euskal diaspora eta kultura
2008/03/28
Bartzelonako Euskal Etxeak, eratzen duen Zinemaldiaren azken edizioaren balioespen oso baikorra egin du, jaialdiaren hiru urtetako ibilbidea goranzkoa dela baieztatuz. Hilaren 14ean bukatu zen edizioak inoiz baino ikusle gehiago bildu ditu, Euskal Etxeko ekitaldi guztiak eta kalean egin ziren biak ere beteaz. Aurtengo jaialdian gainera, Katalunian Euskal Herriari buruz eginiko dokumentalak ere izan dira ikusgai eta jaialdiak lekua hartu du Bartzelonako komunikabideetan. Euskal Etxea bere hurrengo hitzordu handia prestatzen ari da jada, apirilean egingo den euskal literatura jaialdia, Literaldia'08.
2008/03/28
Dagoeneko sarean topa daitekeen Hitza.info webguneak Busturialdea, Donostia, Goierri, Lea-Artibai eta Mutriku, Oarsoaldea, Tolosaldea eta Leitzaldea, eta Urola Kostako 102 herritako tokiko informazioa biltzen du, orain arte Hitzako zazpi egunkariek egiten zuten lana webgune bakar honetara batuz, bideoz, blogez eta eta argazkiz horniturik. Laburrean, paperezko zazpi edizioen pdf bertsioak ere sareratuko ditu webgunean. Berria egunkariarekin harremandua dagoen ekimen honek urrats berria eskaini nahi dio tokiko informazioa segitu nahi duen irakurle euskaldunari.
2008/03/28
Baionako Maiatz aldizkariaren lehen zenbakia 1982ko otsailaren 12an argitaratu zen Lapurdiko hiriburuan. Ordutik hona, Itxaro Bordak eta Luzien Etxezaharretaren lehen ideiari esker sortutako literatur aldizkariaren 44 zenbaki argitaratu dira euskarazko poesia tartean duelarik. Iragan urtean, 26 urte hauetan kaleratutako 35 zenbakien poemen tituluak eta egileen izenak sarean ipini zituzten. Webguneak, gainera, lehen hamar zenbakiak pdf formatuan ikusi edo jaisteko aukera ematen du.
2008/03/27
Aberri Eguna Mexikoko euskaldunen artean itzal handia duen ospakizunetako bat da. Aurten ere jai honek hiriburuko Euskal Etxeko kideak bildu zituen eta baita Cancun eta Celaya hirietako euskaldunak ere. Hiru jaiak arrakastatsuak izan ziren, eta Celayakoan gainera euskaldunen arteko harremana sendotu eta urtean zehar bilkura gehiago antolatzeko erabakia hartu zuten. Hasteko, datorren urteko Aberri Eguneko egoitza Irapuato herrian izan daitekeela aurreratu dute.
2008/03/27
Macachingo Eusko Alkartasuna elkarteak lan eskerga egiten du euskal pilota Argentinako Panpan zabaltzen eta gaztetxoei kirol hau ikastaroen bidez erakusten. Elkarteko pilotari gazteek, gainera, inguruko txapelketetan parte hartu ohi dute eta emaitza gero eta hobeak ari dira lortzen. Euskal Etxeko Pilota Batzordeak iazko lanaren balioespen oso baikorra egin berri du eta hilabete honetan ekingo diote pilota urte berriari, martxoko klaseen hasierarekin batera.
2008/03/27
Atsedenaldiaren ondotik, General Rodriguezeko 'Eusko Aterpea' Euskal Etxe argentinarrak ohiko jarduerei ekin die, ikasturte berriari ekinez. Elkartetik bertatik eman dute aditzera datozen asteetarako antolatutako programa. Aste Santuko geldiaren ostean, Nikomedes Iguain Azurza Herri Liburutegiak ateak berrirekiko ditu udako ordutegia mantenduz. Euskarazko doaneko tailerrak, haur eta helduentzat, apirilaren 5ean hasiko dira eta Aberri Eguna, berriz, apirilaren 6an ospatuko, ohiko elkarretaratze eta bazkariarekin.
2008/03/26
Joan den igandean bukatu zen Nazioen Mundua herri ekimenak autodeterminazio eskubidea aldarrikatzeko asmoz Eskoziara antolatutako kultur bira. Eta bukatu ere, era bikainean bukatu zen, euskaldunak eta eskoziarrak batuz Aberri Egunaren ospakizunaren karira dantza, herri kirol eta musika erakustaldiekin. Ekitaldia Inverness hirian, Eskoziako Highlands edo 'Goierrian' egin zuten Beasain, Idiazabal eta Iruñetik heldutako euskaldunek.
2008/03/26
Amaitu berria da uda [hego hemisferioan] eta amerikar kontinenteko hegoalde honetako euskal etxeak ari dira pixkanaka sartzen ikasturte berrian. Halaxe egina du Chascomus herri argentinarreko 'Zingirako Euskaldunak' Euskal Etxeak, arrakastaz egin ere, Aberri Egunaren karietara bildu baitzituen joan den igandean itsasoz bi aldeetako payadore eta bertsolariak, 'aberria ospatzeko modurik onenean', bertan egon zirenen esanetan. Chascomuseko euskaldunek datorren larunbatean egingo dute euren EEko Biltzar Nagusia eta segidan ekingo diote euskara, dantza, pilota eta gainerako ikastaroen sasoi berriari.
2008/03/26
Udan merezitako atsedena hartu ostean, Chivilcoyko Euskal Etxeak 2008ko Jarduera Planari ekin dio. Otsailean Eusko Jaurlaritzaren eskutik jasotako makina fresatzailearen gaiarekin aritu edo FEVAko hauteskundeetara aurkeztutako bi zerrendetako kideen bisita jaso ondoren, Euskal Etxeak hasia du ikasturte berria. Besteak beste, honako ekimenei eutsiko die: euskal irratsaioa, dantza taldeak, euskara tailerrak edota urteurrenak ere antolatuko ditu datozen hilabeteetan.
2008/03/25
Venezuelako euskal komunitateak ez zion batere hutsik egin joan den igandean Caracaseko euskal etxearen jai nagusienetako bat den Aberri Egunaren urteroko hitzorduari. Elkarteko kide eta lagunak euskal etxera bildu ziren aberriaren gomutaz eta emozioz beteriko eguna bizitzeko. Eguneko ekitaldiak euskal mezarekin hasi ziren eta elkarteko frontoia berriz irekitzen zuen pilota partidaren ostean lagunarteko bazkaria egin zuten bertaratu zirenek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
