euskal diaspora eta kultura
2013/10/04
Frantses estatuko Argentinarako emigrazioarekin zerikusia duten elkarteak Izpuran bildu ziren iragan asteburuan, irailaren 28 eta 29an, Euskal Argentina elkarteak deituta. Bileran elkarte bakoitzak bere ekimenen berri eman zuen eta azken ikerketen emaitzak partekatu zituzten. Euskal Argentinak, adibidez, Argentinara eta Uruguaira joan ziren Iparraldeko emigranteen erregistroa biltzen ari da eta dagoeneko baditu Saratik eta Irisarritik "letxero" joan ziren 800 lagunen datuak. Asteburuan omenaldia egin zioten Euskal Argentinako presidente-ohi Pierra Lakori eta Frantxua Juanikotenak jarri zizkion bertsoek hitz egin ezinik utzi omen zuten, Monika Legarto elkarteko presidenteak adierazi duenez.
2013/10/04
Euskal etxeko Kultur Azpibatzordeak antolaturik, Biperraren Pesta egingo da bihar, urriaren 5ean, Argentinako hiriburuan. Jaia gaueko 9:30etan hasiko da, elkartearen egoitzaren kintxoan. Gonbite honekin batera, etxeko kide batek eskainiko duen datorren hitzaldiaren berri ere plazaratu du Azpibatzordeak. Urriaren 16an, Juan Carlos Ibarrolak "Aguafuertes Vascas. Roberto Arlt eta Euskal Herriarekiko harremana, 1935. urtean" izenburuko hitzaldia emango du. Gogora dezagun iraileko eta abuztuko hitzaldiak, Mikel Ezkerro eta Carlos Martinez-ek eman zituztela, hurrenez hurren.
2013/10/03
Etxepare Euskal Institutuak premiazko deialdia egin du Madrilgo UNEDerako Euskara eta Euskal Kultura koordinatzaile eta irakurlea aukeratzeko. Deialdi honek presako eta aparteko izaera du, ikasturtea dagoeneko abian baita eta orain arte koordinazio lanaz arduratu denak uko egin baitio ardura horri. Eskabideak aurkezteko epea astelehenean, urriaren 7an, amaituko da.
2013/10/03
Urriaren 19an Mexiko osoan bizi diren euskaldun asko eta asko elkartuko dira Vascosmexico taldearen hamar urteak ospatzeko. Festa Alberto Ituartek hiriburuan daukan Alaia jatetxean egingo da. Internet munduan sortu zen komunitatea da Vascosmexico, eta hamar urteotan 400 bat lagun bildu ditu, Jaione Arrieta sortzaileak egindako lan eskerga dela medio. Taldean jatorri euskalduna duten mexikarrak, azken urteotan Mexikora etorritako euskal herritarrak edo Euskal Herriaren izate, ohiturak eta kulturaren gainean interesa duten hainbat lagun aurki daitezke. Iñigo Bilbaok elkarrizketa egin dio EuskalKultura.com-entzat Jaione Arrietari.
2013/10/03
Juan Carlos Gonzalezek idatzitako 'Salbador Juaquín Ezpeleta' liburuaren aurkezpena ostiralean egingo da Rosarioko Zazpirak Bat Euskal Etxean, Cecilia Oberti aurkezle, eta kultur arloko erreferente batzuek partaide, hala nola Roberto Bereciartua lizentziatua, Dolores Moline artista plastikoa eta Luis Albornoz esataria. Hitzordua, urriaren 4an da, Zazpirak Baten egoitzan. Gonbite honekin batera, euskal etxeak gauzatu dituen azken aktibitateen berri ere iritsi zaigu Rosariotik: boleibol, zine eta San Inazio jaia.
2013/10/02
Durante años representó a la perfección el hecho vasco americano. Era el vasco mejor situado en la administración pública de Idaho, electo para ello por el conjunto de la ciudadanía, y su figura resumía la realidad de la Diáspora: nacido en el nuevo país, había mamado en la casa la cultura de sus raíces y su ser vasco, que sentía y defendía con orgullo, al tiempo que, como estadounidense, mantenía el compromiso vital que evidencia su prolija carrera política. Joseba Etxarri, director de EuskalKultura.com, firma las siguientes líneas sobre la figura de Peter Thomas Cenarrusa.
2013/10/02
Aurreneko aldiz Euskal Jai bat egin du aurten Valladolideko Gure Txoko elkarteak eta bertako arduradunak oso pozik agertu dira jarduerak izan duen harrera ona dela eta. Festa iragan irailaren 29an egin zen, igandean, eta euskal etxeko lagun asko bildu ziren bertara, lepoan arrantzale zapia zutela. Ekitaldiaren asmoa euskal kultura Gaztelako hiri honetako kaleetara ateratzea zen eta horixe lortu zuten, elkarteko koruak egin zituen kantaldiei esker. Egunari bukaera biribila emateko, lagunarteko bazkaria egin zen Gure Txokon.
2013/10/02
Buenos Aires probintzia argentinarreko Askatasunaren Bideak lau urte daramatza euskal kultura zabaltzen San Miguel, Muñiz eta Bella Vista herrietan. Mota askotako ekintzak antolatzen ditu, tartean hitzaldiak, topaketak eta egunpasak. Euskara tailerra ere eskaintzen du elkarteak eta Euskal Herriari eta zehatzago Nafarroari buruzko informazioa zabaltzen du bere blog-etik. Larunbat honetarako proposamen zinematografikoa egin du. Hitzordua San Miguelgo Museo Historikoan izango da eta hautatutako izenburua, 'Bihotz ondoko sekretuak'.
2013/10/01
Idahoko euskal iruditeria publikoan erakundeetan goien zegoen euskalduna, eta bertatik euskal presentzia eta irudia, eta euskal-amerikanoen izatea bera hobekien irudikatzen zuen pertsona zen Pete Cenarrusa. Bere bi izaerak, estatubatuarra eta euskalduna, gogotik bateratzen zituen. Euskaldunei eta euren kultura eta erakundeei geroa eman nahi zien, Ameriketan zein Euskal Herrian, eta horren alde lan egin zuen bere bizitza osoan. Mila gogoeta egin daitezke bere pertsonari eta ekarria buruz, eta segidako lerroetan horietako batzuk egin dizkigu Pete Cenarrusa gertutik ezagutu zuen Joseba Etxarri EuskalKultura.com-eko zuzendariak.
2013/10/01
NABO Ipar Ameriketako Euskal Erakundeen federazioak Euskara koordinatzailearen postua betetzeko lan deialdia plazaratu du Astero berri buletinean. Orain arte Izaskun Kortazarrek bete du NABoren "Basque Language Coordinator" kargua, baina orain postua uztea erabaki du Boisen bizi den bilbotarrak, hainbeste urtean ardura hau bete ostean. NABOk postua betetzeko deialdia egin du eta eskabideak aurkezteko epea urriaren 7an, datorren astelehenean amaituko da. Betekizunen artean NABOko kide izatea eta AEBetan lan egiteko gai izatea.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
