euskal diaspora eta kultura
2011/04/28
Mexikoko baztandarrek urtero Maiatzaren lehenean ospatzen dute 'Baztango Eguna'. Askok urte osoan itxaroten duten elkarretaratzea da, garai batean gehienbat nafarren eskuetan zegoen ogitegi-arloko enpresa handietako baten jabegoan egiten zena eta duela urte batzuk, lekukoa hartuz, Euskal Etxea gertaleku hautatu zuena. Izan ere, baztandar andana polita biltzen du DFko Euskal Etxeak bere baitan, eta hala dira, urrunago joan gabe, etxeko egungo lehendakaria eta baita aurrekoa ere, eta Zuzendaritza Batzordeko zenbait kide. Bilkurak "gure aitzinekoak hartuko ditu gogoan, gure jatorria eta kultura maitatzen erakutsi baitziguten, hemen Mexiko segida emanez", aitortu dio EuskalKultura.com-i MariCarmen Arrechek, Mexikon jaiotako baztandarra eta ekitaldiko antolatzaileetakoa denak.
2011/04/28
Gure artean, milioika jende ari da lanean anonimotasunean eta zalaparta handirik gabe, hedabideetan agertu gabe eta ospearen atzetik ibili gabe, euren lana jator eta ondo egiten, aitzinamendua ekarriz bizi diren gizarteari. Komunitaterekiko engaiamendu isileko baina eraginkor hori duten pertsona eta erakundeei omenaldia egiteko asmoarekin sortu zuen duela zortzi urte Argentinako Tres Arroyoseko Hiru Erreka Euskal Etxeak 'Ondare Tresarroyostarra' Saria. 2011 honetan, aurreko edizioetan bezala, hiriaren urtemugaren testu-inguruan banatuko dira sariak, bihar, euskal etxearen egoitzan. Manuel Dean eta Yolanda Gilligan irakasleak eta Alicia Arevalo liburuzaina dira aurtengo sarituak.
2011/04/28
Kubako euskaldunek joan den asteburuan ospatu zuten Aberri Eguna, eta ederki ospatu ere!, bi eguneko ekitaldi sorta mardula lagun. Irlako euskaldunek antolatu zuten jaia, 'Asociación de Beneficencia Vasco-Navarra' elkartearen eta AthletiKuba taldearen laguntzarekin. Habanako Centro Vasco jatetxean egindako festa arrakastatsua izan zen, partehartzaile kopuruari zein giro ederrari dagokionez. Bi egunetan denetarik izan zen bertan: mus txapelketa, Athletic-Real derbiaren gorabeherak, musika, dantza, Erreniega abesbatz nafarraren bisita, bertsoak, 'repentistak'... Josemi Arrugaeta lagunak idatzi digu bertatik kronika.
2011/04/27
Buenos Aires probintzia argentinarrean, gauden apirilaren hasieran egin du Tandilgo 'Gure Etxea' Euskal Etxeak bere Ohiko Batzar Nagusia, bertan erabaki delarik agintealdi berri honetan Esteban Kain izango dela elkarteko lehendakari berria. Batzordekide izango ditu Juan Miguel Beguiristain, elkarteko lehendakariorde; Graciela Confalonieri, idazkari; Jorge Etchegoin Etchegoyen, idazkariorde; Jorge Gilabert Ballesteros, diruzain; Mercedes Martín, diruzainorde; eta Maria del Carmen Dindart, agirietako idazkari.
2011/04/27
Iragana ezagutzea beharrezkoa da historiako gertaera ilunenak ez errepikatzeko. Eta hori da Argentinako euskal etxeen helburua urtez urte Gernikako Bonbardaketaren urtemuga ospatzen dutenean. Herri batzuetan, etxekoen arteko ekintzak burutzen dira biktimen omenez; beste batzuetan, berriz, komunitate osoari zuzendutako ekitaldiak gauzatzen dira, euskal diasporan murgilduta ez daudenek 1937. urtean Bizkaiko herrian gertatu zena jakin dezaten. Euskal Herriarentzat hain garrantzitsua den egun honetan, Gral. Villegas hirian 'Guernica' izeneko plaza inauguratu da.
2011/04/27
Maiatzaren 2tik 5era Santa Fe-ko Unibertsitate Iberoamerikarrak Euskal Astea egingo du eta lau egunez euskal artea, gastronomia, literatura eta enpresa munduaren berri emango du, besteak beste. Gorka Larrañagak, Unibertsitateko Euskara eta Euskal Kultura irakasleak, eman du egitasmoaren berri eta bertaratzeko gonbitea egin dio Mexikoko euskal komunitateari.
2011/04/27
Necocheako Euskal Etxea Hator Hona programaren edizio berria antolatzen hasi da eta uztailean Argentinara euskal kultura irakastera etortzeko gogoa duten gazteen bila dabil. Gazteek euskara, pilota, dantza, musika... irakatsiko dizkiete bertako neska-mutilei, uztailaren 15etik abuztuaren 7a bitartean. Kultur truke hau 18 eta 30 urte bitarteko euskal gazteei zuzendua da eta Argentina eta Diasporako euskaldunak ezagutzeko modu interesgarria izan daiteke. Izena emateko epea maiatzaren 13an itxiko da.
2011/04/27
Jakina denez, idazle frangoren presentzia eta ematen duen aukera, publikoak zuzenean egileekin mintzatu eta iritziak, iradokizunak eta kritikak truka ditzan dira joan den astelehenean bere 28. edizioa bete duen Sarako Idazleen Biltzarreko ezaugarri nagusi. On Joxe Miel Barandiaranek Sarari buruz gaztelaniaz idatzi eta orain euskarara eta frantsesera ekarritako 'Bosquejo etnográfico de Sara' izan zen bertan aurkeztutako liburuetako bat. Erakusketa bat ere zabaldu zen, Fermin Arkotxaren eskutik, Agosti Xaho euskal aitzindari handiaren bigarren mendeurrena kari. EuskalKultura.com-ek, ohi bezala, bere standa izan zuen.
2011/04/26
Euskal Herriko eta Diasporako herri askotan gogoratuko da gaur Bizkaiko herriak pairatutako erasoa. Argentinan, Trenque Lauquengo euskaldunek ere euren omenaldia egin nahi izan diete gertakariko biktimei; karia horretara Picassoren margolan ezagunaren bertsio bat inauguratuko dute gaur bertan euskal etxeko areto nagusian. Bonbardaketaren urteurreneko ekitaldiaren testu-inguruan, Gernikari buruzko hitzaldi bat emango du Gral. Villegaseko Sergio Recartek eta zeremonia bukatuta, mokadu eta edariak eskainiko dira.
2011/04/26
Datozen egunotan munduko hainbat euskal etxetan Aberri Eguna ospatzeko antolatutako ekitaldien berri ematen joango gara. Pazko igandean ospatzen da Aberri Eguna Euskal Herrian. Hala ere, euskal diasporako herrialde batzuetan astebete beranduago edo lehenago egin ohi da ospakizuna, ahalik eta jende gehiago bildu ahal izateko. Hau izan da aurten Buenos Aires probintziako Beti Aurrera Euskal Etxearen kasua. Chivilcoyko lagunek afari erraldoi bat antolatu zuten apirilaren 16an, hamaika euskaldunentzat hain garrantzitsua den efemeridea gogoratuz hitzez eta dantzez, inguru herrietako lagunak partaide.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
