euskal diaspora eta kultura
2013/09/10
Ezterenzubin (Nafarroa Beherea) sortu baina arras urte gehiagoz Estatu Batuetan bizia den Mattin Etchamendy euskal-amerikarrak bere ibilbidea kontatzen duen "Urruneko Mendebalean artzain" liburu autobiografikoa aurkeztu zuen atzo bere sorterrian, Estatu Batuetatik Euskal Herriari eta bere euskal erroei egiten dien ekarpen garrantzitsu gisa. Etxeko euskara eder eta bizian idatzia, liburuak Mattinen istorioarekin batera, burua eta izaera Diasporaren eta Euskal Herriaren artean banatuta bizi diren beste hamaika euskal emigranteen sentipen eta egoeren lekuko ere bada. Gaur arratsaldeko 6:30etan Baionako Euskal Erakustokian mintzatuko da Mattin Etchamendy, eta hilaren 20ean liburuak sinatuko ditu Donibane Garaziko Kukuxka liburudendan.
2013/09/10
Aurrera doa, bizi-bizi, Gaztemundu 2013 programa. Aurten euskal musika tresnen "master class" edo ikastaro trinkoa ari dira egiten ikasleak, eta euren maila oso ona da, irakasleek EuskalKultura.com-i adierazi diotenez. Klaseetatik kanpo ere erritmo ona eta elkarrekin aritzeko sintonia erakutsi dute ikasleek, adibidez, larunbatean Pasaian egin zuten arraunketa saioan.
2013/09/10
Euskal giro herrikoian, euskal sukaldaritza herrikoiaren festa. Hiru Erreka Euskal Etxeak eta Pampa Vasca elkarteak parte hartzera gonbidatzen dute. Programa asteburuan zehar garatuko da, ekintza nagusiak igandean, urriaren 6an Tres Arroyosetik oso hurbil dagoen San Francisco de Bellocq herrian. Mus Txapelketa, Tortilla Lehiaketa eta musika eta dantza emanaldiak egingo dira, besteak beste. Giro erabat euskalduna sortze aldera, eskualdeko euskal etxeak parte hartzera gonbidatzen dituzte antolatzaileek. Behin betiko egitaraua partaide guztien proposamenak jaso ondoren jakinaraziko da.
2013/09/09
Argentinar Nazioko Kongresuko Liburutegiak Euskal Kultur Jardunaldiak hasiko ditu gaur Buenos Airesen. Iazkoen ondotik, ekimenaren bigarren ediizoa da honakoa eta irailaren 27ra arte luzatuko dira, barnean izango dituztela hitzaldiak, tailerrak eta zine emanaldiak, baita euskal jatorriko artista plastikoen erakusketa bat. Inaugurazioa gaur arratsaldeko seietan izango da Gernikako Arbola kantatuz, Eusko Jaurlaritzako eta euskal-argentinar gizataldeko ordezkariak ere partaide.
2013/09/09
Euskal giroa izango da asteburuan Parisen, Frantziar hiriburuko Espace Jemmapes aretoan antolatu den Euskal Azokaren baitan. Larunbatean eta igandean euskal jaki eta produktuen erakusketa eta dastaketa ekitaldiak egingo dira bertan, Amalur eta Lurlan elkarteek antolatuta. Horiekin batera, eta azoka girotzeko, bi kontzertu eskainiko dituzte Euskal Herriko bost kantari eta musikarik: Pier Pol Berzaitz, Estitxu Pinatxo, Magali Zubillaga, Erramun Martikorena eta Joxan Goikoetxea. Emanaldiok "Egunsentiaren kantuak" izenburua dute.
2013/09/09
Cordoba probintzia argentinarreko Villa Maria hiria izango da aurten Euskal Astearen egoitza, Argentinako eta munduko beste herrialde batzuetako euskaldunen bilgarri. Azaroaren 8tik 10era, euskal kultur adierazpen anitz sustatuko dira ekitaldian eta hizkuntza bera ez da festa erraldoi honetatik kanpo geratuko. Izan ere, Euskararen zabaltzearekin zerikusi handia duten bi ekintza burutuko dira Aste Nazionalean: 2014ko euskara ikastaroak iragartzeko afixa hautatuko da; weta agiriak eskuratuko zaizkie iaz HABEren azterketak gainditu zituzten Euskara Munduan programako irakasle eta ikasleei. Agirien banaketa larunbateko Antzokiko Gau Ikuskizunean gauzatuko da.
2013/09/09
Argentinako Done Jakue Bide Lagunen Elkarteak Bidea ezagutarazi eta talde irteerak antolatzeko sortua da, besteak beste. 250 bat kide ditu eta elkarte bakarra da Argentina osoan, Erromes-egiaztagiriak diseinatu eta emateko baimena duena. Arduradunek adierazi digutenez "irteerak kostu prezioan eskaintzen ditugu; hori dela eta interneten iragartzen dituztenak baino askoz merkeagoak izaten dira". Datorren txangoa urrian izango da eta proposamena Portugalgo Bidea egitea da. 2014ko egutegian, beste bi bidaia daude: maiatzean Zilarraren Ibilbidea eta Sanabriako Bidea eginez; eta irailean, Iparrekoa, Euskal Herria zeharkatuz.
2013/09/06
Hiru kontzertu emango ditu AEBetan Iñaki Dieguez soinujoleak datozen asteetan, Kalifornian barrena egingo duen biraren baitan. Bertan aurkeztuko du hiru urtez "Cirque de Soleil" ikuskizunean lanean zebilela sortu zuen "Birak" lana. Lehen emanaldia igandean izango da, Santa Barbaran. Gero Chinon eta San Frantziskon ere joko du. Chinoko Euskal Etxeko kontzertua berezia izango da; elkarteko kideak euskal kanta zaharrak abesten jartzea baitu helburu, Benito Zubeldia kantari ziburuarrarekin batera.
2013/09/06
Pasiotarrak Peruko Amazonian sartu zirela mendeurrena betetzen ari garen urte honetan, Euskal Herrian, Larrabetzuko (Bizkaia) herriak bere seme kuttunenetako bat omenduko du bihar, Atanasio Jauregi Goiri (Larrabetzu, 1877-Yurimaguas, 1957), eskualde perutar hartara 1903an iritsitako aitzindarietako bat, bertako prefektu apostolikoa eta lehenengo apezpikua izango zena, bere zeregin misiolariekin batera, bestela ere bertakoak laguntzen saiatuko zena, hala nola hezkuntza, osasuna, kultura eta gizarte mailan. Hil zela mende erdi pasea bada ere, gaur egun Yurimaguas hiriko kale garrantzitsuenetako batek, aireportu ondoko enparantza batek eta eskualdeko eskola prestigiotsuenetako batek bere izena daramate, Jauregik bertan utzi zuen marka sakonaren adierazgarri.
2013/09/06
Programa oparo bat hasi da aste honetan Chubut probintzia patagoniarreko Comodoro Rivadavia hirian Immigrantearen Eguna ospatze aldera. Inaugurazioa herenegun egin zen eta ekitaldiaren baitan Argentinan edota Patagonian 30 urte baino gehiago daramatzaten etorkinei omenaldia egin zien hiriko Kanpoko Komunitateen Federazioak. Sarituetako bat, Comodoro Rivadaviako Euskal Echea Elkarteko lehendakari Antonio Baztan izan zen. Jaiak bihar jarraituko du Dantza Emanaldiarekin eta datorren asteburuan bukatuko da ikuskizun gehiagorekin eta Sukaldaritza Azokarekin.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
