euskal diaspora eta kultura
2007/10/18
VascosMexico posta zerrendak, izen bereko webgune eta elkartearen haziak, lau urte bete ditu egunotan. Bere sorrera urriko larunbat batean gertatu zen, Jaione Arrieta sustatzaileak Mexikoko euskal komunitatea harremanetan jartzeko komunikabide baten beharra ikusi zuenean. Harrez gero, VascosMexico familia handi bat bihurtu da eta posta zerrendak 500 kide inguru eta webguneak 1255 erabiltzaile harpidetu bildu ditu. Orain elkartea babes eta finantziazioa eskuratu nahian dabil, etorkizunari begira Mexikoko euskaldunen topagune birtuala izan den ekimena sendotu ahal izateko.
2007/10/18
Unai Elorriaga idazle getxoztarra Italian da egunotan, 'S.P.-rako tranbia' bere eleberriaren italierazko bertsioa aurkezteko. Gran Via argitaletxeak plazaratu du lana eta Lara Cutik itzuli. Idazleak asteartean hasi zuen aurkezpen bira Genoan eta gaur, bihar eta etzi Milan, Bologna eta Bergamon izango da. Eleberria gaztelerara, ingelesera eta alemanera itzulia izan da jada eta zinemara ere eraman dute, 2008an estreinatuko delarik.
2007/10/18
Kepa Rekakoetxea eta Jose Antonio Torrontegi euskal enpresariak Chivilcoy-ko Beti Aurreran egon ziren joan den larunbatean, azkeneko hau bere emaztearekin batera. Torrontegi, enpresaria izateaz gain, Mungiako alkate ohia da eta senadoreri jeltzalea Espainiako parlamentuan. Vetrano familia bisitatzeko iritsi ziren Chivilcoy-ra eta Euskal Etxea ezagutzeko gogoz. Bertatik esker onez gonbidatu zituzten eta elkarrekin afaltzeko aukera izan zuten. Topaketaren ondorioz Chivilcoy eta Mungia senidetzeko proposamena sortu zen.
2007/10/18
Eusko Jaurlaritzak akordioa sinatu du aste honetan telefonia arloko konpainiekin eta mugikorren fabrikatzaile nagusiekin, euskararen presentzia bermatzearren eta euskara hizkuntz menuko bat gehiago gisa ager dadin terminaletan eta oro har Euskadiko telefonia zerbitzuetan. Patxi Baztarrika Hizkuntza Politikarako sailburuordeak sinadura ekitaldian azpimarratu zuenez, 25 urte azpiko gazteen %50etik gora elebidunak dira, Araba, Bizkaia eta Gipuzkoan bederen eta 30 urtetik beherakoen artean %77,3 gauza da mugikorra euskaraz erabiltzeko. Akordioa, mugikorra euskaraz erabili nahi duten hiritar guztiei eskubide hori bermatzearren sinatu da.
2007/10/17
Erbesteari buruzko 8. Mintegia gaur bertan hasiko da Donostian, Hamaika Bide Elkarteak eta Euskal Herriko eta atzerriko hainbat unibertsitatek antolatuta. Larunbata bitartean nazioarteko ikerlariek erbesteari buruzko eyren azken lanak aurkeztuko dituzte bertan. Mintegira bildu ezin direnentzako Hamaika Bide elkartearen webgunean euskal erbesteko pertsonaien biografiak eta beste zenbait material dago kontsultagai.
2007/10/17
Frankfurteko Liburu Azokaren azken ediziorekin gustura agertu dira euskal editoreak eta euskal literaturak gero eta jakinmin gehiago sortzen duela baieztatu ahal izan dute Alemaniako topaketa honetan. Aurten euskal idazleek --Arantxa Urretabizkaia, Edorta Jimenez, Xabier Montoia...-- egin dituzten aurkezpen eta irakurraldiek azokaren esparrua gainditu dute eta hiriko kultur eskaintzarekin bat egin dute Café Exzess aretoan eraturiko Euskal Literatur Gauarekin.
2007/10/17
Paranako Urrundik Euskal Elkarteak adierazi du lehenengo pianistaren txanda izango dela, hileko 17an eta argazkilariaren erakusketak 19an irekiko ditu ateak. Victoria Ajak Círculo Médico auditorioan eskainiko du kontzertua eta aurreko hilabetean Argentina eta Uruguaytik hasitako nazioarteko birarekin aurrera egingo du. Mikel Arrazolak bestalde, Euskal Herriko jende eta paisaiaren inguruko 60 irudi baino gehiagoko bilduma erakutsiko du Martiniano Leguizamon Museo Historikoan.
2007/10/16
Kaliforniako gobernadoreordea, John Garamendi euskal jatorriko politikari demokrata eta bere emazte Patty Euskal Herrian dira bisitan, Guggenheim Museoaren hamargarren urteurrena dela-eta antolatutako ekitaldietan parte hartzeko. Eusko Jaurlaritzatik eginiko gonbidapena aintzat harturik, Garamendi Izaskun Bilbao Eusko Legebiltzarburuarekin eta Josu Jon Imaz EAJ-PNVko presidentearekin bildu zen atzo goizean, eta arratsaldez Tontxu Campos Hezkuntza sailburuarekin eta EHUko errektorearekin eta Guggenheimeko 10. urteurreneko gala afarian hartu zuen parte, euskal gizarteko hainbat ordezkarirekin batera. Gaur arratsaldez Ibarretxerekin bilduko da Gasteizen Lehendakaritzan.
2007/10/16
Eusketxeren 19. urteurrena ospatzearren elkarteko ehun bat lagun bildu ziren Mexico 1880ko egoitzara San Migel eguneko aste berean. 'Euskal Taberna' delakoa antolatu zen eta bertaratu zirenek Eusketxeko Dantza Taldearen emanaldi baten lekuko izan ziren. Opari eta eskertze gisa, Eusketxe Arte Galeriaren erakusketetan edo elkartearen ekimenetan parte hartu izan duten pare bat artistaren lan batzuen zozketa egin zen bazkide eta lagunen artean. Eusketxek urte askotan lanean jarraitzeko itxaropenarekin egin zuen ospakizuna, 'ideia aniztasuna etengabe bultzatuz eta bertako zein kanpoko lagunei giro euskaldun bat eskainiz'.
2007/10/16
'Biraoak. Nafarroan bilduak' aurkeztu berri duten liburuan euskarazko madarikazioak biltzen dituzte bi idazleek. Lanarekin, euskaraz biraorik existitzen ez dela dioen mitoarekin apurtu nahi izan dute eta horrekin batera hizkuntzaren alde adierazkorra bizirik mantendu. Liburuaren mamia ez da juramentu-zerrenda soila, horrez gain adierazpenen jatorria, euren intentsitatea eta erabiltzeko adibide batzuk ere bildu dituzte Salaberrik eta Zubirik. Alu filda, melontzioa, zarratrakoa, malaprenda, urde zerria... euskaraz ere ehunka adierazpen daude 'gustura' madarikatzeko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
