euskal diaspora eta kultura
2014/07/01
Atzo astelehena, ekainaren azken egunean, hasi zuten Maizpide barnetegiko egonaldia Ipar Ameriketatik heldutako bost ikaslek. Asteartean heldu zen Lazkaora (Gipuzkoa) azkenengoa. Mary Araquistain, Helen Faulkner eta Ysabel Bilbao Idahotik helduak dira, David Pérez-ek Kaliforniatik egin du bidaia, Norvegiar jatorriko Daniel Henriksen ere badago taldean, bai eta Illinoiseko Xabi. Bi astez arituko dira bertan, egunean zortzi orduz euskara ikasten.
2014/07/01
Iñigo Rementeria genealogian adituak orduak eta orduak eman ditu Bizkaiko eta Gipuzkoako artxiboetan, pasio eta denborapasa bihurtu zaizkion ikerketan murgilduta: hainbat abizenen jatorri izan ziren baserriak aurkitzen eta zerrendaratzen. "Gure Abi Izenak" liburuan ia 10.000 abizenen jatorrizko etxeak bildu eta argitaratu zituen, eta orain Antzinako genealogia elkartearen eta EuskalKultura.com-en bitartez eskuragarri jarri du lan hori, doan kontsultatu eta deskargatu daitekeen PDF bat medio. Eskerrik asko, Iñigo!
2014/07/01
Beti Aurrera Aberri Etxea-k bere ateak irekiko dizkio gaur komunitateari, etxeko kide eta lagunek azkenaldian egoitzan egindako lanak ikusi ahal ditzaten. Etxearen berritze prozesua nola izaten ari den argi erakusteko, gainera, garapena urratsez urrats islatzen duten irudiak proiektatuko dituzte. Hitzordua gaur da, arratsaldeko 5etan, Viedmako Alberdi kaleko 169. zenbakian. Berri honekin batera San Fermin eta San Ignazio ospatuko dituztela jakinarazi digute Viedma eta Patagoneseko euskal etxetik.
2014/06/30
Bahia Blanca hiri argentinarreko Rivadavia Liburutegiko Aguirre Aretoak Ignacio Diaz Olano pintore gasteiztarraren (1860-1937) erakusketa bat zabalduko du gaur iluntzean, bertako Union Vasca euskal etxearen eskutik. Gasteizen jaio eta hila, Diaz Olanok Gasteizen eta Erroman ikasi zuen eta marrazkigile, ilustratzaile eta margolaria izan zen. Bere lanek inguruari kendutako gaiak islatzen dituzte. Erakusketa ekainaren 30etik uztailaren 12ra egongo da zabalik.
2014/06/30
Iragan ekainaren 22az geroztik Elkon dira AEBetako euskal komunitateko 65 neska-mutil, NABO euskal etxeen federazioak urtero antolatzen duen Udalekuan. Uztailaren 4a bitartean izango dira bertan, euskal kultura ikasten eta gozatzen: dantza, euskara, txistua, musa, pandero, makila eta pala ikastaroak egiten ari dira eta Udaleku 2014 Facebookeko orrian egunero argitaratzen dituzten argazkietan argi ikusten da ederki pasatzen ari direla. Hona hemen irudi horietako batzuk.
2014/06/30
“Madryn al Plato” (Madryn Platerean) du izena Patagoniako Chubut probintziako Puerto Madryn hiriak antolatzen duen turismoa eta eskualdeko elikagaiak sustatzeko jaialdiak. Ekitaldiaren baitan ekintza ugari garatzen dira, tartean 50etik gora stand biltzen dituen Ekoizleen eta Diseinu Azoka. Etorritakoengatik Euskal Etxea feriako partaide izan da aurten ere, sei pintxo mota ezberdin eskainiz. Antolatzaileen gonbidatu berezi gisa, bestalde, gastronomia eskola eskaini zuen programa barruan Borja Blazquez sukaldari donostiarrak. Buenos Airesen finkatutako sukaldaria, oso famatua da Argentina osoan eta euskal etxeko kideekin bildu eta elkarrizketatu zen.
2014/06/30
Mara Davis Boiseko Ikastolako zuzendariak Euskalkultura.com-i adierazi dionez, zeinu hizkuntza irakatsiko diete, uda honetan zehar, Idahoko hiriburuko haur-eskolan diharduten umeei. “Udako programak bereziak izaten dira beti, hezkuntzan zentratzen garelako baina modu bereziki entretenigarrietan”, azaldu du Berriatun erro sendoak dauzkan boisetar irakasle euskal-amerikarrak.
2014/06/27
Ekainaren 21etik Gasteizko Olabide Ikastolako hamar gazte Estatu Batuetako Boisen dira, Idahoko hiriburuko Bishop Kelly Ikastetxeko ikasleekin burutzen ari diren trukean. Ikasle gasteiztarrek hiru aste igaroko dituzte Boisen eta ondoren Boiseko ikasleak izango dira Gasteiza joango direnak. Aurten, Ibon Portularrume irakaslea boiseratu da ikasle euskaldunekin, orain urte batzuk Necocheako (Argentina) Ikastolan egonaldia egindako berbera. Dagoeneko Dave Bieter alkate boisetarrak errezibitu ditu trukean diren hamar gazte gasteiztarrak.
2014/06/27
Argentina eta euskaldunak polito lotzen dituen erakusketarekin batera, hitzaldi programa oparoa eta euskal zinea eskainiko zaizkie hiriko Legebiltzarreko ‘Salón de las Dos Constituciones’ aretora bertaratzen diren lagunei. Argazki erakusketa osatzen duten panelak uztail osoan egongo dira bertan ikusgai, sarrera libre eta doakoa. Erakusketa, Ospitalea, Euskal Kultur Erakundea eta Euskal Argentina elkarteei zor zaie, hona ekartzearen babesle Frantziako Enbaxada, Posadaseko Euskal Jatorri Euskal Etxea, Ekologia Ministerioa eta Probintziako ordezkarien Ganbara izan direlarik. Bestalde, gomitea luzatu du euskal etxeak datorren astelehenerako, bere euskal zine zikloko azken saiorako: Sukalde Kontuak filma emango dute.
2014/06/27
Uztailaren 4 eta 5ean egingo da Pelotas hirian Brasilgo 1go Euskal Kultura Topaketa, Rio Grande do Sul Euskal Etxeak antolatuta. Mintegiak Brasilgo euskal komunitatearen babes zabala lortu du eta nazioarteko hainbat adituen parte hartzea ere izango du, tartean Juan Jose Ibarretxe lehendakari ohia (Lehendakari Agirre Center-en ordezkari) eta Argentinako euskal komunitateko kide Cesar Arrondo (La Platako Unibertsitatea) eta Jorge Beramendi (Juan de Garay Fundazioa).
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
