euskal diaspora eta kultura
2012/12/19
Bizi-bizi amaitu du urtea Sao Pauloko Eusko-Brasildar Etxeak; izan ere, azken asteotan burutu diren ekintzen artean euskara ikastaroak, txistu eskolak, Olentzeroren etorrera eta Gabonetako bazkaria egon dira. Aipagarria da, bestalde, elkarteko talde batek Uxia kantari galiziarrarekin batera "Txoria txori" kantua abestu zuela --euskaraz, noski-- Sao Pauloko Instituto Cervantesen egoitzan.
2012/12/19
Joan den larunbatean Iñigo Urkullu lehendakari berriak bere kargua zin egin ondoren, pixkanaka urratsak ari dira ematen administrazio berria osatzearren. Exekutiboko zortzi sailburuak izendatu eta hauek astelehenean Ajuria-Enean karguak hartuta, atzo asteartea lehenengo Gobernu-bilera egin zen, Urkullu buru. Onartu zen, besteak beste, aurreko karguak kentzen eta berriak izendatzen hastea, horien artean orain arteko Kanpo Harremanetarako idazkari nagusi Guillermo Echenique eta Gizataldeetarako zuzendari Julian Celayaren kargu-uztea. Biek, Echeniquek eta Celayak, azken agur gutuna zuzendu zieten atzo munduko Euskal Gizataldeei.
2012/12/19
Murtziako Euskal Etxeak Kultur Asteburua egin zuen iragan abenduaren 14tik 16ra eta arrakasta handia izan zuen ekimenak. Hiru egunetan zehar elkarteak besteak beste poesia eta musika ikuskizun bat, Eguberri bazkaria eta tortila eta mus txapelketak egin zituen. Ekitaldiak oso arrakastatsuak izan dira eta jende berria ekarri dute elkartera, izan irakurraldira bildutako literaturzaleak, izan Olentzero ikustera inguratutako bazkide nagusien seme-alaba eta bilobak. Hain zuzen ere, hori da euskal etxeak 2013rako ezarri duen helburuetako bat: elkartera bazkide berriak erakartzea.
2012/12/19
Komunitatearen beharrak kontuan hartuz eta herritarren eskaerari erantzunez, La Pampa probintziako General Acha herriko euskal etxeak hiru hilabeteko berritze lanak egin ditu bere igerilekua egokitu eta klimatizatzeko. Egitura berria bukatutakoan, igerilekua protokolozko ekintza batekin inauguratu zen joan den ostiralean, izen handiko Jose Meolans eta Eduardo Otero igerilarien partaidetzarekin. Igerilekuak araudiaren araberako neurriak ditu –10 x 25m– eta hobekuntza honekin urte osoan zabalduko zaio publikoari. Hau ez da, ordea, Euzko Txokoak komunitateari eskaintzen dion baliabide bakarra. Bere instalazioetan euskal pilota, saski baloia eta patin eskolak ere ematen dira.
2012/12/18
Gabon kanten letrak eta doinua zure mobilean eta edozein unetan eskuragarri izan nahi al dituzu? Bada, Arrasateko Skura Mobile enpresak Android sakelakoentzako "Euskal Gabon Kantak" aplikazioa sortu du zuretzako. Doan deskarga daiteke eta berari esker zure mobilean izango dituzu Euskal Herrian sasoi honetan gehien entzuten diren abestietako batzuk: Alaken, Din dan don, Dringilin dron, Elurra teilatuan, Erregeak, Gaueko izar, Gau ixila, Hator hator...
2012/12/18
Rosarioko Zazpirak Bat Euskal Etxearen iritzi eta pentsamoldeen adierazle den 'Euskaldun hitza-Gora Euskal Herria' irratsaioak zilarrezko domina jaso du abendu honetan, 2012ko Libertad Sarien emanaldian. ‘Libertad Sariak’ gizarte eta gizakien aldeko lana -kultura, kazetaritza, politika eta enpresaritza arloetan- egiten dutenei ematen zaie urtero. Zazpirak Bat-eko Luis Maria Barrandeguy aurkezle nagusia duen saioa uhinetan zein interneten entzun daiteke astero eta Euskal Herriko musika, berriak, elkarrizketak eta oro har euskal kultura bere osotasunean zabaltzea du helburu.
2012/12/18
Munduko hainbat euskal etxek jaso dute jada Olentzeroren bisita, eta beste asko eta asko ikazkin magikoari ongi etorria prestatzen ari dira jada. Euskal etxe bat gertu ez dutenentzat, edo Euskal Herrian familiako txikiekin Olentzerori buruzko jarduerak eta jolasak egin nahi dituztenentzat, interneten dago aukera. Jarraian Olentzerori buruzko zenbait webgune biltzen ditugu eta, horiekin batera, aurtengo azken nobedadea ere: telefono mugikorrentzako Olentzeroren aplikazioa!
2012/12/18
La Platako Unibertsitateko ikasle talde batek bultzatuta, martxoan proposatu zitzaion euskal etxeari erakundeko Itsuen Futbol Taldea sortzea. Zuzendaritza Batzordeak gustura onetsi zuen proiektua eta tokia emateaz gain beharrezkoak ziren egokitze lanak egin zituen eraikinean jokalariak egoki ibili ahal izateko. Euskal etxearen babesarekin, Argentinako Itsuentzako Kirol Federazioan sartzea lortu zuen taldeak eta hortik aurrera nazio mailako lehian sartzea. Abenduaren 1 eta 2an futbol erakustaldi bat eskaini zuten kirolariek Moreno Plazan, Buenos Aires probintziako hiriburuko Gizataldeen Azokaren baitan.
2012/12/17
Munduan zehar harrera oso ona izaten ari da Asier Altuna zuzendariaren "Bertsolari" filma eta nazioarteko ikusle askok interes handiarekin jaso dute bertsolaritzaren mundua era poetiko eta ulergarrian azaltzen duen lan hau. Horrela izan zen ere iragan azaroaren 28an, Kaliforniako Stanford unibertsitatean. Euskara eta euskal kultura irakurletzaren baitan antolatu zen emanaldia, Euskararen Nazioarteko Egunaren karira, eta bertara hurbildu ziren ikasle zein irakasleek saioaren ondorengo galdera-erantzunen tartean gaiari buruzko jakinmin handia erakutsi zuten.
2012/12/17
Maria del Carmen Itza buru duen Balcarce’ko Euskaldunak Euskal Etxeko lagun talde batek deialdi berezi bat plazaratu du azken egunotan. Sare sozialetan eta herriko hedabidetan argitaratutako gutunean Buenos Aires probintziako herri honetako euskal etxearen egoera azaltzen da eta azalpenarekin batera gonbite bat luzatzen zaie hiriko euskal jatorriko lagunei. Oharraren helburua argia da: jendea euskal etxera hurbiltzera gonbidatzea instituzioaren bizitasuna berreskuratzeko. “Euskal Etxea Euskal Herriko kulturaren ordezkaria da herrian eta gure sorlekuarekin lotura mantendu nahi dugunon bilgunea. Baina gaur egun jende ezagatik ezin diegu lehen egiten genituen ekintzei aurre egin”, adierazten dute euskal etxeko arduradunek. Hitzordua bihar da, 20:00etan, General Balcarce klubean 17. kaleko 733 zenbakian.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
