euskal diaspora eta kultura
2007/08/08
Buenos Aireseko Laurak Bat munduan irekita dagoen euskal etxe zaharrena da. Aurten 130 urteak betetzearekin batera elkarteko arduradunek bere web gune propioa aurkeztu dute, urteetako esperientzia eta bizipenak saren eskuragarri jarri nahian. Bertan Laurak Baten historia eta jarduerei buruzko informazioa jaso ahal izango dute internet bidez elkartea bisitatzen duten erabiltzaileek.
2007/08/07
Erresuma Batuko Arc argitaletxeak igande honetan aurkeztuko du Edinburghen Six Basque Poets liburua. Mari Jose Olaziregik editatu eta Miren Gabantxok ingelesera itzuli dituen poema sorta biltzen du liburuak: Bernardo Atxaga, Rikardo Arregi, Felipe Juaristi, Miren Agur Meabe, Kirmen Uribe eta Joseba Sarrionandiaren olerkiak. Atxagak, Arregik eta Meabek egingo dute Edinburghen aurkezpena eta datozen hilabeteetan beste egileek ere aurkezpenak egingo dituzte Manchesterren (Ingalaterran) eta Renon (AEB).
2007/08/07
Rosarioko Zazpirak Bat Euskal Etxeak 2007ko Argentinako Euskal Astearen behin-behineko egitaraua aurkeztu du. Lehen egutegia da eta oraindik ere aldaketak egon daitezke, baina argi erakusten du Santa Fe probintziako euskal etxe honetako bazkideak zenbat lan eta gogo jartzen ari dira Euskal Astearen antolakuntzan. Argentinako euskaldunen jaiko giroa prestatzeko pilota txapelketa egingo da irailaren 29a eta 30en eta Euskal Astea urriaren 7a arte luzatuko da.
2007/08/06
Juan Jose Ibarretxe lehendakariak Puerto Rico bisitatuko du datorren irailean eta bertako Abokatu Elkargo Ofizialaren Urteroko Biltzarrean hizlari nagusi gisa hartuko du parte, irailaren 8an Rio Granden. Puerto Ricoko abokatuen presidentea den Celina Romany Siaca anderearen hitzetan, Ibarretxe aditua da elkarrizketa eta negoziazio gaietan, eta honelako gaitasun eta baliabideak beharrezkoak dira uhartearen estatus-a bideratu eta irtenbidetzeko. Ondoko artikulua, Puerto Ricotik bertatik, El Nuevo Día-ko Israel Rodríguez Sánchez kazetariak sinatutako kronikaren laburpena da.
2007/08/06
Bilbao, Donostia eta Gasteizko elizbarrutietako artxiboek eta Irargik (Euskadiko Ondare Dokumentalerako Zentroa) antolaturik, 2007.eko azaroaren 8 eta 9an 'Artxiboak guztientzat' izenburudun jardunaldiak egingo dituzte Bilboko Euskalduna Jauregian. Bertan 2000 urtean hasi zen elizbarrutietako artxiboen digitalizazio eta sareratze prozesua aztertuko dute. Elena Cortazarrek, Bilboko Elizbarrutiko artxiboko teknikariak BasqueHeritage.com-i azaldu dionez, diasporatik kontsulta eta dokumentazio eskari asko jasotzen dituzte. Jardunaldietan izena emateko epea urriaren 30a bitartean egongo da irekita.
2007/08/06
Buenos Aires probintziako Ayacucho herriko 'Euskal Odola' Euskal Etxeak hartu du bere baitan Argentinako 29. Mus Txapelketa Nazionala antolatzeko lana. Abuztuaren 18, 19 eta 20ean gauzatuko den lehian Mundialerako ordezkari argentinarrak aukeratuko dituzte. Txapelketan parte hartzeko 300 pesoko izenematea ordaindu beharko du euskal etxe bakoitzak. Txapelketa Euskal Komunitateen Mus Federakundearen arauekin jokatuko dute.
2007/08/06
'Izan zirelako gara, izan garelako izango dira', euskal esaera honekin zabaldu zuten Patxi Baztarrika Eusko Jaurlaritzako Hizkuntza Politikarako sailburuordeak eta Lorea Bilbao Kultura saileko aholkulariak joan den ostegunean Buenos Aireseko 'Laurak Bat' Euskal Etxearen 130. urteurreneko ekitaldien barnean 'Euskadi: Debates para el Futuro' izenburupean eskaini zuten hitzaldia. Euskara eta gaztelania hizkuntza ofizialkideak direla esan zuten, baina lege aldetiko berdintasuna gauza bat dela --gaur egun EAEn erdietsia-- eta beste bat gizarte mailakoa, eta egungo ahalegina azken hau lortze arren ari dela egiten, azaldu zuten.
2007/08/04
Bosgarren urtez euskara ikastaro trinkoa eskainiko du Montevideoko Euskal Erria Euskal Etxeak eta gero eta pertsona gehiago dira interesatuak. Ikastaroak doakoak eta irekiak dira, elkarteko kide izan ala ez. Joan den astelehenean inauguratu zen ikastaro berria eta iraila bukaera arte luzatuko da. Euskara Munduan programako koordinatzailea, Jose Francisco 'Kinku' Zinkunegi, ekitaldian izan zen eta ikasleek euren interesa agertu zioten, aldi berean Uruguain euskara ikasi nahi duenak izaten dituen arazoei buruzko hausnarketa eta elkarrizketa sortu zelarik.
2007/08/04
Eusko Jaurlaritzako Euskal Gizataldeekiko Harremanetarako zuzendari Josu Legarreta Buenos Aires probintziako zenbait euskal etxeren bisitan ari da Argentinan, joan den astelehenetik abiatuta. Brasilgo Sao Pauloko Eusko Alkartasuna Euskal Etxea bisitatzetik zetorren Legarretak zaharberritze lan handiak egin dituzten euskal etxeak ari da bisitatzen eta zerrenda horretan daude azken egunotan bisitatu dituen Arrecifes eta Bragado, edota Chivilcoy-koa, azken honek etxe egin berri osoa inauguratu baitzuen joan den ekainean. Euskal ordezkariak Buenos Airesen bukatuko du bidaia, bertako Laurak Bat Euskal Etxearen 130. urteurreneko ekitaldietara bilduko baita, aurretik Ekin, Euskaltzaleak eta Eusketxe erakundeen egoitza Mexiko 1880 kaleko egoitza berria bisitatu ostean.
2007/08/03
Bi filme euskaldun ikusi ahal izango dira --bat gaur arratsaldean eta bestea etzi igandez-- San Frantzisko iparraldean kokatzen den Napa-Sonomako Wine Country Film Festival zine jaialdiaren baitan. 'Show me the way, Ixabel' (Kutsidazu bidea, Ixabel) izango da gaurkoan, sei t'erdietatik aurrera, eskainiko dena; etzi, berriz, 'Nomadak TX' filmearen txanda heldu da. Biak bertsio originalean eskainiko dira, ingelesezko azpitituluz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
