euskal diaspora eta kultura
2011/06/10
Zabaldu berria du Nafarroako Gobernuak atzerrian unibertsitate ikasketak egin nahi dituzten ikasleentzako laguntzak eskatzeko epea. "Nazioarteko mugikortasunerako unibertsitate programen laguntza osagarriak" izeneko hauek Erasmus, Sokrates, ISEP, Palafox eta gisa horretako programetako ikasleentzat dira. Eskatzaileak sortzez nafarrak edo aurreko bi urteetan Nafarroak erroldatuak beharko dute izan. Eskabideak aurkezteko epea irailaren 30ean itxiko da.
2011/06/10
Buenos Aires hiriburutik 222 kilometrora dago kokatuta Pergamino eta Buenos Aires probintziako beste hainbat herrik bezala euskal jatorrizko biztanle ugari dauka. Euskal etxe bat sortzeko asmoarekin bildu ziren Pergaminoko euskaldunek XX. mendearen erdialdera, eta Lagun Onak sortu zuten. Sei hamarkada joan dira eta Pergaminoko euskal etxeko kide eta lagunek erakundearen 60. urteurrena ospatuko dute aurten, komunitateari zuzendutako hainbat proposamen eginez: datorren astetik hasita, dantzari ohien topaketa, Udako Euskal Unibertsitateko hitzaldiak eta Arrondoren bisita izango dira urtean zehar gauzatuko diren ekintzetako batzuk.
2011/06/10
Doctor Deseo taldeak bidaia egingo du Mexikora hil honen erdialdera eta 'Deseo: Cartografía imposible" izeneko azken lana aurkeztuko die bere zale mexikarrei. Herrialde honetan jarraitzaile fidelak ditu taldeak eta azken hamar urteetan musikarien bisita noiz jasoko zain izan dira. Bada, azkenik, hilaren 21ean kontzertua emango du Doctor Deseok Mexiko hiriko Lunario antzokian. Aldez aurretik, hilaren 17an, DFko Euskal Etxean izango dira bilbotarrak, bertako euskaldunak ezagutzeko. Kontzerturako sarrerak zozketatuko dituzte topaketan.
2011/06/09
Argentinako Buenos Aires probintzian kokatuta dagoen Jose C. Paz herrian, Urteko Batzar Nagusia egin du 'Toki Eder' Euskal Etxeak eta, besteak beste, agintealdi berri arituko dira Zuzendaritza Batzordean Joxe Erostarbe Aramburu, lehendakariorde; Lidia Lucía Lechardoy Etcheberry, idazkari; Maria del Pilar Uribeondo, idazkariorde; Alfredo Jose Ormazabal, diruzain; eta Dario Guillermo Rodríguez, diruzainordea.
2011/06/09
Urduri dira Berlingo Euskal Etxeko kideak, elkarteko dantza talde gazteak igande honetan egingo duen jendaurreko lehen emanaldia dela eta. Ez da gutxiagorako, izan ere, 700.000 berlindar izango dituzte begira Karneval der Kulturen jaialdiaren kabalkada erraldoian. Hiriko gizataldeek hartzen dute parte jaialdi koloretsu honetan, bakoitzak bere herriko kultura, dantzak eta jantziak erakutsiz. Euskal Etxeko dantzariek Euskal Herriko zazpi probintzietako dantzak eta jantziak erakutsiko dituzte.
2011/06/09
New Yorkeko Eusko Etxea elkarteak musika gaualdia egingo du etzi, Amaia Arberas kantari gipuzkoarraren emanaldi batekin. Arberas sopranoa da eta urtean zenbait alditan New Yorken izaten da bertako maixuekin kantu lezioak hartzeko. Oraingo aldi honetan Sagar Handiko euskaldunentzako bereziki prestaturiko kontzertua eskainiko du. Emanaldian 'Ameriketara joan nintzan', 'Hara nun diran' eta 'Ume eder bat' bezalako euskal kantu klasikoak abestuko ditu.
2011/06/09
Euskal Herriko antzinako ohiturak eguneratu egiten dira euskal etxeen esparruan egiten den ekintza eta jai bakoitzean. Dantza, musika, janariaren inguruan sortzen diren topaketa eta ospakizunek gaur egunera ekartzen dituzte gure arbasoen sinesmen eta sineskeriak, asmoak, gustuak eta, zergatik ez, beldurrak. Duela urte batzuk eta helburu honekin, Chivilcoyko euskal etxean San Juan gaua ospatzen hasi zen. Ospakizunak arrakasta handia izan du herrian, eta lagun mordoa biltzen da panpina erraldoiaren erretzea ikusteko. Partaidetza hori bultzatzen jarraitzeko, proposamen polit bat dakarkigute aurten Beti Aurrera euskal etxeko kideek: ekainaren 20an erreko den panpinaren izena aukeratzea. Zozketa baten bidez hautatuko den izenaren asmatzaileak oroigarri bat irabaziko du.
2011/06/08
Miguel Sanz Nafarroako jarduneko lehendakariak Karlos III.a Prestuaren Gurutzea ezarri zien atzo, Iruñeko Nafarroako Jauregiko Jargi Aretoan eginiko zeremonian, nafar diasporako Crisanto Ayanz eta Agustin Otondori, lehenari Argentinako nafar etxeetan kanpoko nafarren alde eginiko lanengatik eta Otondori Txileko Santiagotik bertako Nafar Etxea sortzen eta azken hogei urteetan laguntzen gauzatutako ahaleginengatik. Eurekin batera, hiru erakunderi ezarri zien errekonozimendu bera, Elikagai Bankuaren, Esku Elkartuen eta Gizakia Helburu elkarteen Nafarroako ordezkaritzei.
2011/06/08
Maiatzaren 25etik 28ra Argentinako Euskal Federazioko lehendakaria den Ricardo Basterrak eta Marta Abarrategui idazkariak Concepcion del Uruguay, Concordia, Santa Fe, Parana eta Rosarioko euskal etxeak bisitatu dituzte. Herri guztietan, euskal erakundeetako batzordekide eta lagunak elkartu ziren FEVAko agintariekin eta bileretan zein otorduetan egindako lana eta etorkizunari begirako proiektuak komentatu zizkioten elkarri.
2011/06/08
Pop-up bar izeneko ekitaldia da Chicagon egin berri den Txakoholika gastronomia dastaketa: urtean behin antolatzen den taberna da eta jakinaren gainean dauden adituek baino ez dute horren berri. Chicagoko 'underground' zirkuituko chef talde batek antolatzen du eta aurtengoa hirugarren edizioa izan da jada. Euskal Herriko txakolina eta sagardoa izan ziren hitzorduko izarrak, pintxo aukera zabalarekin batera. Chicagoist blogean argazki erreportajea argitaratu dute.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
