euskal diaspora eta kultura
2009/05/11
La Plata Buenos Aires probintzia argentinarretik datorkigu iragarpena, datorren ostegunean, bertako Euzko Etxeak eta Herrialde Katalanetako Etxeak elkarrekin antolatuta, hitzaldi eta ekitaldi bateratu baterako deia eginez, 'bi errealitate politiko eta historikoetako berri emanez, historikoki, gaur egungo uneraino heldu arte' mintzatuko baitira Gustavo Capdevila abokatua, La Platako Casal-eko presidenteordea, eta Leandro Etchichury, UBAko Antropologia doktoregaia eta euskal gizataldeko kide ezaguna. Ostegunean, arratsaldeko zazpi t'erdietan izango da, La Platako Unibertsitate Nazionaleko Kazetaritza Fakultatean.
2009/05/11
Atzerriko Athletic-en lagun taldeak eta Diasporako euskaldun asko eta asko irrikaz daude asteazkenean Athletic eta Bartzelonak jokatuko duten Koparen Finala ikusteko. Londresen, New Yorken, Buenos Airesen, Madrilen eta Bartzelonan euskal etxeek partida telebistan zuzenean ikusteko hitzorduak antolatu dituzte euren egoitzatan edota inguruko tabernetan. Gutxi batzuk, Italiako Lehoi Italiarrak peñako lagunak, kasu, Valentziara bidaia egingo dute giroaz zuzenean gozatzeko. Partida telebistan (ETB, TV-3 eta TVE) izango da ikusgai eta interneteko irrati eta online kontakizunen bitartez ere jarraitu ahal izango da.
2009/05/11
Argentinara joandako euskaldunen bilobak dira Diana Huarte eta Daniel Gorostegui, eta Buenos Airesko pop elektronikoaren aitzindariak dira SHH taldearekin. Argentinan musika elektronikoa jorratzen duen talde bakanetakoa da SHH bikotea. Aitona nafarra duen Diana Huartek (Buenos Aires, 1979) egiten ditu SHHren kanten hitzak, eta Daniel Gorosteguiren doinuak abesten ditu. Gorosteguiren aitona Miarritzekoa zen. Lehen aldiz izan dira Euskal Herrian jotzen. Atzo eman zuten azken kontzertua, Elorrioko Parra tabernan (Bizkaia). Berria egunkariak eginiko elkarrizketa.
2009/05/11
Mikele Irazusta Bahia Blanca hiri argentinarrean jaio zen 1993an eta 16 urterekin etorkizun handiko tenislaria da, Argentinako onenen artean. Aurten ITF-ko (International Tennis Federation) 18 urtekoen junior zirkuitoan lehiatuko da, ranking-a osatzeko puntuak eskuratzen hasteko. Euskonews Gaztea aldizkari elektronikoak jarraian laburbiltzen dugun elkarrizketa egin dio.
2009/05/08
Hego Ameriketan da Ruper Ordorika, Pamiela Argitaletxearen eskutik, eta Buenos Aires, Montevideo, Bahía Blanca eta Rosarion aritu da honez gero. Ezagutzen zuen lehenagotik Diaspora, Kubako eta Estatu Batuetako euskaldunekin kontaktuan, baina harritu egin da Buenos Airesen, itzulian bisitatu duen lehenengo hirian, bizitutako giroarekin. “Hemen aurkitu dudan berotasuna eta oihartzuna ez da normala izaten; honek esan nahi du argi dagoela, nire ustez, badagoela hemen dinamika bat, badituzuela euskara klaseak... Euskal presentzia handia nabaritzen dut”.
2009/05/08
Argentinako General Acha herriko Eusko Txokoa elkarteak Txahalaren Jaiaren 37. edizioa ospatu zuen joan den maiatzaren 1 eta 2an. Ekitaldia abeltzantza arloko bilkura garrantzitsuenetakoa da Pampetako inguru hauetan eta Euskal Etxeak 1971an antolatu zuen lehen aldiz. Aurtengo ikuskizunean zaldi heziketa erakusketak, desfileak eta folklore emanaldiak izan dira ikusgai, horien artean Los Guaraníes taldearen kontzertua Euskal Etxean. Jaia elkarteko zuzendaritza berriak sustatu duen indarberritzearen erakuslehio izan zen.
2009/05/08
Mari Carmen Egurrola Totorica Gernikako bonbardaketatik bizirik atera zen apenas bost urteko neskatila zenean, eta orain, bizileku duen Boiseko bere etxetik, sarraski hartako 1.600 hildakoei ahotsa jarri die, Democracy Now! telebista eta irrati saioak bonbardaketaren 72. urteurrena dela eta egindako erreportaian. Programa hau Estatu Batuetako 750 irrati eta telebista estaziotan emititzen da. Egurrolarekin batera Patty Miller, Boiseko Basque Museum & Cultural Center-eko zuzendaria ere hizlari izan zen, estatubatuarrei bertan gertatu zena eta bertatik atera beharreko ikasgaiak aipatuz [elkarrizketaren bideoa ingelesez].
2009/05/07
Hogei egun naturaleko epea daukate bihartik aurrera Etxepare Euskal Institutuak bederatzi langile hautatzeko zabaldu duen prozesuan parte hartu nahi dutenek. Euskal Herriko Agintari Aldizkariak gaur, maiatzak 7, eman du argitara Etxepare Euskal Institutuaren langileak hautatzeko lehiaketa oposizioaren deialdi publikoa. Deialdia zabalik da Administrazioko zein kanpoko pertsonentzat. Eskaerak eredu ofizial eta normalizatuan aurkeztu beharko dira, Eusko Jaurlaritzaren lurralde bakoitzeko egoitzetan jaso ahal izango diren inprimakia beteta.
2009/05/07
Argentinako Euskadiko Ordezkaritzatik ohar gogoangarria plazaratu dute, oroitaraziz Gaztemundu Diasporako gazteentzako trebakuntza programarako eskabideak aurkezteko epeko ñabardura bat, Argentinari dagokiona. Aurtengo deialdian maiatzaren 25a ezarri zen eskabideak aurkezteko azken eguna bezala, baina Argentinan --soilik eskabide hori Euskal Ordezkaritzan aurkeztu nahi izanez gero-- maiatzaren 25a jai nazionala denez, epea aurreratu egiten da beste egun eta tenore honetara ekarriz: maiatzaren 22ko 13:00ak. Legeak baimendutako gainerako tokietan edo postaz igorri nahi dituztenentzat, 25ak balio du epe mugatzat.
2009/05/07
Eusko Jaurlaritzak hogeitabat euskal hiztegi espezialdu argitaratu ditu, euskal hiztunei arlo desberdinetako termino zehatzak bilatu eta erabiltzeko aukera erraztu asmoz. Hiztegi bakoitzak arlo bat jorratzen du, adibidez garraioa, eraikuntza, informatika, arrantza, kirola, aisia... Hiztegiek hitz bakoitzaren gaztelera, ingeles eta frantsesko itzulpena ere ematen dute. Hiztegi hauek internet bidez kontsultatu daitezke Euskalterm Terminologia Banku Publikoaren webgunearen bitartez. Euskalbar izena duen plug-in baten bidez, gainera, ordenagailuko nabigazio-barran Euskalterm eta beste hamaika hiztegi jarri daitezke.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
