euskal diaspora eta kultura
2016/11/15
Bukatu berri den Necocheako 2016ko Euskal Asteak irudi ugari utzi dizkigu; guztietan Atlantikoaren bi aldeetako euskal jendea ageri da senide, Euzko Etxea elkarte anfitrioiak prestatutako ekintzetan parte hartzen. Urtebete gehiago, euskal herritarren eta euskal diasporako partaide eta ordezkarien bilgune bihurtu da Euskal Astea, bileretan, ikuskizunetan, otorduetan eta erromerietan. Segidako artikulu honetan, argazki galeria osatzen jarraitzen dugu.
2016/11/15
Iragan azaroaren 12an egun berezia izan zuen Venezuelako euskal komunitateak, Aragua Bailarako Euskaldunen Monolitoaren inaugurazioarekin. Monolitoan omenaldia egiten die 1768an bailaran belar-urdina edo "añil" izeneko kolorantea landatzea erabaki zuten euskaldunei, inguruotako historian industria oso garrantzitsua izan zelako. Ekitaldi honekin Venezuelako Euskal Etxeen Federazioak abian jarri du "Euskaldunen Bidea" izeneko egitasmoa, Venezuelako euskal historia argitara ekartzeko asmoz. Aurki, bideoa Jazoera Tv kanalean.
2016/11/15
Orain urte batzuk plazaratu zuen "Cocina vasca campesina-Euskal baserri sukaldaritza" (sic) liburuak segitzen du interesa pizten, bere aitona-amona immigranteei bildu eta 178 orrialdetan banatutako 50 errezetei garai bateko euskal moldeen kutsua baitarie, hamaika plater eta prestaketak aitzaki ezinhobea baitira pasadizo eta ixtorio bidez izaera eta nortasun baten lekukotasuna emateko. Marita Echave izan berria da Canal 13 telebistako "A mi manera" saioan, Rio Cuartoko Gure Ametza EEko lagunekin batera, eta elkarrizketa eman dio bertako El Puntal egunkariari.
2016/11/14
Asteburu osoan Necocheako Euskal Etxea eta herriko zenbait kale eta esparru kolore txuri-gorri-berdez jantzi dira Argentinako bazterretako eta inguruko Uruguai, Brasil eta Txileko lagun eta partaideak ere errezibitzeko. Gaur argitaratzen dugun laburpen eta argazki galeria orokorraz gain, EuskalKultura.com-ek datozen lau egunetan artikulu eta argazki-galeria eta bideo-sorta bana argitaratuko du egunero Necocheako Euskal Asteak eman duenaren isla emanez. Hasi gaurkoarekin eta on egin, irakurle!
2016/11/14
Jazoera albiste buletin digitala 2011n jarri zen abian, eta harrezkero Venezuelako euskal komunitatearen berri zabaldu du munduan. Pedro Javier Arriaga, Caracaseko Eusko Etxea elkarteko kide eta presidente ohia izan zen sortzailea. Orain, Arriagak beste pauso bat eman du egitasmo horretan eta, Yunior Loborekin batera, Jazoera TV You Tubeko kanala jarri du abian. Zorionak ekimen berriarengatik eta ongi etorri Jazoera TV!
2016/11/14
Epea datorren asteko asteartean, azaroaren 22an, itxiko da. Hauek dira oraingoan sariak: bisita gidatua eta pintxo-saioa Donostian; Joseba Etxarriren "Euskaldunen Amerika" liburua; Kalakan-en "Elementuak" CDa; "Mahai inguruko kantuak II" CDa; "Euskaraz bizi nahi dut" sortako ohar liburu bat; eta Mari Jose Olaziregiren "Basque Literary History" liburua. Parte Ez utzi gerorako eta eman izena gaur bertan!
2016/11/11
Eusko Jaurlaritzak azaroaren 11ko EHAA buletin ofizialean eman du argitara 2016ko urriaren 27ko Ebazpena, Kanpoan den Euskal Komunitatearentzako zuzendariarena, euskal etxeei diru-laguntzak emanez atzerrian dauden euskal gizataldeetako partaideak diren eta egoera larrian eta asistentzia faltan dauden pertsonak laguntzeko. orotara 202.000 euro banatu dira, Argentinan (23 onuradun). Txile (18), Kuba (64), Uruguai (6) eta Venezuelan (10).
2016/11/11
Hasiera ofiziala astelehenean eman bazioten ere, gaur arratsaldeko ekitaldiekin jauzia eman eta goitituko da gori-gorian ipiniz Necochean Euskal Argentinar Aste Nazionalaren 2016ko edizioa. Euskal Herriko bisitariak hemen dira, oinezkoak zein artistak, eta bart Euskal Etxean euskal eta argentinar osagaiak ederki uztartu eta biziarazi ziren, asteburu zinez ederra iragarriz. Kalakanen kontzertuak, Gure Esku Dagoren hitzaldiak eta Emon-ek erromeriak larunbat eta iganderatuko den sentimentu eta emozio leherketa markatuko dute. Hemen guztia prest!
2016/11/11
Aquitaine.eus egitasmoak euskal aireak dakartza Bordele eta Pau aldera, Etxepare Institutuak eta Euskal Kultur Erakundearen eskutik. Bordelen ikusgai da Donostiako Jazzaldiari buruzko erakusketa, eta hilaren 22 eta 23an euskal musika lantegia egingo dute Garikoitz Mendizabal txistulariak eta Aitor Furundarena soinujoleak. Pauen, aldiz, Lons herrian ikusgai da Soka, euskal dantza munduari buruzko multimedia erakusketa.
2016/11/11
Gizataldeen Festa azaroaren 4tik 15era ari da garatzen Rosarion, Banderaren Parke Nazionala izeneko berdegunean, bertako Turismo Erakundea eta Kolektibitate Atzerritarren Elkartea antolatzaile. Hamar egunetan zehar 50tik gora kolektibitatetako taldeak hartuko dute parte stand eta ikuskizunekin, tartean Rosarioko Nafar Etxeak eta Zazpirak Bat Euskal Etxeak. Ikuskizunen arloan, Euskal Etxeko dantzari txikiak joan den larunbatean aurkeztu ziren. Helduen txanda, astelehenean helduko da. Dantzari nafarrek, berriz, larunbatean egin zuten lehenengo saioa eta bihar dantzatuko dute berriro.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
