euskal diaspora eta kultura
2011/06/01
Bakersfield-eko euskal besta, herrian egoitza duen 'Kern County Basque Club'ek antolatuta, bere 39. ediziora heldu da joan den asteburuan. Inguru kaliforniar honetako euskaldunak Bakersfield-eko euskal etxean bildu dira eta bere berdeguneak, pilotalekua eta bestelako aretoak bete dituzte, urtero bezala pilotak leku berezia izan duelarik, Euskal Herritik propio ekarritako pilotariekin, NABO pilota finalekin, Mus txapelketarekin eta jai giroko hamaika dantza eta musika ekitaldiekin. Horren guztiaren aurrekari izan da ostiralean CSUBen (California State University, Bakersfield) egin den Euskal Simposiuma, Boisetik eta Renotik etorritako hizlariekin.
2011/06/01
Hanna Lantto finlandiarra Euskal Herriko Unibertsitatean izan da azken urtean, Helsinkiko Unibertsitaterako tesia prestatzen. Tesiaren gaia euskara eta gaztelaniaren arteko 'code switching'-a da, alegia, esaldi berean bi hizkuntzak erabiltzeko gaitasuna. Lantto orain dela zazpi urte hasi zen euskara ikasten, eta Helsinkiko Unibertsitatean Euskara eta Euskal Kultura irakurlea da.
2011/05/31
Paraguai herrialdearen ibilbide independentearen ildoari ekin zion urtearen Bigarren Mendeurreneko ospakizunen baitan
kokatu du Asunciongo 'Jasone' Euskal Etxeak bihartik aurrera eta Euskal Astea izenpean garatuko duen ekitaldi-programa. Miguel Angel Elkoroberezibarren Domingo de Iralari buruzko liburu baten aurkezpenak zabalduko ditu ekitaldiok, idazlea bertan dela eta Euskal Etxeko lehendakari Galo Eguez-en eskutik. Datorren larunbatera arte, musika, gastronomia, turismoa eta euskara arloko ekimenak gauzatuko dira, besteak beste Jaurlaritzako Julian Celaya Kanpoko Euskal Herritar eta Gizataldeentzako zuzendaria eta Mercosur-erako Euskadiko ordezkari Elvira Kortajarena zein Espainiako enbaxadore Juan Fernandez Trigo bertaratuta.
2011/05/31
Argitxu Camus historialari zuberotarra 1980ean jaio zen Mauletik bost kilometrotara dagoen Onize Pea herrixkan. Gaztea ia sei urtez izan da Amerikako Estatu Batuetan, immigrante euskaldunen egoera eta nortasuna ikertzen. Renoko Unibertsitatean doktoretza bukatu ondoren bertako Euskal Ikerketarako Zentroan aritu da lanean. Reyes Ilintxeta kazetariak Argia aldizkarian egin dion elkarrizketa honetan bizitakoaz eta inoiz immigrantearen sindromea sufritu izanaz ere mintzatzen da Argitxu.
2011/05/31
Mallorcako Artea Euskal Etxeak ekitaldi ugari egin ditu maiatzean Palmako egoitzan, San Prudentzio jaieko ospakizunarekin hasi eta urteroko Mus Txapelketaraino. Tartean, euskal elkarte honetan arrakasta handia duen klasiko baten txapelketa ere egin zuten: igelaren jokoa. Orain elkartea ekainean egingo den kurtso bukaerako jaia ari da prestatzen eta horrekin agur esango du ofizialki datorren iraila bitartean.
2011/05/31
Argentinako hainbat herritako euskal etxeak beren egoitzak eta ibilbideak oraindik eraikitzen ari diren bitartean, Hego Ameriketako herrialde honetako beste euskal etxe batzuk, joan den mendearen hasieran etorritako euskaldunek sortuak, mendeurrena betetzeko bidean daude honez gero. Hauxe da Rosarioko Zazpirak Bat Euskal Etxearen kasua. Santa Fe probintzian Euskal Herriko kultura eta nortasuna babestu eta hedatzeko asmoarekin jaio zen erakundeak 2012an egingo ditu ehun urte eta etxeko kide eta lagunek ospakizunaren antolakuntzari ekin diote apirilaren amaieran.
2011/05/30
Nola azaldu 'Olentzeroren Malutak' ipuina australiar neska-mutilek osaturiko entzulegoari? Bada, irudi bidez, Eider Eibar ilustratzailea egunotan egiten ari den bezala. Cervantes Institutuak gonbidatu du Eider Australiara, eta maiatzaren 20az geroztik hamar bat lantegi eta emanaldi egin ditu jada: Sydney-en, Melbourne-n, Adelaide-n eta Australia Hegoaldeko Roxby Downs-en. Atzo igandean Sydneyko Gure Txoko-ko haurrentzako emanaldi berezia egin zuen.
2011/05/30
Beasaindarra da Gorka Larrañaga, baina orain dela lau urte irakasle dabil Mexikon, Santa Feko Universidad Iberoamericanako Euskara eta Euskal Kultura irakurletzaren buru. Urtetik urtera euskararen inguruan zaletu talde xume baina fidela sortzen ari dela dio, eta bere aburuz etorkizunean euskal kulturaren alde jardungo duenik izango da bertan. Berak, baina, ez du irakurle bezala jarraituko; margolari arloan sakonduko du, Casa Galería kultur egitasmoaren bidez.
2011/05/30
Jaioterriko ohitura eta kultura babestu eta hedatzea da diasporaren helburuetako bat. Hala ere, immigranteak jaso zituzten herrialdeak ezinbestekoak dira diasporaren kontzeptua ulertzeko. Diaspora ez da eraikitzen beren jaioterrian bizi ez direnekin soilik; nortasuna bi etorburutatik eraikitzearen ideia abesgarria da oso fenomeno honen nozioaren garrantzia argitzeko. Duela hilabete, Aberri Eguna ospatu zen hainbat euskal etxetan. Joan den astean, eta izpiritu berarekin, maiatzaren iraultzaren urtemuga ekarri zen gogora Argentinan euskaldunen erara. Hona hemen, ospakizun batzuetako laburpena.
2011/05/30
Euskal etxearen araudiak dioenari jarraiki, Zuzendaritza Batzordea berritua du epe berri baterako Pehuajoko 'Etxe Alai' Euskal Etxeak, Argentinako Buenos Aires probintzian. Ondorioz Alejandro Maggio Curutcher sartu da lehendakari eta berarekin batera dauzka batzordekide Maria del C. Bevilacquia Escudero, idazkari, eta Maria Elena Azurabarrena, diruzain, besteak beste.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
