euskal diaspora eta kultura
2009/05/18
Buenos Airesko Iparraldeko Euskal Etxeak omenaldia egin zion joan den Ohiko Biltzar Orokorraren azken partean Michel Iriart-i, elkarteko Ohorezko Bazkide izendatuz. Bizimodu osoan hiriburu argentinarreko euskal etxe horretako partaide eta zuzendaritzako kide, bere seme Miguelek eman zion Michel Iriarti Ohorezko Bazkide diploma. Biltzar berean buruzagitza berritu zen, Ernesto Cornejo Saravia berrautatu zutelarik lehendakari, eta Zuzendaritza Batzordeko kide, besteak beste, Enrique Fagoaga, lehendakariorde legez; Norma Ríos idazkari; eta Guillermo Lopez diruzain.
2009/05/18
Ekainaren 16tik eta uztailaren 14a arte Santiago de Queretaro hirian, Mexikoko izen bereko estatuan, III. Kulturunea-Kimuak Euskal Laburmetrai Jaialdia izango da ikusgai. Jaiadiaren antolatzaileak Manuel Gerez del Río, Kulturunea liburudendaren sortzailea, eta hiriko Museoa dira, Euskadiko Filmategiaren laguntzarekin. Filmategiak urtero bidaltzen ditu Queretarora Kimuak programan aukeratutako euskal laburmetrai hoberenak. Egun Kulturunea liburutegia itxita badago ere, euskal kultura Mexikon zabaltzeko erronkarekin aurrera jarraitzen dute bere sustatzaileek, kimu zinematografiko hauen bitartez.
2009/05/15
61 urterekin, Victor 'Vitico' Bereciartua Argentinako rockaren historiaren parte da, eta azkenaldian, Andres Calamaro bezalako musikariak bere ekarpena aldarrikatzen ari dira. Euskal latinotzat du berak bere burua; 'Viticus' bandarekin darrai errepidean eta Euskal Herrian hainbat emanaldi egin ditu. Bere bidaien maletan rockaren izen handiekin abenturak eta kontzertuak gordetzen ditu, The Who taldeko Keith Moon eta Pete Towsendekin Ingalaterran, eta bere lagun Norberto 'Pappo' Napolitanorekin Riff talde argentinar mitikoan. La Voz del Interior egunkariak jarraian laburtu eta euskaratzen dugun elkarrizketa hau egin dio.
2009/05/15
Natura eta espazio irekien zale definitzen du bere burua, eta hori dela eta, 1973an Encinoko (New Mexico, AEB) tranpa-jartzaileak erretiroa hartu behar zuela jakin zuenean haren lanpostua eskatu zen. 'Aire zabalean ibili nahi nuen, ez nuen bulego batean egon nahi', azaltzen du Ipar Euskal Herrian jaiotako euskaldun honek. Bere familia 1950ean etorri zen Estatu Batuetara eta Jaureguiberry Las Vegas-en bizi da (ez Nevadako Las Vegas handia, baizik eta New Mexikoko izen bereko herrixka). Lanbidean daramatzan 35 urteetan, koioteak, zakur basatiak, mofetak eta hartz beltzak ere ehizatu ditu. PNTonline.com egunkariak dakar bere bizitzaren berri, jarraian laburtu dugun albiste honetan.
2009/05/14
Karten eta kartajokoen historia ezagutzeko interesak, gaia ongi asko ezagutzen duen Fournier etxe gasteiztarreko aditu ikertzaile baten ikuspuntutik azaldua, jende multzo polita erakarri zuen hilabete hastapen honetan Habana hiriburuko Karten Museora (Museo del Naipe), Rufino Oyarzabal babazorroaren hitzaldia medio. Urte luzeak enpresa kartagilean pasatutako Oyarzabalek, historia errepasatzen zuten power-pointeko irudien laguntzaz, publikoa bereganatu zuen, kartak eta kartei buruzko azalpenak biltzen zituzten Museoko horma irakasleen artean.
2009/05/14
Joan den maiatzaren 10ean Lapurdiko Senpereko lakua Herri Urrats edo Iparraldeko ikastolen jaiaren edizio berri baten gunea izan zen. Bezperan, handik 12.000 kilometrora, Buenos Airesen, euskaltzale argentinar talde mardul bat Iparraldeko Euskal Etxera bildu zen, bertan ere jaia ospatzeko. Argentinarrekin batera Euskal Herriko ordezkaritza bat izan zen bertan: Ramuntxo Camblong lapurtarra, Udalbide/Udalbiltzako zuzendaritza batzordeko kidea, eta Joan Carlos Etxegoien 'Xamar' eta José Ángel Irigaray idazleak, euren azken lanak Buenos Aireseko Liburu Azokan aurkeztu ostean.
2009/05/14
Chivilcoyko Beti Aurrera Euskal Etxeak aurrera darrai bere ekitaldiekin, urteari hasiera bikaina eman ostean. Joan den asteartean bertan, Eusko Jaurlaritzak emaniko bi fresatzeko makinaren emate ekitaldian hartu zuen parte herriko Hezkuntza Tekniko Ertaineko Eskolan. Datorren 29an elkarteak 'tangeria' berri bat egingo du, Borja Blazquez sukaldariak euskal gastronomia lantegia eskainiko du maiatzean bertan eta ekainean Beti Aurrerak, San Juan, Panpinaren Erretzearekin ospatuko du, azken urteotan legez. Elkartearen blogak, bestalde, Beti Aurrerak egiten dituen ekintzen berri ematen segitzen du, tartean dantza eta euskara klaseen berri.
2009/05/14
2008ko azaroan Aretxabaletako Akordeoi Orkestrak Chivilcoy herria bisitatu eta kontzertua eman zuen bertako Euskal Etxean. Euskal Etxeko arduradunak eta Orkestrako kideak harremanetan jarraitu zuten eta hilabete batzuk pasata Santiago Torricelli Velazco pianojole chivilcoytarrak eta Eugenia Puente sopranoak bisita bueltatu eta kontzertua eskaini dute Aretxabaletan. Emanaldia bikoteak Europara egin duen biraren barruan gauzatu da, Madril eta Bartzelonara aurkeztu aurretik.
2009/05/13
Euskalerriaren Adiskideen Elkartearen Gorteko Ordezkaritzak "Euskal historiaurrea: oraina eta etorkizuna" izeneko jardunaldia antolatu zuen joan den larunbatean Madrilen, euskaldunen eta euskararen jatorriei buruz mintzatzeko. Topaketa San Lorenzo del Escorial herriko hotel batean egin zen eta bertara genetistak, arkeologoak eta hizkuntzalariak bildu ziren. Euskararen misterioa argitzeko disziplina desberdinen arteko kolaborazioaren beharra aipatu zuten adituek.
2009/05/13
Aukeratu berria dute Cecilia Cenoz Argentinako Tandil herriko 'Gure Etxea' Euskal Etxeko lehendakari. Ez zuen Euskal Herritik etorritako aitatxi ezagutu, soilik aitak kontatzen zizkion pasadizoen bidez, baina horiek aski izan ziren denborarekin euskara ikasi, euskal sentimentua bereganatu, eta Tandilgo Euskal Etxea bere etxetzat hartzeko. Badaki berak euskal elkarteak une latzak bizi dituela, gazte gutxi biltzen baitu, eta gazterik gabe, gero gutxi. Hala ere eutsi dio EEko lehendakari izateko erronkari. Bere lana, 'arduraz eta koherentziaz' betetzea espero du, 'baina gehienbat maitasun handiz'. Helburua, Tandilgo euskal eraikin ederrari haur eta gazteen zarata eta bizitasuna ekartzea. Elkarrizketa Alma Vascako Jorge Gilabert-i dagokio.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
