euskal diaspora eta kultura
2007/10/30
Taldea Valle del Bravo, Tepozotlán eta Querétaro herrietan arituko da, besteak beste, Mexikora egiten duen bigarren bira den honetan. Aretxabaletatik iritsiko den espedizioak 27 partaide izango ditu eta errepertorioari dagokionez oso mota ezberdineko musika moldeak eskaintzeko asmoa ekarri du. Duela hiru urte egin zuen Akordeoi Orkestra bere aurreko bidaia mexikarra, arrakasta handiz musikalki zein Diaspora eta Mexiko bera ezagutzeari dagokionez.
2007/10/29
Hiru euskal bertsolari gazte bezain trebe Argentinara joango dira datorren otsailean, bertako payadoreekin batera aritzeko. Eurak Fredy eta Xabi Paya anaiak eta Maialen Lujanbio dira eta eurekin batera jardungo da Wilson Saliwoncyk payadorea. 2008ko Euskal-Argentinar Bertso-Verso Topaketetan hartuko dute parte. Saio koloretsu, gazte, dinamiko eta biziak segurtatuta daude, joan den ekainean Wilson izan baitzen gauza bera Euskal Herrian egin zuena. Saioetako bat berera bildu nahi duten euskal etxeak aski dute Wilson-ekin harremana egitea. Ikus-entzunkizun gomendagarria izango da doaike.
2007/10/29
Ostiralean bukatu zen Baionako Unibertsitatean Euskal Herria Mugaz Gaindi nazioarteko mintegiaren IV. edizioa. Antolatzaileak pozik agertu dira topaketak izan duen erantzunarekin eta ikerlari gazteen ekarpena azpimarratu nahi izan dute. Mintegiak orain bere bertsio digitalari emango dio bide EuskoSareko webgunean eta bertan mundu osoko historialari eta ikertzaileek parte hartu ahal izango dute. Mintegiko ponentziak sarean irakurgai daude jada eta azaroaren 5etik aurrera horiei buruzko eztabaida tartea irekiko dute.
2007/10/29
Udalbidek eta Basque Heritagek hitzarmena sinatu zuten ostiralean Donostian, Udalbiltza ofizialaren elkartasun fondoa den Udalbidek Basque Heritage ekimenak euskal diasporaren alde egiten duen lana laguntzearren. Izenpetzea egin ondoren, Julian Eizmendi Udalbiltza eta Udalbideko lehendakariak prentsaurrea eskaini zuen Udalbiltza-Udalbideko ordezkaritza batek Argentina eta Uruguaira egin berri duen bidaiaren berri emateko. Diasporarekiko harremanaldi berri baten hasiera ezarri nahi izan du bidaiak, 'itsasoaz bi aldeotako euskaldunen elkar-ezagutza eta lankidetzan oinarritua'.
2007/10/27
Gaur DFko Euskal Etxera egingo duen bisitarekin hasiko du Ibarretxe lehendakariak sei egunez Mexikora garatuko duen egonaldia. Egitarauak azken orduko aldaketak izan ditu eta horiek ere bildu ditugu datozen lerrootako informaziora. Gaur Euskal Etxera egingo duen ikustaldiarekin hasi eta datorren ostegunean Calderón presidente mexikarrarekin izango duen elkarrizketarekin amaituko da Ibarretxeren bidaia mexikar ofizial hau.
2007/10/26
Eusko Jaurlaritzak munduko hainbat unibertsitatetan bultzatzen dituen Euskara eta Euskal Kultura ikastaroek erantzun oso ona izan dute Mexikon eta gero eta ikasle gehiago ari dira biltzen. Ikasturte honetan lau unibertsitatek eskaintzen dituzte: Mexikoko Unibertsitate Nazional Autonomoak, DFko Unibertsitate Iberoamerikarrak, Monterreyko Teknologikoak eta Pueblako Unibertsitate Iberoamerikarrak. Gurutzne Etxeberria amezketarra eta Gorka Larrañaga azkoitiarra dira irakasleak.
2007/10/26
Gorka Larrañaga azkoitiarrak bi urte daramatza Mexikon, eta Arte Ederretako ikasketak burutzera etorri bazen ere, orain Euskara eta Euskal Kultura Ikastaroetako irakasle bezala dabil buru-belarri, bere kultura mexikarrekin partitzeko lanetan. 'Euskaldun eta euskal kulturaren parte eta eragile naizen heinean, gure errealitatearen ikuspegi hori helarazi nahi diet ikasleei', agertu dio EuskalKultura.com-i.
2007/10/26
Deialdiak Salta, Formosa, Santa Fe, Córdoba, Mar del Plata eta La Pampa-tik etorritako senideak biltzea lortu zuen Villa Elisa herriko Cabaña El Rincón-en, Buenos Aires probintziako La Plata hiriburu aldean. Ez ziren falta izan ikurriñak ezta Argentinako banderak ere. Zuhaitz genealogiko erraldoi bat ere ipini zuten pareta batetan. Fernanda Goizueta antolatzaileak Euskalkultura.com-i adierazi dionez topaketak harremanak estutzeko balio izan du dudarik gabe, bai aldez aurretik ezagutzen zirenen artean eta are gehiago ezagutzen ez zirenen artean.
2007/10/26
Argentina eta Txileko Nafar Etxeetan biltzen diren nafarrek buruzagitza aldatu zuten joan den abuztuan. Oscar Esparza, Mar del Platan egoitza duen Hegoko Nafar Etxeko presidentea, hautatu zuten Argentina eta Txileko sei nafar etxeetako presidente, lekukoa hartuz bi kargu horiek uztatuak zituen Marcelo Domingori. Hona Oscar Esparzak, 17 urte zituela San Martin Unx utziz 'Amerikak egitera' abiatu zen emigrante baten Argentinan sortu semeak, Diario de Navarra-rekin eginiko solasa.
2007/10/25
Juan Jose Ibarretxe lehendakaria bihar bertan abiatuko da Mexiko aldera eta sei eguneko egonaldia egingo du bertan. Bidaiako hitzordu nagusienetako bat, ezbairik gabe, Felipe Calderón mexikar presidentearekin egingo duen bilera izango da. Euskal agintaria Mexiko Hiriko Euskal Etxean ere izango da, elkartearen mendeurrena ospatzeko eta bertako euskaldunak agurtzeko. Aldi berean, Ibarretxe EmpreBask, Mexikoko euskal enpresarien elkarte sortu berriko arduradun eta bazkideekin bilduko da.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
