euskal diaspora eta kultura
2007/12/13
Ohi duenez Suipachako Gure Txokoa Euskal Etxeak urte bukaerako jaia aurreratu egin zuen, oporren aurretik elkarteko bazkide eta lagunak biltzeko. Aurten jaia Sociedad Rural elkartearen egoitzan egin zuten eta bertan bildu ziren Gure Txokoako zuzendaritza batzordea, bazkideak, senitartekoak eta lagunak. Lagunarteko bazkaria egin eta ondoren euskal musikaz eta dantza erakustaldiaz gozatu ahal izan zuten. Euskaraz egin zen brindisarekin ongi etorria egin zioten urte berriari, aurtengoa bezala ekimenez beteta etorriko denaren esperoan.
2007/12/13
Iduri du garaiz harrapatu dutela eta onerako bidean hasi dela. Iragan asteartean egin diote ebakuntza aita Martxel Tillous-i Baionako ospitale batean eta emaitza ona izan dela adierazi dute familiako iturriek. Arrengura eta kezka nagusitu ziren pankreaseko minbizia izan zezakeela zabaldu zelarik, baina, nonbait, gaitza hastapenean zen eta kendu ahal izan diote. Eritasuna, medikuarengana joan arazi ondoren atxeman zioten, Xipri Arbelbide bere lagun eta apeza ere badenak ongi ez zegoela antzeman baitzion eta horretara behartu. Ezin izango du lehengo bizimodu azkarra eraman, Ameriketan harat-hunat estaturik estatu, baina bai bizimodu normala Euskal Herrian.
2007/12/13
Arrojos, dichas y nostalgias, Vascos en el Valparaíso del Siglo XX (Ausardia, zoriona eta herrimina, Euskaldunak XX. mendeko Valparaison) Rubila Andrea Araya Ariztia kazetari txiletarrak idatzitako liburua gaur aurkeztuko da Valparaison. Liburura 43 euskaldunen lekukotzak jasotzen ditu, lana horietan eta erregistroetan oinarrituz, euskaldunak nola iritsi ziren Valparaisora eta nola finkatu eta hedatu ziren azaltzeko. Obrak Andrés Irujo Saria irabazi zuen 2005eko edizioan eta Urazandi Bilduman agertu da aurten. Ale bat Valparaisoko Santiago Severín Liburutegiari emango zaio, Ivet Oñate Cid zuzendariaren eskuetan. Ekitaldirako deia Archibaldo Uriarte Bosgarren Erregioko Eusko Etxeko lehendakariak eta Jon Erdozia Euskadik Txilen daukan Ordezkaritzako buruak egin dute.
2007/12/12
Bihar azken eguna. La Platako Unibertsitate Nazionalak (UNLP) Euskara eta Euskal Kultura Ikastaroaren ardura hartuko duen irakasle bat kontratatu nahi du. Ikastaroa Eusko Jaurlaritzak eta munduko hainbat unibertsitateek euskara sustatu eta euskal kultura zabaltzeko duen ekimenen barruan sartzen da. Hautagaiek Euskal Filologia edo Itzulpengintza eta Interpretaritzako lizentziatuak izan behar dute eta irakaskuntza arloan eskarmentua izan behar dute. Hautagaitzak aurkezteko epea bihar bertan itxiko da.
2007/12/12
Asiako lehen euskal etxea da Shanghaiko elkarte gaztea eta bere kideek aurretik ere aurkeztu zuten sarean euren burua elkartearen webgunearekin. Orain ordea, hura osatzera dator euskal etxearen bloga, mundu osoko internet zaleen partehartzea eta kolaborazioa bultzatu nahi duen medioarekin. Blogaren bitartez elkartekideek euskal etxearen azken ekitaldien berri emango dute eta euskal eta txinatar kulturen arteko topagunea bihurtzea da euren asmoa.
2007/12/11
Carlos Casares-eko 'Euskalduna' Euskal Etxeak, Buenos Aires probintzia argentinarrean, Zuzendaritza berritu duela adierazi du ohar baten bidez. Agintealdi berria hasiko duen Zuzendaritza Batzorde berriak Javier Oscar Echeberz dauka lehendakari, eta berarekin batera Osvaldo Iriarte, lehendakariorde; Roberto H. Echeberz, idazkari; Marta Zubeldia, diruzain, besteak beste.
2007/12/10
Mallorkako Artea Euskal Etxea 1997an sortu zen, sustraiak Euskal Herrian dituzten edota Euskal Herriarekin estimu lotura bat duten Mallorkako herritarrek elkargune bat izan dezaten. Orain, elkarteak hamar urte bete dituela-eta, euskal-mallorkatarren euskal etxeak urtero antolatzen duen Euskal Kultur Astearen baitan ospatu du joan den astean lehenengo hamarkada, bertako gizartean oinarri gero eta sendoagoak ezarririk.
2007/12/08
Rosarioko Euskal Astean, Liburutegi bileran hain zuzen ere, Lapridako Eusko Txokoak 18. Urteurrena zela-eta deitutako lehiaketaz ohartarazi zuen. Bi hilabete joan dira geroztik eta erakundeak hiru irabazleen izenak eman ditu jakitera, Urteurrena eta Euskararen Eguna ospatzeko egindako ekitaldian. Bildutako 138 erantzun zuzenen artean, Joaquin Orta atera da zozketan irabazle, Bigarren Hezkuntzako 1 zenbakidun Eskolako 9.B-ko ikaslea bera; baita ere Fiamma Quinteros, Polimodal HUSOCeko lehenengo mailakoa Hezkuntza Ertaineko 1 zenbakidun Eskolan; eta Alicia Mariezcurrena, Ayacuchoko Euskal Etxeko kidea. Hiruak argitalpen bana hartu dute opari.
2007/12/07
Maiatzetik azaroa bitartean 'Villegas-ko Euskaldunak' Euskal Etxe argentinarrak euskal zine zikloa eskaini du eta laburmetraien selekzio bat erakusketaren bidez Euskal Herriko egungo zinearen egoeraren berri eman dio komunitate villegastarrari, erantzun arrakastatsua lortuz. Euskal kultura proposamen honek --lehenago euskal etxeetan ez hain zabaldua-- gero eta zale gehiago ari da biltzen, ez bakarrik euskal kultura zaleengan, zinema zaleengan ere baizik. Hilean bi saio eman dira, zazpi hilabete iraun duen esperientzian, eta arduradunek aitortzen dute 'ziklo honek esperientzia eta ikaskuntza berriak jorratzeko aukera' ekarri diela. 'Zalantzarik gabe', diote, 'hurrengo urtean segida emango diogu ekimenari'.'
2007/12/07
Sao Pauloko Eusko Alkartasuna Euskal Etxeak bat egingo du Brasildik, Euskararen Nazioarteko Eguna dela eta munduan zehar euskaldunak egunotan egiten ari diren ekitaldiekin. Euskal-brasildarren jaiak Festa do Euskara izenburua izango du eta elkarteko kide eta lagunak babarrun jate baten inguruan bilduko ditu. Elkarteko kideek ekitaldi berean ospatuko dute euren Gabonetako jaia.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
