euskal diaspora eta kultura
2007/11/27
Argentinan Euskaraz programaren 2003-2007 planaren barruan trebakuntza jaso duten berrogei inguru euskera ikasle-irakasleek lau urte horietan lortutako mailaren arabera bi modalitate ezberdinetan jarraituko dute beraien formakuntza. Diaspora 1 taldeak orainarteko modalitatean jarraituko du bere ikaskuntza prozesua eta Argentinan trebakuntza jasoko dute, internet eta barnetegien bitartez, hurrengo urtean 1B maila lortu arte. Diaspora 2 taldeko hogeitabost lagunek, berriz, bi hilabeteko prestakuntza ikastaro bat egingo dute Euskal Herrian, Lazkaoko Maizpide Barnetegian. Euskal inguru batean jasoko dituzten klaseen bidez euskara maila hobetzeko aukera bikaina izango dute.
2007/11/26
Munduko euskal etxe eta komunitateak lanean ari dira Euskararen Eguna dela eta antolatutako ekitaldiei azken ukituak ematen. Data, berez, abenduaren 3a da, San Frantzisko Xabier ospatzen den egun bera, aurten astelehena, baina askok asteburura aurreratuko dute ospakizuna. Horixe egingo dute AEBtako euskaldunek, esaterako, larunbatean Chinoko Euskal Etxean egingo duten bestarekin. Bertan Bernardo Atxaga idazleak eta Xabier Irujo Nevada-Renoko Unibertsitateko irakasleak, euskarari buruzko hitzaldiak emango dituzte eta jarraian euskara hutsezko afari batean hartuko dute parte, Chinoko Euskal Etxean.
2007/11/26
Buenos Aires hiriburuko Euskal Echea Institutuak ikasturte amaierako ohiko Euskal Festa ospatu zuen joan den azaroaren 18an. 'Immigrazioa' izan da aurten erabakitako gaia eta zenbait ekimen garatu dira horren inguruan, tartean dantzak, antzezpenak, erakusketak, baita eeskolako ikasleen gurasoek osaturiko abesbatzaren emanaldia ere, 'Lau Haizetara' dokumentalaren proiekzioak eta 'La Huella Vasca' ikusteko aukera. 350 bat ikasle eta mila bat guraso eta familiarteko bertaratu ziren, aurten Bilbon egindako Mundu Kongresuak aukeratutako eslogan berbera erabiliz: Zubigintzan.
2007/11/26
Eusko Aterpea euskal etxeak bazkari bikain batez ospatu zuen joan den azaroaren 18an bere zortzigarren urteurrena. 120 bat bazkide eta lagun bildu ziren karia hortara Gral. Rodriguez-eko Pentsiodun eta Erretiratuen Elkartearen egoitzan. Bertara agertu ziren Marcelo Coronel alkatea eta bere emazte Adelma Arguissain senadore probintziala. Izan ere, hautetsi bikoteak Juan Itcea Euskal Etxeko lehendakariari eta Francisca, "Kika" Vicente andere zuzendaritza batzordekide eta liburuzainari eskuz esku eman zieten, Buenos Aires probintziako Senatuaren izenean, 4.000 pesoko txeke bat, Euskal Etxeak, nonbait, bere egoitzaren eraikuntza lanetarako lagungarri erabiliko duena.
2007/11/24
Craig eta Pierre Bidondo anaia iparramerikarrek The Homecoming (etxeratzea) izeneko diskoa plazaratu dute eta bertan euren euskal eta norvegiar jatorriak Alaskako musikarekin nahasten dituzte. Fusio aberats hau jazz, soul, bossa, rock eta samba estiloko hamalau kantuetan bildu dute. Horiekin batera, 'euskal afari' tipiko batean bizi den giroaren grabazioak edota 'Bortian Ahuzki' izeneko euskal kantua entzun daitezke.
2007/11/24
Arrakastaz eta 180 pertsona partaide ospatu zuten joan den asteburuan 'Beti Aurrera Aberri Etxea' Euskal Etxeko kide eta lagunek, Argentinako Viedma hirian, euskal erakundea sortu zeneko 11. urteurrena. Giro berezia ekarri zuen Necocheatik etorritako Otxote Osasunak, bere ohiko euskal kantu eta bilbainada doinuez osagai koloretsu eta bixigarria ipini baitzion gauari, bildutakoen txaloak sortuz eta urteurrenaren ospakizuna umorez tindatuz. General Rocako dantzariak ere ez ziren atzean geratu eta bertaratutakoen onespena erdietsi zuten.
2007/11/23
Eusko Ikaskuntzako EuskoSare ekimenak artikuluagatik protestatzeko idatzitako mezuak 6.400 atxikimendutik gora jaso ditu lerro hauek idazteko momentura arte, eta zenbaki hau azkar ari da hazten. Izan ere, handia izan da Keith Johnson kazetariak Wall Street Journal egunkari estatubatuar ospetsuan argitara emaniko artikuluan euskarari buruz eta euskara sustatzeko ahalegin eta politikari buruz esandakoak gezurtatuz edota objetibidade faltagatik arbuiatuz Euskal Herrian zein nazioartean --tartean Diasporan-- sortu den protesta mugimendua. Besteak beste, euskara soilik hizkuntza isolatu eta bitxitzat, eta egungo bizimodurako balio ez duen hizkuntza alferrikakotzat jotzen zuen artikuluak.
2007/11/23
Urtero urduri samar dabiltza sasoi honetan mundu osoko goi mailako hainbat chef eta jatetxe arduradun. Michelin gida ospetsuak bere 'ebazpena' jakin arazten duen garaia da eta hainbatentzat izan litekeen azterketarik zailena eta erabakiorrena da honakoa, kategoriari eusteak, izarren bat gehiago lortzeak edo izarrak galtzeak harreman zuzena izan baitu jatetxea beraren arrakastarekin. Publizitaterik onena eta txarrena izan daiteke mutiko loditsuaren juzkua. 2008koan, jatetxe euskaldunek ez dute izarrik galtzen eta, irabazi, aldiz, lauk irabazten dute izar bana: Donostiako Kokotxa eta Kursaal-ek; Larrabetzuko Azurmendi-k; eta Urdaizko El Molino de Urdanoz-ek.
2007/11/23
Mondragon Unibertsitateko HUHEZI fakultatea Herri Indigenen arteko I. Ikasle-Truke Programa burutzen ari da. Amerika eta Afrikako herri indigena desberdinetatik iritsitako bederatzi pertsonek parte hartu dute bertan: kitxuak, maiak, maputxeak, aimarak eta bubiak. Hiru astetan zehar, azaroaren 30a arte, Euskal Herrian izango dira euskal kulturaren sustapena gertutik ezagutzeko. Hainbat herri, enpresa, erakunde eta komunikabide bisitatuko dituzte egun hauetan.
2007/11/22
Atzo aurkeztu zituen Gerediaga elkarteak Durangoko Azokaren 42. edizioko ildo nagusiak izango direnak. Azoka abenduaren 5etik 9ra egingo da Durangon eta urtero legez euskal kultur munduaren topagune bihurtuko da: idazle, musikari eta editoreek bertan aurkitu dituzte irakurle eta entzuleak aurrez aurre. Aurten gainera azoka umoretsu dator, umorea izango baita ardatz nagusia hainbat ekitaldietan. Argizaiola saria Maiayz aldizkari eta elkarteak jasoko du eta Iparraldeko idazle, musikari eta argitaletxeek presentzia nabariagoa izango dute aurten, Euskal Kultur Erakundearen eskutik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
