euskal diaspora eta kultura
2009/04/28
Chascomuseko 'Zingirako Euskaldunak' Euskal Etxeak, Buenos Aires probintzia argentinarrean, kultur ekitaldi ugari egiten darrai eta apirila hilabete bizi-bizia izan da bertan. Hasteko, 10ean elkarteak Maialen Azkue euskara irakaslea hartu zuen. Azkue zizurkildarra da eta aurten La Platako Unibertsitatean Euskara eta Euskal Kultura lektoregoaz arduratzen da. Hilaren 18an, bestalde, elkarteko euskal dantza klaseak abian jarri ziren eta azkenik joan den larunbatean, apirilaren 25ean, euskal etxeak Gernikako bonbardaketaren biktimak gogoan izan zituen ekitaldi hunkigarrian.
2009/04/27
FEVAk eta Juan de Garay Fundazioak elkarrekin antolatutako euskal standa bisitatzearekin batera, Buenos Airesko Nazioarteko Liburu Azokara hurbiltzen direnek badaukate euskal kulturarekin lotuta dauden bestelako jardueretan parte hartzeko aukera. Joan den ostiralean hasi ziren, hain zuzen ere, Azokako programaren baitan, euskal ekitaldiak, Jorge Luis Borges aretoan, hiriburu argentinarreko Lagun Onak abesbatzak, Ruper Ordorika abeslariak eta Buenos Aires bertako 'Accion Vasca eta Emakume Abertzale Batza'ko dantza taldekoak eskainitako ikuskizun berezi batez. Hona bertan hartutako argazki eta bideo selekzioa.
2009/04/27
Buenos Airesko Euskaltzaleak erakundeak antolatutako kontzertu batekin eman zion hasiera joan den ostegunean kantari oñatiarrak Argentinan eta Uruguain egingo duen itzulia. Emanaldian Jose Angel Irigarai olerkariak ere hartu zuen parte ‘Siete poetas vascos’ liburutik poema batzuk irakurriz. Ehun eta berrogei bat lagun bildu ziren ‘Plaza Defensa’ Kultura Aretoan Euskal Herriko musikaz eta literaturaz gozatzeko. Kontzertuaren ondoren, artistak eta ikusleak Euskaltzaleak-en egoitzara abiatu ziren elkarrekin afaltzera. Ekitaldiko argazkiak eta bideo bat ekarri ditugu hona.
2009/04/27
Euskara, lehenengo aldiz eta gure hizkuntza ikasten ari diren bost ikasleren bidez, partaide izan da Idahoko 'Boise State University'k (BSU) antolatutako 'Undergratuate Research and Scholarship' (Graduatuazpiko Ikerketa eta Beka) Konferentzian, joan den apirilaren 20an. Bertako Hizkuntza Saileko ikasleak bete-betean partaide, euskaraz gain, frantsesez, gazteleraz, alemanez, txineraz eta japonieraz aritu dira bertaratutakoak. Cody, Jon, John, Itxaso eta Chris dira bost euskara ikasle estatubatuar hauen izenak, eta Nere Lete --duela hogeita bost urtetik gora AEBetan bizi den filologo errenteriarra-- euren irakaslea BSUn.
2009/04/24
Eusko Jaurlaritzak IV. Mapa Soziolinguistikoaren datuak plazaratu ditu gaur goizean. Mapa honek Euskal Autonomi Erkidegoko datuak jasotzen ditu gehienbat (kasu honetan, 2006ean IV. Inkesta Soziolinguistikorako bildu ziren datuetan oinarrituta). Nahiz eta datuak EAEkoak izan (Araba, Bizkaia eta Gipuzkoa), Miren Azkarate Kultur Sailburuak aurkezpenean azpimarratu duen datu bat Euskal Herri osoko euskal hiztunen kopurua izan da: 863.000, horietatik 755.640 Araba, Bizkaia eta Gipuzkoan.
2009/04/24
Udalbide eta Udalbiltzaren bisita joan den asteazkenean hasi zen, euskal erakunde nazional horretako Zuzendaritza Batzordeko kide Bixente Arozena Buenos Airesera heldu zelarik, FEVAko agintariak anfitrioi. Bidaiaren helburua, Argentina eta Uruguaiko euskal etxe eta komunitateekin kontaktatzea, eta besteak beste Udalbidek lagundu duen Xamar-en 'Vascos' liburuaren gaztelaniazko aurkezpenetan parte hartzea, Buenos Airesko Liburu Azokan hasteko, eta Rio de la Platako herrialdeetako hainbat euskal etxeetan ondoren. Udalbideko bigarren kidea, Ramuntxo Camblong lapurtarra, igandean heldu da seguruenik, azkeneko egunotan osasun oztopo bat gainditu ostean. Maiatzaren 9ra arte Buenos Aires eta Montevideon eta beste hamaika herri argentinarretan barrena ibiliko dira Arozena eta Camblong.
2009/04/24
Eusko Jaurlaritzak Euskal Herriko Agintzaritzaren Aldizkarian argitaratu du gaur Gaztemundu programaren 2009 deialdia. Programa honi esker Diasporako 45 gaztek Euskal Herrian egonaldia egingo dute uztailaren 12a eta 24a bitartean eta artxibo historikoak digitalizatzen, errekopilatzen eta sarean argitaratzen trebatuko dira. Ikastaroaren gaia dela eta, aurten Gaztemundun parte hartzeko betebeharreko bat zera izango da: eskatzaile bakoitzak bere euskal etxearen memoria historikoarekin zerikusia duten 200 gai (argazkiak, audioak edo bideoak) katalogatu eta horien analisia egin izana. Eskabideak aurkezteko epea maiatzaren 25ean itxiko da.
2009/04/24
Joan den apirilaren 14ean Habanan egin zen Aberri Eguneko jai arrakastatsuaren berri eman genuen EuskalKultura.com-en, eta orain Kuban bizi den Jose Goitiari esker eta www.paysbasqueinfo.com webguneari esker euskaldun eta kubatarren arteko anaitzea izan zen jaiaren argazki berriak eskaini ditzakegu. Euskal Herritik Edorta Jimenez idazlea, Unai Muñoa eta Ander Lizarralde bertsolariak eta Azpeitiko Kupela musika taldea bildu ziren jaira eta kubatar repentista eta musikariekin batera parranda alaia antolatu zuten Kubako Asociación Vasco-Navarra de Beneficencia elkarteak deituriko ekitaldian.
2009/04/23
Bernardo Atxaga euskal idazlea Bartzelonako Sant Jordi eguneko pregoilari lanetan aritu zen atzo, kataluniar hiriburuko Liburutegi Sareak gonbidatuta. Kataluniako patroiaren eguna Liburuaren Nazioarteko Eguna ere bada eta hori dela eta kultur eta literatura jarduera ugari egingo dira Bartzelonan gaur. Atxagak bera, adibidez, liburuak sinatuko ditu argitaletxeek Rambletako pasealeku ezagunean jartzen dituzten standetan. Arratsaldeko lauetan idazle asteasuarra Euskal Etxearen standean ere izango da. Hilabete honetan eta maiatzean zehar Euskal Etxeak Literaldia'09 antolatu du, euskal literaturari buruzko jaialdia.
2009/04/23
Euskal Herriko Unibertsitateko Graduondoko Ikasketen eta Etengabeko Prestakuntzaren Atala EuskalKultura.com-ekin harremanetan jarri da masterrak ikasten ari diren Latinamerika, AEB eta Filipinetako ikasleentzako 2009-2010 laguntza deialdian izan den eguneraketaren berri emateko. Aldaketa honetan datza: Kolonbia eta Venezuelako ikasleek Kolonbiako Euskadiko ordezkaritzan aurkeztu beharko dituztela eskabideak eta ez Txilekoan, aurreko artikuluan azaltzen genuen bezala.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
