euskal diaspora eta kultura
2011/03/17
Umeak oheratzeko ordua guraso askorentzat haurtzaroko ilusioa berreskuratu eta ipuinen irudimenezko munduan murgiltzeko garaia izaten da. Ipuinak gurasoen ahotan entzutea maite duten haurrek gehien, baina ipuin berri batekin elkarrekin gozatzea izan daiteke beste aukera bat. Etxegiroan.com webguneko Maria Uriartek eta Tomas Fernandok aukera hori eskaintzen digute. Haurrentzako zein helduentzako euskarazko eta gaztelaniazko ipuin andana musikatu eta sarean jarri dituzte eskuragarri.
2011/03/16
Buenos Aires probintzia argentinarrean, Rauch-eko 'Gure Txokoa' Euskal Etxeak gaur arratsaldez aurkeztuko du herriko Arte Plastikoen Udal Museoan Marcelino irianni irakasle euskal argentinarraren 'Argentinako Euskaldunen Historia'. Ekitaldi honekin Gure Txokoak 2011ko urteko egitaraua abiaraziko du. Bertan adineko bazkideekiko omenalditxo bat ere gauzatuko da. Euskal Etxetik dei berezi bat egin zaie Rauch-eko herritarrei ekitaldira hurbil daitezen.
2011/03/16
Topagunea Euskara Elkarteen Federazioak euskarazko zinemagintza lagundu eta sustatzeko helburuarekin Laburbira Film Laburren Zirkuitoaren zortzigarren edizioa abiarazi du. Zirkuitu honen bidez euskarazko ikus-entzunezko urteko produkzioa ikusgai izango da Euskal Herriko hainbat plazatan, eta baita Diasporan ere. Izan ere, Londresko Euskal Etxeak antolatu duen emanaldiarekin itxiko da zirkuitua datorren apirilaren 16ean. Topaguneak munduko gainerako euskal etxeei ere film hauen emanaldiak antolatzeko gonbitea luzatzen die.
2011/03/16
Sao Paulo estatuan, lan polita egiten ari da Itapeviko Eusko-Brasildar Etxea euskal kultura ezagutarazten eta zabaltzen. Orain, hiriko merkataritza eta industria elkarteak (ACITA) ahalegin hori aitortu dio, euskal etxeko bost kide bere zuzendaritza batzorderako hautatuz. "Oso garrantzitsuak izango dira izendapen hauek, hemendik aurrera gure komunitateko ekonomi elkarte nagusiaren babesa izango dugulako gure proiektuak aurrera ateratzeko", azaldu dio EEko presidente Oskar Goitiak EuskalKultura.com-i.
2011/03/16
Azken astea du Donostian "Euskaldunak eta Pazifikoa, Urdanetaren omenez" erakusketak. Datorren igandera arte egongo da zabalik kai donostiarreko Untzi Museoan, azkeneko aste honetan gainera sarrera libre izango duela. Gipuzkoako Foru Aldundiaren baitango itsas museo honek hilabetez itxiko ditu ateak ondoren, hurrengo erakusketa, "Baleazaleak" izenekoa, balearen ehizaren historia eta orainari buruzkoa, euskaldunen partaidetza ere bertan, apirilaren erdialdean zabaltzekotan.
2011/03/16
Martxoaren 5ean eta udaldiari amaiera alai bat emateko Gizataldeen Jaia ospatu zen Buenos Aires probintziako Pellegrini herrian. Inguruko hiri askotatik bidaiatu ziren kolektibitateetako ordezkariak Argentinako hiriburutik bostehun bat kilometrora dagoen herri honetara. Egun osoan zehar, dantza eta musika ikuskizunak aurkeztu ziren udaleko anfiteatroan; standetan, berriz, janari eta edari tipikoak dastatu ziren. Trenque Lauquengo 'Euskal Sustraiak'eko kideak partaide izan ziren, Euskal Herriko kultura eta ohiturak ezagutaraztea xede.
2011/03/15
Joan den martxoaren 11ean eta Emakumeen Nazioarteko Eguna ospatzeko, Buenos Aireseko Etxeak probintziako barruti guztietako emakumeen ordezkariak saritu ditu. Omenaldiaren protagonisten artean eta Jose C. Pazeko berrehun eta berrogeita hamar mila emakumeen izenean, 'Toki Eder' Euskal Etxeko lehendakaria den Maria Angeles Oñederrak jaso zuen probintziako agintariek eskainitako ohorea. Ospakizuna Callao Etorbidean dagoen Buenos Aireseko Etxean gauzatu zen eta Oñederrarekin batera ehun emakumetik jaso zuten ohorea.
2011/03/15
Quebeceko Euskaldunak elkartean 'Euskal Herria hortik harat', Amerikako euskal diasporari buruzko dokumentala, izan zen ikusgai joan den ostiralean. Harrera hain izan zen ona, ostiral honetan beste saio berri bat egingo dutela. Lanez lepo dihardute egunotan quebectar elkartean, eta datorren martxoaren 20ean Aberri Eguneko jaia egingo dute. Gainera, irailerako 15. urteurreneko ospakizunak ari dira prestatzen, Euskal Herritik etorritako musikariekin eta hamaika ezusterekin.
2011/03/15
Hitzaldia eman zuen joan den igandean EuskalKultura.com-eko zuzendari Joseba Etxarrik Caracasko Eusko Etxean. Venezuelako hiriburuko euskal etxeko hitzaldi-aretoak hiru belaunalditako euskal venezuelarrak bildu zituen Europatik etorritako kazetariaren hitzak entzuteko eta munduko zein Venezuela bertako euskal irudiak ikusteko, ikusentzunezko hitzaldia izan baitzen eskainitakoa. Carlos Otaño Eusko Etxea-ko lehendakariak aurkezturik, Etxarrik, besteak beste, Venezuelako euskaldunek eta Eusko Etxeak berak frankismoaren urte ilunetan bertatik irmo eta indartsu munduratu zuten euskal argi distiratsu eta erreferentziala ekarri zuen gogora.
2011/03/14
Etxepare Euskal Institutuaren 'izpiritua eta filosofia' biltzen omen ditu bihar
arratsaldean Bilboko Arriaga antzokian aurkeztuko den AT! ikuskizunak, erakundearen arduradunen esanetan. Euskal kultura munduan ezagutaraztea eta zabaltzea da institutuaren helburua, eta bide horretan puntako euskal idazle, aktore, musikari eta dantzariek talde-lanean sorturiko ikuskizun hau erabiliko du Etxeparek bere burua euskal gizartearen aurrean aurkezteko. "Euskal sortzaileak batzeko gogotik" sortu da AT!, Etxepareko zuzendari Aizpea Goenagak azaldu duenez, "kohesio eta batasun hori mundura ateratzeko" bidea dela gehituz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
