euskal diaspora eta kultura
2012/10/02
Sortu berria baina pauso tinkoz hazi eta sendotzeko bokazioz ekin dio ibiltzeari Polonian jaio berria den GU elkarte euskal poloniarrak. Abiatu ere, argazki lehiaketa baterako deia zabalduz abiatu da, hauxe baita jendaurrean plazaratzen duten lehendabiziko proposamena. Parte hartu nahi duen orori dago zabalik eta argazkitu beharreko gaia "Erakutsi ezazu Polonia edo Euskal Herriko hoberena, ezezagunena, bertakoena" leloarekin adierazi dute. Animatu zaitez, irakurle, eta hedatu deialdiren berri. Euskal Herrikoa edo Poloniakoa bazara, argazki berri esanguratsuren bat egin eta bidal dezakezu. Diasporako beste lekuren batetik irakurten baduzu, baliteke inoiz Euskal Herrian egindako argazki dotoren bat egokia izatea lehiaketarako. Ahal duzula, ez utzi eta parte hartu. Lanak aurkezteko epea urriaren 30a da.
2012/10/02
Argentinako gizatalde euskaldunak eta bereziki Rosario hiriak Zazpirak Bat Euskal Etxeko lagunak lagundu zituen euren erakundearen ehungarren urtemugan. Ospakizunak urte hasierarekin abiatu baziren ere, abuztuan gauzatu dira ekimen garrantzitsuenak, Mendeurreneko Afaria barne. Oraintxe bertan, ordea, Rosarion egingo den 2012ko Euskal Aste Nazionalari zuzentzen zaizkio begirada guztiak. Izan ere, Rosariora ekarri zuen Zazpirak Bat-ek Argentinako euskal jai nagusiaren antolakuntza, Mendeurreneko ospakizunen barne.
2012/10/02
Irailaren bukaera aldera Medellinera bidaia egin zuen Eusko Jaurlaritzaren Kolonbia, Venezuela eta Ertamerikarako ordezkari Iñaki Martinezek, Antioquiako hiri honetan euskal komunitateak antolatutako hitzaldi batean gonbidatu gisa parte hartzeko. Solasaldiaren gaia "Picasso y Jorge Oteiza, hilo de continuidad en la obra Gernika", Libe de Zulategi euskal-kolonbiarrak emanik, Udal Liburutegi Publikoan. Bestalde, aste honetan Kolonbian da SPRIko zuzendaria, Tomas Orbea. Barranquillako Hiri Iraunkor Nazioarteko Foroan parte hartuko du Orbeak, Euskal Herriko esperientzia eta Bilboren birsorkuntzaren kasua azaltzeko.
2012/10/01
Donostiako Gaztelupe Ganbera Abesbatzak bidaia abiatuko du gaur Estatu Batuetako Mendebalde kostaldera, urtero ohi duen bezala turismoa eta emanaldi batzuk, euskal etxeetan edo euskal gizataldeei lotuak, uztarturik. Kantariekin batera, hirurogei pertsonako taldea doa laguntzaile. Bi emanaldi eskainiko dituzte, Nevadako Renon eta Kaliforniako San Frantziskon, lehenengoa Bilbo, Donostia eta Pauera ikasle amerikarrak bidaltzen dituen USAC unibertsitate-erakundeko buru den Carmelo Urza medio antolatua eta bigarrena, San Frantziskoko 'Basque Cultural Center'en eskutik, elkarte honek South San Frantziskon duen egoitzako auditorium-ean.
2012/10/01
AEMIk, Migrazioen Elkarte Europarrak, urteroko bilkura eta mintegia egin zituen iragan astean, irailaren 26tik 30era, Poloniako Cracovia hirian. Europako migrazio erakunde, museo eta elkarteetako ordezkari asko bildu ziren bertara, eta horien artean euskal ordezkaritza bat ere izan zen. Bileran parte hartzeaz gain euskal ordezkariek --Kanpoan diren Euskal Herritarrentzako eta Gizataldeentzako Zuzendaritzako teknikari Benan Oregi eta Oscar Alvarez Gila, EHUko historialaria-- hitzaldia eman zuten mintegian. Txinarako euskal emigrazioa izan zen gaia, aurreneko misiolariekin hasi eta gaur egungo Shanghaiko Euskal Etxea sortu duten profesional gazteenganaino helduz.
2012/10/01
Madrilgo Euskal Etxearen egoitzaren 30. urteurrena gaur eta bihar urriaren 1 eta 2an beteko da eta euskal elkarte madrildarrak gaurtik aurrera ospatuko du, astean zehar egingo dituen hainbat ekitaldi berezi antolaturik. Ospakizunak larunbatean bukatuko dira, elkartearen urteroko Euskal Jaiarekin. Aurreko bi edizioetan bezala, festa Retiro parke ezagunean egingo da eta Euskal Herritik iritsiko diren taldeak gonbidatu dituzte bertara: Kukai dantza taldea, Zumarraga-Urretxuko Irrintzi euskal dantza taldea, Bilbao Mapa Mundi taldea eta Iñaki Plaza & Band euskal folk taldea.
2012/09/29
Aurten Rosarion urriaren 26tik 28ra bitartean egingo den Euskal Argentinar Aste Nazionalak deitutako Testu eta Kartel Lehiaketan, helduenean edo txikienenan, parte hartzeko asmoa bazeneukan eta oraindik egin ez baduzu, erne egon zaitezke, azken aukera baitaukazu zure lanak bertara bidaltzeko. Irailaren 30a izan da ipinitako epe muga, nahiz eta, antolatzaileek EuskalKultura.com-i adierazi diotenez, malgutasunez jokatuko duten epeari begi zabalez begiratuz, baina dena den, epea gainean da eta zeure lana(k) nabarmentzeko aukerak ere datozen ordu edo egunetan ahituko dira. Parte hartu nahi izatekotan, egizu berehala!
2012/09/28
Santiago Euzko Etxearen albistari digitalak, Berriketarik, irailean zehar euskal elkartean egin diren jarduerak jasotzen ditu azken alean. Horietako bat izan zen, adibidez, Euzko Etxeko frontoian jokatu zen Txileko Trinkete Txapelketa (eta irabazlea, gainera, etxeko bikote bat izan zen: Yona Dannuncio eta Miguel Ramirez). Horrez gain, euskal etxeak Winnipeg ontziaren etorreraren 73. urteurrena gogoratu zuen. Barku honetan heldu ziren errefuxiatuek abesbatza osatu zuten bidaian, eta handik sortu zen egungo elkarteko Euskal Abesbatza. Koruko kideek omenaldi berezia jaso zuten ospakizunean.
2012/09/28
Gernikako bonbardaketaren 75. urteurrena kari ekitaldi bereziak antolatzen ari da aurten Berlingo Euskal Etxea eta ekitaldi horietako bat da urriaren 30ean abiatuko den Euskal Zinemaldia. Euskal elkarteak tamaina honetako egitasmoa burutzen duen lehen aldia izango da eta egitarau zabala prestatzen ari da. Behin-behineko programaren barruan Alemaniako hiriburuan ikusgai izango dira besteak beste "Bertsolari" eta "Zuloak" dokumentalak, "Izarren Argia" luzemetraia eta "Gartxot" animazio-filma, besteak beste.
2012/09/28
Donostiako Zinemaldiko Zabaltegi-Bereziak atalean aurkeztu zuen Zuloak dokumentala Fermin Muguruzak. Zuloak musika taldearen ibilbidea jarraitzen du filmak, eta haren kontzertu eta entseguen irudiak biltzen ditu. Dokumentala aurkeztu baino ordu batzuk lehenago, ordea, dokumentala 'faltsua' dela argitu du Muguruzak, hau da, taldea dokumentala egiteko propio sortu dutela. Dena den, badirudi fikzioa errealitate ere bihurtu dela, eta dokumentalaren harira taldea egiazki oholeratu eta bira bat egingo du atzo bertan Donostian egindako emanalditik hasita eta azaroaren 24ra bitartean. Euskal Herrian ez ezik, Madril, Bartzelona, Ourense, Berlin eta Mexiko Hirian izango dira.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
