euskal diaspora eta kultura
2008/05/13
Rosarioko Zazpirak Bat Euskal Etxeak, Argentinan, bere lehenengo topaketa euskal-eskoziarra ospatuko du datorren asteko larunbatean, hilaren 24ean. Zenbait hizlarik euskara eta gaelikoaren historiari zein egungo egoerari buruzko hitzaldiak eskainiko dituzte. Asteburu horretan den Maiatzaren 25a ere --Argentinan jai egun nazionala--, euskal-eskoziar era argentinarrera ospatuko dute, erreki bat antolatuz alegia. Festan, Euskal Etxeko dantza taldea eta abesbatza arituko dira eta Buenos Aireseko 'Fingal' musika eskoziarreko taldeak, gitarrak, gaitak eta perkusio zeltaren bidez, ikuskizuna eskainiko du.
2008/05/13
San Franciscoko Piperade jatetxea hiri estatubatuar honetako restaurant gomendagarrienen artean dago eta orain, bere ezaugarri nagusia den euskal gastronomiari euskal jatorridun ardo eskaintza zabala dastatzeko aukera gehitu dio. Emmanuel Kemiji Master Sommelier-ak prestatu duen ardo kartan dozena bat ardo txuri eta 40 ardo beltz baino gehiago biltzen dira, euskal ardoei dagokienez. Gerald Hirigoyen sukaldari lapurtarra da Piperadeko chef eta jabea, Basque sukaldaritzaren zabaltzailea AEB Mendebaldean eta, besteak beste, bere emazte amerikarrarekin batera, euskal gastronomia liburuen egilea ingelesez.
2008/05/13
Erakundearen araudiak dioenari segituz, Chaco probintzia argentinarreko 'Kotoiaren Lurra' Euskal Etxeak bere Zuzendaritza Batzordea berritu du eta agintaldi berri baterako buruzagiak hautatu ditu. Euskal Etxetik beretik Fatima Soliz Eceiza komunikabideetarako arduradunak jakin arazi duenez, Jose Christian Echavarria izango da agintaldi berrian ere elkarteko lehendakari, Marta Ciruelo Etxepare lehendakariorde, Marianela Echavarria idazkaria eta Luz Iliana Monti Arrazate diruzaina, beste zenbait karguren artean.
2008/05/12
Eusko Jaurlaritzako Hizkuntz Politikarako sailburuorde Patxi Baztarrikak La Plata hiri argentinarrean ekingo dio gaur Argentina eta Mexikon garatuko duen astebeteko bidaiari. Buenos Aires probintziako hiriburuan sailburuordeak mintzaldia eskainiko du, La Platako Unibertsitate Nazionalaren (UNLP) Euskara eta Euskal Kultura Lektoretzaren hasiera ekitaldiaren barruan. Bihar eta etzi Baztarrika Buenos Airesen izango da eta bertan Buenos Aireseko Unibertsitateko (UBA) arduradunekin eta Laurak Bat Etxeko zuzendaritzarekin bilduko da. Ostegunean bidaiaren bigarren zatiari ekingo dio, Mexikon.
2008/05/12
Europako eta Estatu Batuetako zenbait unibertsitatetako adituek parte hartuko dute etzi Kaliforniako Unibertsitateak Santa Barbarako kanpusean antolatu duen Basque Studies Symposium topaketan. Hitzorduak bi ardatz nagusi izango ditu: lehena linguistika, eta bigarrena hizkuntza minorizatuetako literaturek mundu globalizatuan bizi duten egoera. Aurelia Arkotxa, Mariasun Landa eta Miren Agur Meabe idazleek euskal literaturari buruzko mahaingurua egingo dute.
2008/05/12
Flagstaffeko euskal ostatua 1926ean eraiki zuen Jesus Garciak eta, euskal ostatuetan askotan bezala, kantxa erantsi zion. Inguruetako euskaldunen etxe izan zen hura, urtetan, baina egun bi eraikinak hondatuak eta, kantxaren kasuan, ia erortzear dago. Flagstaffekoa Mendebalde amerikarrean gelditzen den dozenerdi bat pasexe kantxetako bat da, eta Arizonan estatuko bakarra. Orain, Flagstaffeko herritar talde batek kanpaina jarri du abian eraikina salbatzeko. Milioi bat dolar beharko liratekeela diote eta helburu horrekin NABOrengana jo eta euskalamerikar aberatsen baten bila ari dira.
2008/05/10
Azken momentuko xehetasunak prestatzea besterik ez da falta Lapurdiko Senpereko lakuan Herri Urrats jaialdiaren 25. urteurrena ospatzeko. Iparraldeko ikastolen aldeko jai honetan, urtero bezala, ekintza ugari burutuko dira bihar igandea, egun osoan zehar: musika kontzertuak, erakusketak, artisau postuak, gazteentzako jarduerak, bertsolariak... Buenos Airesen, berriz, Iparraldeko Euskal Etxeak bere jaialdi propioarekin bat egingo du gaur bertan deialdiarekin, jokoak, zozketak eta dantzak eta umore on euskaltzalea nagusi izango diren festa antolatuz. Pariseko Eskual Etxeak ere bi eguneko jarduera programa antolatu du, kasu honetan hilaren 24 eta 25erako.
2008/05/10
Buenos Aireseko Eusko Kultur Etxeak (Eusketxe) eta Euskaltzaleak Euskara Akademiak euskal dantza talde berria sortzeko ikastaroa hasiko dute elkarrekin hilaren 17an. Klaseak Aitor Alava dantzari arabarrak emango ditu eta helburua 'Euskal Herriko edozein dantza talde normal baten maila lortzea izango du'. Bestalde, argentinar hiriburuko euskal komunitateak meza bat ospatuko du igande honetan Eusketxeko lehendakariordea izan zen Marta Iztueta de Guerricoren heriotzaren lehen urteurrenaren karietara, eta zendu berri diren Ignacio Telletxea Idigoras historialaria eta Henrike Knörr euskaltzaina gogoan, 'biak euskal kultur eragile galantak'.
2008/05/09
Herritarren partaidetzaren bidez, Txinako Shanghai hiriko eta Zeelanda Berriko Christchurch herriko kaleetako publizitatea minutu batzuez desagertaraztea du helburu Maider Lopez artista donostiarrak. Aurtengo irailean burutuko du euskaldunak proiektua. Ozeaniako ekimenean kale komertzialetako iragarkiak ezkutatu egingo ditu kokapen estrategikoak eta mugimendua erabiliz. Asiako proiektuaren data zehaztu gabe dago oraindik, baina berriro ere jendearen partaidetzaz baliatuz hiri erraldoiaren kale bat panelen mugimenduekin eta perspektibarekin jokatuz lortuko du bere helburua.
2008/05/09
Arabako Euskalerriko Adiskideen Elkarteko lehendakariordea den Jesus Ruiz de Gordejuela Urquijok Los vascos en el México decimonónico, 1810-1910 liburua aurkeztu zuen Azkoitiko Insausti Jauregian. Lanak mexikar lurraldera joandako bost mila euskalduneri buruzko datuak biltzen ditu. Hona El Diario Vasco egunkarian Joaquin Sudupe kazetariak sinatutako artikuluaren laburpena.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
