazioak, Argentinako Pilota Federazioak eta Rosarioko Nafar Etxeak antolatutako txapelketa honetan: Argentina, Txile, Bolivia, Ekuador, Estatu Batuak, Espainia, Frantzia, Mexiko, Peru, Dominikar Errepublika, Uruguai eta Venezuela izan dira, hain zuzen, parte hartzaileak. Txapelketarekin oso gustura azaldu dira antolatzaileak.
2008/10/21
Euskal musikak berotuko ditu udazkeneko gauak Bartzelonan, bertako Euskal Etxeak antolatu duen Euskal Herria Sona! jaialdiaren edizio berri bati esker. Kontzertuak larunbat honetan hasiko dira, Seiren Taldearen eskutik eta hilabeteaz gaindi luzatuko dira, abenduaren 6a bitartean. Jaialdiaren proposamena oso zabala da: Gose, Katamalo, Benito Lertxundi, Esne Beltza eta Maialen Errotabehere izango dira bertan, besteak beste. Horrezaz gain txalaparta, euskal dantza eta haurrentzako tailerrak ere egingo dituzte, euskal kultura musika eta soinuen bidez ezagutzera emateko.
2008/10/20
Trikizio taldea ezaguna da Euskal Herriko plazetan. Euskal Herriko erromeria askotan parte hartu izan dute eta esperientzia zabala daukate jaiei giroa jartzeko orduan. Urriaren 22an eta 24an Bakersfield-en (Kalifornia) joko dute, Euskal Etxean eta Noriega euskal hotelean, hurrenez hurren, hirian 'Euskal Herria Mugaz Gaindi Mintegia' egiten ari dela-eta, eta azaroaren 8an Renon, bertako San Martin jaia eta NABO bilerarekin batera. Urriaren 21etik azaroaren 9ra luzatuko den bidaian oporrak eta euskal bilerak musikaz janztea tartekatu behar dute Trikiziokoek.
2008/10/20
Ana Agirre, Eusko Jaurlaritzako Industria sailburuak joan den ostiralean bukatu zuen Chicagon AEBtara egin duen bidaia ofiziala, hiri honetako SPRI (Industriako Sustapen eta Eraldaketarako Baltzua) euskal erakundearen egoitza bisitatuz. Agirrek bidaiaren oso balioespen baikorra egin du, asteartean Philadelphian inauguratu zuten Euskarri bulegoak euskal enpresek AEBetan izan dezaketen zabalkundean izango duen garrantzia azpimarratuz. Agirreren esanetan Euskarri AEBetarako sarbidea izango da hainbat euskal enpresarentzat.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
