euskal diaspora eta kultura
2018/03/21
Martxo hasieran ekin zion 2018ko Topaketen programari Buenos Airesko Euskaltzaleak-ek. Euskara eskolak, ordea, apirilaren lehenengo astean jarriko ditu abian, maila guztietako ikastaroak eskainiz, lau egoitzatan. Aurrez aurreko klaseetan parte hartu ezin dutenentzat elkarteak bere On Line Ikastaroa eskaintzen du. Eta ikasgeletatik kanpo ere aritzen da : stand bana muntatuko du, esaterako, Buenos Airesko Sukaldaritza Gunean (apirilaren 7an) eta ‘Buenos Aires Celebra’ n (maiatzaren 6an).
2018/03/20
Ez dira euskal hautagai bakarrak, baina bien kasuan Estatu Batuetako euskal komunitatean oso ezagunak diren bi pertsona dira, eta azken asteotan urratsa eman dute bakoitza bere barrutian hautagai izateko: Diana Lachiondo Idahoko Ada Konderriko Gobernu-Batzorderako hautagai demokrata izateko primarioetan ari da lehian (Boise hiria da Ada konderriko egoitza), eta Aitor Narvaiza, berriz, Elko hiria egoitza duen Elko konderriko sheriffa izatearren.
2018/03/20
2018ko egitaraua kaleratu du San Miguelen, Buenos Aires probintzian, Askatasunaren Bidea Euskal Elkarteak eta berritasun interesgarriak dakartza, hala nola Horacio Marottok ‘Navarrorum, euskararen gaineko dokumentu nafarren bi mila urteko ondarea’ izeneko erakusketari buruz apirilaren 7an eskainiko duen hitzaldia. Bihar, martxoaren 21a, bere Mus Tailerra inauguratuko du taldeak eta euskara klaseak eta euskara eta euskal kultura tailerra apirilean abiatuko ditu.
2018/03/19
"Inguratu zaitez jolasean kultura hauetara!" leloarekin antolatu dute asteazken honetan Mexikoko Unibertsitate Autonomoak (UNAM) eta bere baitango euskara eta katalan irakurlegoek --hurrenez hurren Etxepare Euskal Institutua eta Kataluniako Ramon Llull Institut sustatzaile-- "Euskal Kataluniar Jardunaldi Ludikoa". Proposamen irekia da, publiko orokorrari zabaldua, doanik eta aurre-ezagutzarik eskatzen ez duena. Inguruan bazabiltza, zergatik ez hurbildu. Edo interesa izan dezakeen lagunen bati informazioa pasa?
2018/03/19
Urteak daramatza Viedma eta Carmen de Patagonesko euskal gizataldeak jaialdi herrikoi honetan parte hartzen, zehatzago esateko bere baitango kabalkada zibiko militarrean. Baina aurten gora jo nahi izan du bere apustuan eta bertako euskal etxeak stand bat muntatu du Festaren gunean, euskaldunei eta Euskal Herriko kulturari agerikotasun handiagoa emate aldera. Eta baita lortu ere, Aberri Etxeak bere proposamenak ongi sustatu eta zabaldu baititu 2018 ikasturteko ekimenak abiatzeko prest dituen une honetan.
2018/03/17
EuskarAbenturak osagai guztiak dauzka esperientzia aparta izateko zazpi probintzietako eta Diasporako 120 gazterentzat. Ibilbidea uztailean egingo da, Donejakue bidea eginez eta aukera emanez 120 gazte euskalduni euren herria ezagutu eta hainbat ekimenetan parte hartzeko, hala nola aisialdi eta kultur bisita, hitzaldi, tailer, kirol ekintzetan... Diasporaren kasuan, gutxienez bi partaide babestuko dituzte, Diasporako gazteek ere urririk parte har dezaten. Interesatuta bazaude, garaiz zaude, eman izena lehenbailehen!
2018/03/16
Emakumearen Egunean hiriko emakume nabarienak ohoratu nahi izan zituen General Rodriguezko Udalak. Euskal kolektibitateari dagokionez, Alicia Itceak izan du aurten errekonozimendua jasotzeko ohorea. Aliciak urteak daramatza euskara ikasten, irakasten eta zabaltzen bere herrian. Gogora dezagun, bestalde, Euskal Etxearen datozen ekintzei dagokienez, euskal musika tresnei buruzko hitzaldi bat iragarri duela Eusko Aterpeak biharko eta hurrengo astean, Ostiral Santuan, euren txibi salmenta ezaguna gauzatuko dutela, etekinak EEren ekimenentzat.
2018/03/15
Madrilgo Euskal Etxetik pasatu digute abisua esanez hiriburu horretako Hizkuntz Eskola Ofizialak euskara irakasle lanpostu baterako oposizioak plazaratu dituela. Deialdia Madrilgo Komunitateko Buletin Ofizialak argitaratu du martxoaren 13ko, alegia joan den astearteko, zenbakian, 79. orrialdean, hezkuntza alorreko beste hainbat irakasle deialdirekin batera. Deialdia lizentziatuentzat da, telematikoki aurkez daiteke eta interesatuek 15 eguneko epea daukate Buletin Ofizialean argitaratua izan eta ondoko egunetik kontatzen hasita.
2018/03/15
Buenos Airesko Ekin Kultur Taldeak ez du momentuz egoitza propiorik; hala ere, Aitor Alava zuzendariaren esanetan, “hori ez da oztopoa, areto, etxe edota parke batzuk entseguak egin eta biltzeko toki ederrak izan baitaitezke gogoa dagoenean”. Urteko bere plangintzari hasiera emateko Pergaminon egingo du Elkarteak 2018ko lehenengo 'Dantza Plazan', bertako Lagun Onak Euskal Etxea antolatzaile. Taldearen entseguak, bestalde, apirilean hasiko dira hiriburuko ‘Las Mil y un Artes’ kultur etxean.
2018/03/15
Euskal ordezkaritza instituzionala Nazio Batuen egoitzan izan da New Yorken Emakumearen Egoera Juridiko eta Sozialaren 62 Batzordearen irekieran eta aste osoan zehar bisitak eta kontaktuak izan ditu han-hemenka, Ander Caballero Euskadiren Estatu Batuetako ordezkaria lagun. Bertako euskaldunekin ere bildu dira euskal hautetsiak, hala nola New Yorkeko Eusko Etxeko Zuzendaritzarekin eta Washingtonera jauzi laburra emanez, Kapitolioan, John Garamendi kongresukide kaliforniar demokratarekin.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
