euskal diaspora eta kultura
2012/05/29
Etxepare Euskal Institutuak eta Paueko Unibertsitateak Euskara eta Euskal Kulturako irakurletza sortuko dute datorren urtean. Unibertsitate frantziarraren antolaketa dela eta lehenbailehen hautatu behar da ikastaroa zuzenduko duen irakurlea eta Etxeparek presazko deialdia argitaratu zuen atzo. 2012-2013 ikasturterako hautatuko du Euskal Institutuak irakurlea, 2013-2014 ikasturtera luzatzeko aukerarekin. Eskabideak aurkezteko epea ekainaren 4an, datorren astelehenean, amaituko da.
2012/05/29
Lur Hiztegi Entziklopedikoa eta Lur Entziklopedia sarean eta doain kontsultagai ipini ditu Eusko Jaurlaritzak bere webgunean. Kultura saileko Hizkuntza Politikarako sailburuordetzak euskaldunen eta munduan euskara ikasten ari direnen eskuragarri ipini du paperean lehenengo aldiz hurrenez hurren 1991ean eta 1999an atera ziren bi produktuok, ondoren eguneraketa egin eta 2001ean liburuki berriak atera baziren ere. Gogora ekarri behar da aurten bertan Jaurlaritzak Lur Hiztegiko eta Entziklopediako 11.000 artikulu egokitu zituela, Wikipedia medio sareratzeko.
2012/05/29
Pariseko Different! zinemaldiaren barruan bi euskal luzemetraia erakutsiko dituzte aste honetan Parisen. Bata, Jon Garaño eta Jose Mari Goenaga zuzendarien "80 egunean" filma izango da eta larunbatean aurkeztuko dute Nouveau Latina aretoan. Goenaga eta Itziar Aizpuru aktorea izango dira bertan. Aurre-estreinaldia izango da emanaldia, izan ere, ekainaren 13an Frantziako zinemetan izango da ikusgai. Igandean, berriz, Telmo Esnal zuzendariaren "Urte berri on, amona!" komedia beltzaren txanda izango da. Zuzendaria bera eta Joseba Bengoetxea aktorea bertaratuko dira, filmari buruzko solasaldian parte hartzera.
2012/05/28
Ekimen ugari ari da burutzen azken asteotan Mallorcako Artea Euskal Etxea: dantza ikastaroa, Athletic-en partidak ikusteko afariak, hiriko azokan standa jartzea.. Bereziki aipagarria da apiril hondarrean elkarteak gauzatu zuen barnetegia, lehen aldia zelako eta emaitza bikaina lortu zuelako. Euskal etxeko bi euskara taldeek elkarrekin ikasi eta elkar ezagutu ahal izan zuten ikastaro trinko honi esker eta, horrez gain, ordutegi arazoeangatik klaseetan parte hartzeko aukera ez daukaten bazkideek ere parte hartu ahal izan zuten. Datorren urtean esperientzia errepikatzeko asmoa du elkarteak.
2012/05/28
Patagonia argentinarreko handienetako bat da Comodoro Rivadaviako euskal etxea. Are gehiago, laurogeita bederatzi urterekin, eskualdeko zaharrenetako bat ere bada Atlantikoari begira dagoen hiri honetako euskal erakundea. Zaharra bezain aktiboa da eta urtebetetze berria ospatzeko, instituzioa osatzen duten lagunei elkarretaratzeko deia egin zien egoitzako trinketean, eta hala egin zuten zuzendaritza batzordekideek, abesbatzako kantariek, dantzariek eta euren ahaideek. Aurreko hilabetean, buruzagitza berritzeko biltzarra gauzatua zuen euskal etxeak, lehendakari gisa Antonio Baztanek segitzen duelarik.
2012/05/25
Bucarest-en Europa League txapelketaren finala galtzeak ekarri zuen kolpe latza eta gero, Athletic-eko jokalariek aurten titulu bat eskuratzeko aukera berri bat izango dute gaur gauean Madrilen, Vicente Calderon zelaian. Horretarako Bartzelona ahaltsua mendean hartu beharko dute; balentria galanta, zalantzarik gabe, baina athleticzaleen gogo eta animoak izango dituzte akuilu. Milaka zaletu izango dira gaur Madrilen, guztien buru bertakoak; Espainiako hiriburuko athleticzaleak inoiz baino harroago egon ahalko dira, uholde zurigorriko parte. Diasporatik ere asko dira taldeari erronka honetan bultzada emateko goiz jaikitzeko edo gaupasa egiteko prest daudenak, bertaratuta zein munduko hainbat lekutatik irratia, telebista eta internet lagun.
2012/05/25
Apirilean burutu zuten bidaia Cordoba probintziako hiri honetako lagunek. Arbasoen lurra ezagutzeko helburua zuen bidaiak Euskal Herriko hainbat tokitara eraman zituen, tartean, Donostia, Baiona, Maule, Donibane Garazi, Iruñea, Gasteiz eta Bilbora. Gasteizen, talde argentinarra Lopez Lehendakariarekin eta Julian Celaya Jaurlaritzako Euskal Herritar eta Gizataldeentzako zuzendariarekin bildu zen Legebiltzarrean. “Bidaia ez zen ofiziala izan eta ez ginen, beraz, erakundearen izenean joan; hala ere, bertan egonda, egoki iruditu zitzaigun Lakuako agintariekin elkartzea”, azaldu dio EuskalKultura.com-i Euzko Etxea-ko hautetsi nagusia den Raul Onnaintyk.
2012/05/24
Elkartearen araudiak finkatzen duenari segituz, Pehuajó-ko Etxe-Alai Euskal Etxeak, Buenos Airesko probintzia argentinarraren barnealdean, bere buruzagitza berritzeko Urteko Ohiko Batzarra egin eta, ondorioz, Zuzendaritza Batzorde berrituko buru Alejandro Maggio Curutchet hautatu zuen, berarekin batera arituko direlarik, besteak beste, Liliana Esther Uztarroz, lehendakariorde; Maria del C. Bevilacqua Escudero, idazkari; eta Maria Elena Azurabarrena, diruzain.
2012/05/24
Sao Pauloko Eusko Brasildar Etxeak jai handia egin zuen iragan maiatzaren 5ean, elkartearen egoitza berria inauguratzeko. Bertan izan ziren euskal etxeko bazkide eta lagunak, eta baita hizkuntza ikastaroetako ikasleak ere. Bazkaltzeko ikurrina eta lauburuekin atonduriko paella izan zuten eta ondoren, dantza erakustaldia eskaini zuten hizkuntza ikasle batzuek. Egoitza giroz bete da jada aste hauetan eta jarduera ugari egiten ari dira bertan euskal-brasildar lagunek: hizkuntza ikastaroak, musa, gitarra eskolak, ospakizunak eta beste zenbait kultur ekimen.
2012/05/24
2012ko egitarauari zintzo jarraituz, Fuego Otoñal taldeak ‘Emakumeak’ antzerki lana aurkeztu zuen joan den larunbatean Jose C. Paz-eko Toki Eder euskal etxean. Emanaldia bukatzean, aktoreek euskal erakundeko lehendakaria den Maria Angeles Oñederra gonbidatu zuten agertokira omenaldi bat egiteko. Datozen hilabeteei begira, Toki Eder-etik jakinarazten digute aurrera jarraitzen dutela euskal etxean gauzatzen diren tailer eta ikastaroek eta erakundearen 16. urtemugari dagokionez, festaren data aldatu dela: hitzordua ekainaren 24an izango da, Altube Klubean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
